Ársrit um starfsendurhæfingu - 2015, Qupperneq 20

20 www.virk.is
V
IR
K
Mikilvægi mats í upphafi
þjónustu
Reynsla af starfsemi VIRK hefur sýnt
að ekki er alltaf raunhæft að hefja
starfsendurhæfingu. Stundum eru
einstaklingar ekki komnir með nægjanlega
góða heilsu til að geta hafið þennan feril
og stundum er starfsendurhæfing ekki
viðeigandi út frá aðstæðum og heilsubresti
einstaklings. Til að tryggja enn frekar að
þjónusta VIRK sé markviss og árangursrík
hefur verið þróuð svokölluð beiðnagátt
VIRK. Markmiðið er ávallt það að
einstaklingar fái þjónustu við hæfi hverju
sinni.
Sérfræðingar VIRK fara yfir allar beiðnir um
þjónustu. Ef augljóst er að einstaklingur
eigi heima í þjónustu VIRK þá er beiðni
send til ráðgjafa sem boðar viðkomandi í
viðtal til sín. Óljósari beiðnir eru teknar fyrir
á samráðsfundi með lækni VIRK. Þá fundi
sitja einnig sjúkraþjálfari og sálfræðingur
og/eða félagsráðgjafi. Ef niðurstaða
þess fundar er að beiðnin uppfyllir ekki
skilyrði um þjónustu VIRK eða þjónustan
sé ekki vænleg til árangurs út frá
faglegum forsendum er tilvísandi aðili og
einstaklingur upplýstur um niðurstöðuna
með bréfi. Í bréfinu koma fram ástæður
frávísunar og settar eru fram ráðleggingar
um næstu skref ef við á.
Sérfræðingar á beiðnafundi geta
einnig vísað máli í mat á raunhæfi
starfsendurhæfingar. Markmiðið er að
skoða hvort heilsufar og áhrif þess á
færni kalli á markvissa aðkomu í formi
starfsendurhæfingar. Í mati á raunhæfi er
tekin afstaða til eftirfarandi þátta:
• Er heilsubrestur til staðar sem
hefur áhrif á starfsgetu einstaklings?
• Hafa einkenni einstaklings áhrif á
færni sem talið er að
starfsendurhæfing geti bætt og
þar með aukið líkur á endurkomu á
vinnumarkað?
Ef starfsendurhæfing er talin raunhæf fær
einstaklingur boð um þjónustu ráðgjafa í
starfsendurhæfingu. Auk þess fylgja með
niðurstöður raunhæfimatsins og fyrstu
tillögur að íhlutun í starfsendurhæfingu. Ef
starfsendurhæfing er ekki talin raunhæfur
kostur að svo stöddu eru gefnar
ráðleggingar um næstu skref. Ávallt er
reynt að beina einstaklingi í annan farveg
innan velferðarkerfisins í samstarfi við
fagaðila ef starfsendurhæfing er ekki metin
raunhæf.
Nokkrir þættir
í faglegri þróun
hjá VIRK
Ása Dóra Konráðsdóttir sviðsstjóri starfsendurhæfingasviðs VIRK
Stöðugar breytingar eru á verkefnum og skipulagi innan
starfsendurhæfingarsviðs hjá VIRK. Þessar breytingar eru
í takt við þá faglegu þróun sem átt hefur sér stað á síðasta
ári og þær áherslur sem settar hafa verið fram fyrir næstu
misserin. Í þessari samantekt er gerð grein fyrir nokkrum
þáttum sem lögð hefur verið áhersla á í faglegri þróun hjá
VIRK undanfarna mánuði. Samantektin er alls ekki
tæmandi hvað varðar faglega þróun heldur er hér
einungis stiklað á stóru.