Tímarit hjúkrunarfræðinga - 2016, Blaðsíða 32

Fólkið10/16
GUÐBJÖRG PÁLSDÓTTIR
Í doktorsnám til að efla bráðahjúkrun á
Íslandi
Guðbjörg Pálsdóttir hóf störf á Fjórðungssjúkrahúsinu á Akureyri eftir
útskrift. „Þessi tími fyrir norðan er alltaf sveipaður sérstökum ljóma.
Þarna fékk ég bráðahjúkrunarbakteríuna sem ég geng enn þá með og
eigna þeim heiðurinn af.“ Næsti viðkomustaður
Guðbjargar var lyflækningadeild á Landakoti
og við sameiningu Landakots og Borgarspítala
í maí 1992 réð hún sig á bráðamóttökuna í
Fossvogi og hefur unnið þar við ýmis störf
undanfarin 23 ár. „Þessi hópur sjúklinga og
aðstandenda á hug minn allan þegar kemur
að hjúkrun,“ en Guðbjörg hefur verið í stöðu
almenns hjúkrunarfræðings, deildarstjóra,
framkvæmdastjóra og undanfarin átta ár sem
sérfræðingur í bráðahjúkrun. Guðbjörg fór í
meistaranám til Baltimore í Bandaríkjunum í
slysa- og bráðahjúkrun og útskrifaðist þaðan
1997. Að sögn Guðbjargar var það ótrúlega
mikil reynsla að kynnast hjúkrunarstarfinu í miðbæ Baltimore þar
sem glæpir eru algengir og lífsgæði ólík því sem við þekkjum héðan.
Eftir útskrift byrjaði hún að kenna við Hjúkrunarfræðideild Háskóla
Íslands, bæði í BS-, diplóma- og meistaranámi. Hún hefur tekið virkan
þátt í frumkvöðlastarfinu að kenna bráðahjúkrun og skipulagt grunn-
og framhaldsnám í bráðahjúkrun. Guðbjörg tók þátt í stofnun fag-
deildar bráðahjúkrunarfræðinga árið 1998 og gegndi þar formennsku.
Hún hefur starfað með fagdeildinni síðan og er fulltrúi hennar í stjórn
FÍH, jafnframt því að vera varaformaður FÍH. Guðbjörg er um þessar
mundir að hefja doktorsnám í hjúkrun til að bæta við sig þekkingu
með það að markmiði að efla veg og vanda bráðahjúkrunar á Íslandi.