Morgunblaðið - 25.06.2020, Blaðsíða 6

6 FRÉTTIRInnlent
MORGUNBLAÐIÐ FIMMTUDAGUR 25. JÚNÍ 2020
Helgi Bjarnason
helgi@mbl.is
Sveitarstjórn Dalabyggðar hefur
skipað starfshóp til að undirbúa
sameiningu við önnur sveitarfélög.
Hefur sveitarstjórnin fengið 4,4
milljóna króna styrk úr Jöfnunar-
sjóði sveitarfélaga til að láta vinna
valkostagreiningu.
Nú eru 639 íbúar skráðir með lög-
heimili í Dalabyggð og hefur íbúum
fækkað á undanförnum árum. Sam-
kvæmt stefnumörkun ríkisstjórnar-
innar, sem raunar er ekki búið að af-
greiða sem lög frá Alþingi, ber
sveitarfélaginu að sameinast öðru
fyrir kosningarnar 2026 þannig að
það nái lágmarksfjölda sem þá er
settur við 1.000 íbúa.
Fimm valkostir
Dalabyggð á allmarga kosti til
sameiningar, ef aðeins er litið til
landfræðilegrar legu sveitar-
félagsins. Nyrst liggja merkin að
Reykhólahreppi í Gilsfirði og
Strandabyggð þar norðan og austan
við. Samgöngur þangað eru greiðar,
um Gilsfjarðarbrú í Reykhólahrepp
og þaðan um fjallveginn Þröskulda í
Steingrímsfjörð. Þessi þrjú sveitar-
félög eiga samstarf um byggingar-
fulltrúa, skipulagsfulltrúa og
slökkvilið. Viðræður fóru fram um
sameiningu þeirra eða samstarf fyrir
nokkrum árum og varð niðurstaðan
að auka samstarf.
Húnaþing vestra liggur að Dala-
byggð að austanverðu og tengir veg-
urinn um Laxárdalsheiði Búðardal
við Hrútafjörð. Borgarbyggð liggur
að Dalabyggð að sunnanverðu og eru
samgöngur aðallega um þjóðveginn
um Bröttubrekku. Íbúarnir sækja
mikið þjónustu í Borgarnes og eru
sveitarfélögin í samvinnu um fé-
lagsþjónustu.
Dalamenn áfram Dalamenn
Sá hluti Dalabyggðar sem áður
var Skógarstrandarhreppur liggur
að Helgafellssveit í Álftafirði og
Stykkishólmur er þar skammt
undan. Eyjólfur Ingvi Bjarnason,
oddviti Dalabyggðar, segist hafa átt
óformlegt samtal við Stykkis-
hólmsbæ, Húnaþing vestra, Reyk-
hólahrepp og Strandabyggð um
þessi mál.
„Það er mín persónulega skoðun
að við séum að sameina stjórnsýslu
sveitarfélaganna en ekki samfélögin.
Málið snýst um að stjórnsýslueining-
ar verði færar til að veita íbúunum
lögbundna þjónustu. Dalamenn
verða alltaf Dalamenn, sama hvað
stjórnsýslueiningin heitir. Það er
síðan áskorun þegar við erum orðin
hluti af landfræðilega stórri stjórn-
sýslueiningu, að þá þurfa kjörnir
fulltrúar að hafa þekkingu á stað-
háttum til að taka mál svæðisins til
afgreiðslu,“ segir Eyjólfur.
Liggi fyrir 2022
Hann horfir til þess að niðurstaða
verði komin í valkostagreiningu um
hvert verði sameinast fyrir sveitar-
stjórnarkosningar 2022. Það kjör-
tímabil verði notað til að sameina
stjórnsýsluna svo því verði lokið fyr-
ir kosningarnar 2026.
Greina valkosti til sameiningar
 Dalabyggð á marga kosti við þá sameiningu sem sveitarfélagið þarf að fara í á næstu árum  Odd-
vitinn hefur átt óformlegt samtal við nokkra nágranna  Ákveðið að hefja vinnu við valkostagreiningu
Morgunblaðið/Sigurður Bogi
Bóndi Eyjólfur Ingvi Bjarnason í Ásgarði er oddviti Dalabyggðar. Sveitar-
stjórnin er að kanna kosti við þá sameiningu sem fram undan er.
Vatnshæð Hálsóns er enn nokkuð undir vatnshæð síðasta árs
en yfir áætluðu meðaltali. Vatnshæðin hefur farið hækkandi
að undanförnu og er hún nú 595 metrar yfir sjávarmáli.
Á sama tíma í fyrra var vatnshæðin tæpir 602 metrar yfir
sjávarmáli en yfirfall lónsins er 625 metrar yfir sjávarmáli.
Lægst varð hæð Hálslóns um 582 metrar yfir sjávarmáli á
þessu ári en það var 20. maí síðastliðinn. Mjög hafði gengið á
vetrarforða miðlunarlóna Landsvirkjunar í apríl síðastliðnum
en þau hafa eitthvað tekið við sér.
Morgunblaðið/Sigurður Bogi
Hálslón lætur minna fyrir sér fara en í fyrra