Tímarit hjúkrunarfræðinga - 2022, Qupperneq 28

26 Tímarit hjúkrunarfræðinga | 3. tbl. 98. árg. 2022
Rapportið slær í gegn
Rapportið, hlaðvarp Félags íslenskra hjúkrunarfræðinga, hóf göngu sína í febrúar á
þessu ári. Þáttastjórnendur fá til sín gesti úr röðum hjúkrunarfræðinga sem hafa sögur
að segja af starfinu og einkalífinu. Stöku sinnum er rætt við aðra sem eiga erindi sem
er beint til hjúkrunarfræðinga. Rapportið er einlægt spjall um fagið, áskoranir og lífið í
öllum sínum litum. Hér er stiklað á stóru í nokkrum viðtölum Rapportsins á þessu ári.
Rapportið
Umsjón og myndir: Ari Brynjólfsson
Kristín Davíðsdóttir, hjúkrunarfræðingur og teymisstjóri
skaðaminnkunar hjá Rauða krossinum, hefur lengi sinnt
jaðarsettum einstaklingum í íslensku samfélagi. Hún hætti
í hjúkrun á tímabili og fór að læra Miðausturlandafræði og
arabísku.
Rætt er við hana um hjúkrun jaðarsettra einstaklinga,
starfsemi Frú Ragnheiðar og sóknarfæri í skaðaminnkunar-
úrræðum. „Eitt af helstu sóknarfærunum er framþróun
neyslurýmisins. Við erum núna með það í litlum bíl, aðsóknin
hefur verið meiri en við bjuggumst við. Við töldum að það tæki
einhvern tíma að byggja upp traust og ná til fólksins en við
höfum frekar lent í erfiðleikum við að anna eftirspurn,“ segir
hún. „Þetta eru mestmegnis karlmenn sem hafa verið að koma
þannig að við þurfum að ná betur til kvenna.“
Jón Snorrason, sérfræðingur í geðhjúkrun, hefur orðið vitni af
miklum breytingum í geðhjúkrun síðustu áratugi.
Hann starfaði lengi í Arnarholti á Kjalarnesi sem var hluti af
geðdeild Borgarspítalans, þar var bæði útsýni fyrir sjóinn
og fjöllin. „Þetta var allt annað umhverfi heldur en í dag á
geðdeildum, sjálfum líst mér miklu betur á sveitaumhverfi fyrir
geðsjúkrahús, vegna þess að það er svo nálægt borginni hvort
eð er, það var ekkert mál að skjótast í bæinn,“ segir hann.
Fyrir aldamót hóf hann vinnu við að bæta úr öryggismálum,
fór hann á námskeið við Bethlem-geðsjúkrahúsið í Englandi til
að læra fyrirbyggjandi aðgerðir vegna hegðunar sjúklinga.
Sjálfur hefur hann gert margar rannsóknir sem snúa að
öryggismálum hér á landi, nú síðast í grein í síðasta tölublaði
Tímarits hjúkrunarfræðinga. Í Rapportinu ræðir hann meðal
annars um þá rannsókn og niðurstöðurnar sem koma ekki
fram í greininni.
Rapportið er á Spotify og má finna á
heimasíðu félagsins, hjúkrun.is
Hefur þú áhuga eða veist þú um
hjúkrunarfræðing sem væri áhugavert
að ræða við í Rapportinu? Sendu okkur
ábendingu á ari@hjukrun.is