Bændablaðið - 24.08.2023, Blaðsíða 62

62 Bændablaðið | Fimmtudagur 24. ágúst 2023
Bændablaðið tók að þessu sinni til
prufu nýjan sexhjóla vinnubíl frá
kanadíska framleiðandanum Can-
Am. Þetta er einfalt vinnutæki með
mikla burðar- og drifgetu. Traxter
er á margan hátt sér á báti, en
starfsmenn Ellingsen lýsa tækinu
sem stærri, öflugri og öruggari
útgáfu af sexhjólunum sem eru
algeng í sveitum landsins.
Þegar tækið er skoðað að utan
virðist það vera stækkuð útgáfa
af sexhjóli, nema með sætum
og veltigrind í stað hnakks. Þó
uppsetningin sé á margan hátt svipuð,
þá deilir Traxter sárafáum íhlutum
með sexhjólunum frá Can-Am.
Grindin, fjöðrunarbúnaðurinn og
drifrásin eru sérstaklega endurhönnuð
og styrkt til að þola þann aukna þunga
og álag sem þessu tæki fylgir.
Búnaður í lágmarki
Þegar sest er um borð er fátt sem
tekur á móti manni, enda er þetta
algjörlega strípuð útgáfa af Traxter og
greinilegt að peningurinn hefur farið í
drifbúnað í stað lúxus. Engar dyr eru
á veltigrindinni, heldur er taunet við
hvorn inngang, sem haldið er uppi
með plastsmellu.
Bíllinn er með þrjú sæti, með
merkilega þægilegum og mjúkum
svampi. Þau eru klædd með
vatnsheldu áklæði. Hvert sæti er
með sitt þriggja punkta öryggisbelti. Í
mælaborðinu er ein stöng fyrir gírana
og eru tveir gírar áfram og einn aftur.
Stiglaus reimskiptingin sér svo um að
halda vélarsnúningnum réttum. Engin
kúpling kemur við sögu.
Traxter er ekki með neinn
millikassa og eru öftustu fjögur
hjólin alltaf læst í drifi. Hægt er að
setja í sexhjóladrif með einum takka.
Ökutækið er mun liprara en mætti
ætla og verður ekkert stífara þegar
framhjóladrifið er virkjað.
Drifgeta umfram væntingar
Þegar Traxter er tekinn til kostanna
á grófum slóða, tekur nokkurn tíma
að átta sig á hversu öflugt tækið í
rauninni er. Undirritaður er vanur
venjulegum jeppum og byrjaði á að
keyra varlega yfir grjót og djúpar
holur. Þegar leið á prufuaksturinn
jókst sjálfstraustið þó til muna og
hraðinn samkvæmt því. Ófærur, sem
undirritaður hefði ekið yfir á 15-20
kílómetra hraða á óbreyttum jeppa,
þoldu vel 50-60 kílómetra hraða á
þessu tæki.
Hvert einasta hjól er með sjálfstæða
fjöðrun og miklum hreyfanleika.
Traxter nær því að halda sér ótrúlega
stöðugum og mjúkum þegar brunað
er yfir hörmulegt yfirborð. Mýktin
verður jafnvel meiri þegar hraðinn
eykst.
Samanborið við jeppa, þá ræður
Traxter við margfalt brattari brekkur,
enda með þrjá öxla og mun léttari. Í
þessum prufuakstri var tekist á við
brekku með meira en 45 gráðu halla
á köflum og lausu yfirborði og komst
bíllinn upp án mikilla láta.
Næst var reynt við lengri og
brattari brekku, en þar fundust
takmörk drifgetunnar. Þar sem
Traxter er rásfastur og stöðugur, þá
var lítið mál að bakka niður án þess
að koma sér í sjálfheldu eða óttast að
velta tækinu.
Ekki gerður fyrir þjóðvegi
Tekinn var stuttur rúntur á góðum
malarvegi. Þar reynist Traxter
prýðilegur upp að 70 kílómetra
hraða. Þó bíllinn komist hraðar, þá fer
upplifunin að vera óþægileg þar sem
ökumaðurinn er nær alfarið óvarinn
fyrir vind. Hávaðinn verður jafnframt
það mikill að ómögulegt er að eiga
samskipti við sessunautinn.
Ekki var reynt á akstur á malbiki,
enda bíllinn ekki ætlaður í slíka
notkun.
Öflugur pallur
Ekki er hægt að segja frá mörgu þegar
kemur að ytra byrði tækisins, enda
hefur öllum óþarfa verið haldið í
lágmarki. Örstutt grænt húddið og
ljósin mega þó eiga það að vera
smekklega hönnuð.Það sem mestu
máli skiptir á Traxter er pallurinn. Þó
hann virðist ekki stór, þá er hann með
sambærilegt innra mál og amerískir
pallbílar og komast tvö Euro-bretti
leikandi á þverveginn. Skjólborðin
eru með sterkri stálgrind og eru föst,
nema dregnir séu fram skiptilyklar.
Burðargeta farartækisins er 771
kílógramm, sem þýðir að bíllinn getur
auðveldlega burðast með heyrúllu á
pallinum. Dráttargetan er jafnframt
1.360 kílógrömm. Bændur og
aðrir sem vinna við erfiðar aðstæður
úti í náttúrunni, geta leyst af hólmi
fjölmörg tæki með Traxter. Pallurinn
er með hlerapumpu, en samkvæmt
upplýsingum frá Ellingsen á hann
að létta undir við að sturta, jafnvel
þó pallurinn sé með fullfermi. Vélin
og skiptingin eru staðsett rétt aftan
við ökumannshúsið, undir pallinum.
Þegar pallinum er lyft upp, þá er
sérlega gott aðgengi til að sinna
viðhaldi.
Tölur
Helstu mál í millímetrum eru:
Lengd, 3.915; breidd, 1.625; og hæð,
1.981. Þyngd ólestaðs ökutækis er
886 kílógrömm. Verð með vsk. er
5.990.000 krónur.
Að lokum
Traxter sexhjóla vinnubíllinn er flott
tæki þar sem burðar- og drifgeta er í
algjörum forgangi.
Einfaldleikinn er mikill og lítur út
fyrir að ekki hafi verið lögð króna í
óþarfa búnað.
Ökutækið er torfæruskráð og
kemur því ekki til greina sem
vinnutæki í þéttbýli.
VÉLABÁSINN
Ástvaldur Lárusson
astvaldur@bondi.is
– Prufuakstur á Can-Am Traxter HD10 6x6
Can-Am Traxter HD10 6x6 vinnubíllinn er gerður til að þjóna mjög skýrum tilgangi: Burðast með farm um torfærar slóðir og er öllum óþarfa búnaði sleppt.
Hönnuðir Can-Am hafa þó ekki veitt afslátt á útlitshönnun. Myndir / ÁL
Ökumannshúsið er með nákvæmlega það sem þarf og ekkert
meira. Þó sætin líti ekki út fyrir að vera merkileg, þá eru þau
sérlega þægileg.
Pallurinn á Traxter 6x6 er með svipuð mál og amerískir pallbílar og má bera 771 kílógramm.
Fjöðrunarkerfið er mun öflugara en í venjulegum jeppum. Aðgengið að vélinni er með allra besta móti.