Goðasteinn - 01.06.1977, Síða 87

Sigurður átti son, er Þorsteinn hét. Hann giftist og átti dóttur,
sem Rannveig heitir og lærði lögfræði og á nú heima í Reykja-
vík. Óli heitir bróðir hennar. Guðrún systir Þorsteins var ein af
stálfróðustu konum, sem ég man eftir að hafa kynnst um mína
daga. Móðir þeirra var frá Hnappavöllum í Öræfum og var sögð
út af bráðgáfuðu fólki komin.
Það var sagt, að Engey hefði verið seld úr Hornshöfn á 100
krónur og þótti hátt verð þá, en hvað hefði hún verið seld nú
með 8 árum og segli og fallegu stýri? Hér var önnur stýrislykkjan
notuð víst á 2 eða 3 útsjávarskip, og þótti mér hún listavel og
fallega smíðuð. Ég sá eitt ræðið af Engey. Það var ólíkt öllum
ræðum hér, en mjög var það smiðslegt og bar smiðnum vitni um
fagurt handbragð.
Allt er þetta nú löngu liðið, en „lengi man til lítilla stunda“
og einnig til lítilla eða fagurra smáhluta.
Þetta er skrifað 7. mars 1972 eða réttum 99 árum eftir sjó-
slysið mikla á Hornsfjörum. Blæjalogn er á landi og sjó og ekkert
nema sagan, minnir á örlagadag frönsku skipanna og áhafna
þeirra.
Goðasteinn
85