Skógræktarritið - 15.10.2010, Page 17

SKÓGRÆKTARRITIÐ 201016
ÓÐUR UM TRÉ OG SKÓGA
III
Ilmandi birki eftir rigningu
Ilmandi birki við landnám
28 þúsund ferkílómetrar
segir leiðsögumaðurinn
Ilmandi birki rúmlega ellefu öldum síðar
rúmlega eitt þúsund ferkílómetrar
segir leiðsögumaðurinn
Nokkrir hífaðir þrestir hlæja að okkur
syngja hátt og snjallt:
Við vorum að borða ber
við vorum að borða reyniber
Þeir eru svona glaðir
því berin eru örlítið áfeng eftir frostnætur
fræin ganga heil í gegnum fuglinn
í skítnum er afbragðs áburður
næring fyrir spírandi fræ
Við vorum að borða ber
við vorum að borða reyniber
syngur kórinn
söngkór hífaðra þrasta um haust
og reynitrén standa eldrauð af haustfuna
innan um birkið
ÓÐUR UM TRÉ OG SKÓGA
IV
Vegur eyðingar
vegurinn sem lá frá skóginum
er sami vegur og liggur
til skógarins aftur
vegur ræktunar og alúðar
vegur sköpunar
Maður og náttúra
bæði kunna þau að eyða
maður og náttúra
bæði kunna þau að skapa
Sorg landsins
undir svipuhöggum stormsins
og hraglandans
árum saman öldum saman
eyðingarsaga linnulaus
sorg landsins
svörðurinn fýkur til hafs
En brothætt von vaknar
neitar að búa lengur
bara í hugarheiminum
Að endurlífga er gjöf tímans
endurvekja endurfæða
Tíminn sprettur upp sprettur fram
vill myndbreytast skjóta rótum vaxa
Sorg rofabarðanna sefast
þegar þú gengur
ljósum logum
skógargyðjan
gengur niður stíginn
við vatnið
skógarstíginn
Maður og náttúra
bæði kunna þau að eyða
maður og náttúra
bæði kunna þau að skapa