Morgunblaðið - 03.11.1981, Blaðsíða 29

MORGUNBLAÐIÐ, ÞRIÐJUDAGUR 3. NÓVEMBER 1981
29
Stjórnmálayfirlýsing 24. landsfundar Sjálfstæðisflokksins I:
Sjálfstæðismenn sameinist
í einarðri baráttu
— fyrir öryggi landsins, frelsi einstaklings, frjálsu atvinnulífi, samhjálp og velferð
IIÉR fer á eftir stjórnmálayfirlýsing 24. landsfundar
Sjálfstæðisflokksins I. Um þessa yfirlýsingu varð fuil ein-
ing og samstarf á landsfundinum:
Frá því að Sjálfstæðisflokkurinn var stofnaður
fyrir fimmtíu og tveimur árum hefur hann verið
merkisberi frelsis og framfara í landinu. Stefna
hans er víðsýn, frjálslynd og þjóðleg umbótastefna á
grundvelli athafna- og einstaklingsfrelsis með hags-
muni allra stétta og byggðarlaga fyrir augum. Flokkur-
inn telur það forsendu heilbrigðs samfélags að einstakl-
ingar, félög þeirra og samtök hafi frelsi til athafna og
fái að njóta afraksturs iðju sinnar. Jafnframt leggur
hann áherslu á það hlutverk opinberra aðila að sjá um
að leikreglur frjálsrar starfsemi séu haldnar og sam-
hjálp tryggð, sem veiti öryggi gegn áföllum. Flokkurinn
hefur haft forustu í sókn Islendinga til landsréttinda og
vill gæta þess öryggis, sem nauðsynlegt er til þess að
þjóðin geti lifað í friði og frelsi í landinu sínu.
Reynslan sýnir að íslendingum hefur vegnað best,
framfarir orðið örastar og velferð aukist mest, þegar
sjónarmið Sjálfstæðisflokksins hafa verið ráðandi. Þeg-
ar skoðanir annarra flokka hafa orðið ofan á og höft,
skattar og hvers konar opinber afskipti verið aukin,
hefur hins vegar skjótt brugðið til stöðnunar í atvinnu-
lífi og dregið úr umbótum. Jafnframt hefur öryggi
landsins verið stefnt í hættu vegna tvíræðrar afstöðu
þessara flokka.
Alvarlegar horfur í þjóðmálum
Alvarleg viðhorf blasa nú við í þjóðmálum hér á landi
sem víðast hvar annars staðar. Á undanförnum áratug-
um hafa orðið stórstígar framfarir og velferð hefur
aukist hröðum skrefum. Nú hefur hins vegar dregið úr
hagvexti, verðbólga magnast og atvinnuleysi orðið mik-
ið víða um heim. Jafnframt hefur opinber starfsemi
stóraukist án þess að árangur hafi skilað sér að sama
skapi.
Við íslendingar höfum ekki farið varhluta af þessum
breytingum, enda þótt aflaaukning vegna stækkunar
fiskveiðilögsögu og hagstæð markaðsskilyrði hafi orðið
okkur til hagsbóta. Það er skylda stjórnmálaflokka að
skoða stefnu sína í Ijósi þessara nýju viðhorfa. Sjálf-
stæðisflokkurinn hefur að undanförnu unnið að þessu.
Fyrir tveimur árum birti flokkurinn stefnuskrá í efna-
hagsmálum, „Endurreisn í anda frjálshyggju". í fram-
haldi af henni er nú lögð fram ítarleg stefnuskrá í
atvinnumálum auk álitsgerða í öðrum málaflokkum.
Brýnasta verkefnið að efla atvinnulífið
Sjálfstæðisflokkurinn telur það brýnasta verkefnið
að styrkja og efla atvinnulíf landsins. Takist þetta ekki,
brestur grundvöllur framfara og umbóta og vaxandi
straumur fólks mun leita sér lífsviðurværis í öðrum
löndum.
Bæta þarf starfsskilyrði atvinnuveganna og leysa úr
læðingi atorku og framtak einstaklinga og félaga
þeirra. Fella verður niður hömlur á atvinnurekstri og
viðskiptum og leyfa heilbrigðri samkeppni að njóta sín.
Verðlag þarf að vera frjálst og sömuleiðis gjaldeyris-
viðskipti. Endurskoða ætti opinber útgjöld og flytja
verkefni frá ríki til sveitarfélaga, fyrirtækja og ein-
staklinga. Jafnframt verður að draga úr sköttum á ein-
staklinga og atvinnurekstur og leggja áherslu á, að allar
atvinnugreinar og fyrirtæki sitji við sama borð. Geng-
isskráning þarf að taka mið af þörfum atvinnuveganna,
jafnframt því sem aðhalds er gætt vegna verðlagsáhrifa
hennar. Beita ber verðjöfnunarsjóðum í samræmi við
upphaflegan tilgang þeirra. Kjarasamningar verða að
vera á ábyrgð þeirra, sem að þeim standa og stefna að
öruggri afkomu launþega jafnt sem atvinnuvega. Sam-
ræmdri stefnu verður að fylgja í peninga- og fjármál-
um. Kjör innlána og útlána þurfa að ákveðast svo að
hvatning til sparnaðar sé nægjanleg og fjármagn bein-
ist þangað, sem það kemur að bestum notum. Nýta
verður vatnsorku og jarðvarma, sem verði grundvöllur
öflugs iðnaðar. Ákvarðanir ber að taka sem fyrst um
nýjar virkjanir og nýta samvinnu við erlend fyrirtæki
eftir því sem hagkvæmast virðist og markaðsskilyrði
gefa vísbendingu um.
Dagvinnutekjur nægi til framfærslu
Aukinn hagvöxtur og framleiðni eru forsendur þess,
að Islendingar nái því markmiði að sérhver vinnufær
maður hafi starf, er veiti lífvænlega afkomu með hóf-
legum vinnutima. Áhersla sé lögð á, að dagvinnutekjur
nægi til framfærslu. Stuðlað sé að alhliða þróun at-
vinnuvega og lífsskilyrða í öllum héruðum landsins. Við
sérstaka og tímabundna örðugleika er réttlætanlegt, að
opinberir aðilar komi í veg fyrir að fyrirtæki kollvarpist
og starfsmenn séu sviptir lífsafkomu.
Það er grundvöllur sjálfstæðisstefnunnar, að stétt
starfi með stétt. í atvinnurekstri þarf að auðvelda sam-
vinnu og samstarf stjórnenda og starfsmanna í því
skyni að auka ábyrgð allra þeirra, er í atvinnulífinu
starfa. Greiða þarf götu hagræðingar og starfshvatn-
ingar og mæta nýjum kröfum tækni og tölvuvæðingar.
Öryggi um atvinnu sé ennfremur treyst og starfsgleði
örvuð með aukinni verkmenntun og endurþjálfun,
sveigjanlegum vinnutíma og bættum aðbúnaði á vinnu-
stað.
Stuðlað sé að því að heilbrigðar lífsvenjur fái þróast
og að fjölskyldulíf eflist á grundvelli kristinnar lífs-
skoðunar. Allir njóti öryggis ef heilsubrestur sækir að
og þegar aldur færist yfir og hafi sama rétt til orlofs og
verðtryggðs lífeyris.
Takist á grundvelli framangreindrar stefnu í at-
vinnu- og kjaramálum að auka framleiðslu og örva nýja
starfsemi, geta kjör að nýju farið batnandi. Um leið
verður unnt að treysta atvinnu, efla menningu og bæta
umhverfi. Jafnframt geta frelsi og lýðræði dafnað og
eining þjóðarinnar styrkst á grundvelli dýrmætrar arf-
leifðar hennar.
Öryggi landsins
Sjálfstæðisflokkurinn hefur ávallt verið þeirrar skoð-
unar að öryggi landsins verði að tryggja miðað við
aðstæður hverju sinni. Á alþjóðavettvangi ekki síður en
innanlands takast þeir á, nú sem fyrr, sem eru fylgjandi
frelsi einstaklingsins, og þeir sem vilja hefta þetta
frelsi. Atburðirnir í Póllandi sýna vilja fólks til að
brjótast undan oki sósíalismans, en innrásin í Afganist-
an staðfestir enn á ný að Sovétmenn hika ekki við að
beita valdi sínu, þegar svo býður við að horfa. Áróð-
ursherferð Sovétmanna í Evrópu um þessar mundir,
ekki síst á Norðurlöndum, vekur ugg og gefur sérstakt
tilefni til þess að vara við undanlátssemi.
Það er því miður staðreynd að hernaðarlegt mikil-
vægi íslands hefur aukist. Útþensla sovéska flotans
heldur áfram og umsvif hans og sovéskra herflugvéla í
nágrenni Islands fara vaxandi. Það er augljóst, að enn
sem fyrr verður öryggi þjóðarinnar ekki tryggt með
öðru en áframhaldandi þátttöku í því friðarkerfi, sem
íslendingar hafa átt þátt í að móta á Norður-
Atlantshafi. Yfirgnæfandi hluti þjóðarinnar kýs eins og
áður virka þátttöku í varnarsamstarfi lýðræðisþjóð-
anna og vill gera þær ráðstafanir til varnar, sem nauð-
synlegar eru til þess að Islendingar fái að lifa í friði í
landinu. Sjálfstæðisflokkurinn mun vinna að því að sem
víðtækust eining náist um varnir landsins, en telur ekki
að við núverandi aðstæður komi til greina að draga úr
þeirri öryggisgæslu, sem fram fer í landinu og umhverf-
is það.
Þjóðarstefna
Framundan eru viðsjárverðir tímar á alþjóðavett-
vangi og miklir erfiðleikar í atvinnumálum lands-
manna. Sjálfstæðisflokkurinn, einn stjórnmálaflokka,
getur veitt þjóðinni þá forustu, sem hún þarfnast.
Brýna nauðsyn ber því til að sjálfstæðismenn sameinist
í einarðri baráttu fyrir öryggi landsins, frelsi og rétti
einstaklingsins og frjálsu og heilbrigðu atvinnulífi, er
-sé grunnur velferðar hvers og eins og samhjálpar allra
á komandi árum. Sjálfstæðismenn vilja gera þessa
stefnu sína að þjóðarstefnu mannréttinda, frelsis og
lýðræðis.
Stjórnmálayfirlýsing landsfundar Sjálfstæðiflokksins II:
Eindregin andstaða
við ríkisstjórnina
- skorað á ráðherra að ganga úr henni
IIKK fer á eftir stjórnmálayfirlýsing 24.
landsfundar Sjálfstæðisflokksins II. Hún
fjallar um afstöðuna til ríkisstjórnarinnar.
Fram fór leynileg atkvæðagreiðsla um
ályktunina á fundinum og voru 700 lands-
fundarfulltrúar henni fylgjandi 237 á móti
en 32 scðlar voru auðir og einn ógildur.
Landsfundur Sjálfstæðisflokksins
telur, að stefna og störf núverandi
ríkisstjórnar séu í ósamræmi við
sjónarmið Sjálfstæðisflokksins og efli
áhrif þeirra, sem andvígastir eru þeim
sjónarmiðum. Þetta hefur leitt til þess,
að æ meir hefur þrengt að atvinnuvegum
landsins og að atvinnurekstur einstakl-
inga og félaga þeirra á hvarvetna í vök
að verjast. Jafnframt hefur verið látið
undir höfuð leggjast að marka og fram-
fylgja stefnu í orku- og iðnaðarmálum,
sem orðið gæti grundvöllur að atvinnu og
framförum á komandi árum. Ekkert það
hefur verið aðhafst gegn verðbólgunni,
sem áhrif hefur nema skamma hríð,
enda fer hún nú vaxandi á ný. Verðlags-
höft hafa grafið undan fjárhag fyrir-
tækja og stofnana, rýrt sjálfstæði þeirra
og í reynd haft öfug áhrif við tilganginn.
Stefnt hefur verið áratugi aftur í tímann
með fjölgengi og millifærslum milli at-
vinnugreina. Háum sköttum hefur verið
við haldið, erlendar lántökur hafa farið
sívaxandi og meðal annars komið í stað
innlendrar skuldasöfnunar ríkissjóðs og
ríkisstofnana. Dregið hefur verið úr að-
stöðu einstaklinga til að eignast eigið
húsnæði og umráð þeirra yfir eignum
sínum takmörkuð. Umsvif ríkisins og af-
skipti hafa enn verið aukin. Tvíbent af-
staða ríkisstjórnarinnar í varnarmálum
og frestun mikilvægra framkvæmda á
þeim vettvangi stefnir öryggi landsins í
hættu.
Fundurinn lýsir því yfir eindreginni-
andstöðu ^við ríkisstjórnina. Stefna
stjórnarinnar og framkvæmd hennar er
bersýnilega ekki í samræmi við grund-
vallarhugsjónir ráðherra úr röðum
sjálfstæðismanna. Fundurinn skorar á
þessa ráðherra að ganga úr ríkisstjórn-
inni og þá þingmenn flokksins, sem stutt
hafa hana, að láta af þeim stuðningi.
Sjálfstæðisflokkurinn getur þá einhuga
og sameinaður staðið að nýrri stjórn-
armyndun á grundvelli stefnu sinnar.