Árbók Hins íslenzka fornleifafélags - 01.01.1968, Side 97

MYNDIR AF SKÁLHOLTSBISKUPUM
101
Þegar Finnur biskup var i Kaupmannahöfn hefur hann hitt Ludvig Harboe biskup,
sem var á Islandi 1741, og að líkindum aðra háttsetta kirkjumenn, eins og t. d.
Brorson-brœðurna. Ef til vill hafa þeir stungið upp á því, að Finnur léti Vigilius
Erichsen mála sig, hinn þekkta málara, sem málað hafði smáar andlitsmyndir
(miniaturer) fyrir hirðina, og einnig hafði hann málað mynd af Nicolaj Brorson
(1750).“
HANNES FINNSSON
Hannes biskup Finnsson andaSist í Skálholti árið 1796. Engin mynd
virðist hafa verið gerð af honum í lifanda lífi. Ólafur Ólafsson prófess-
or á Kóngsbergi hafði dregið upp mynd af minnismerki Jóns Eiríks-
sonar konferensráðs árið 1794 og látið stinga 1 eir og gefa út. í miðju
er þar kringlóttur skjöldur með vangamynd Jóns.22 Svo er að sjá
sem Ólafur hafi haft uppi ráðagerðir um að gera sams konar minnis-
merki um Hannes biskup eftir lát hans. Hefur hann þá líklega skrifað
Stefáni amtmanni Þórarinssyni og spurzt fyrir um myndir af bisk-
upinum. Einhvern grun virðast þessir menn hafa haft um að séra
Sæmundur Hólm hafi gert mynd af Hannesi biskupi, þegar þeir voru
báðir í Kaupmannahöfn, og hefur Stefán amtmaður skrifað ekkju
Hannesar, frú Valgerði Jónsdóttur, og spurt hana um þetta. Svar-
bréf frú Valgerðar til Stefáns amtmanns er til, dags. 28. sept. 1798,
og er það heimild um það, sem hér hefur verið drepið á. í bréfinu
segir frú Valgerður:23
„Eg þakka auðmjúkl. og ástsamlega hæstvirðandi elskulegt tilskrif
af 25. Junii síðastl., sem mér fyrst til handa kom öndvert í þessum
mánuði; þess fyrsta parts innihaldi er æ því verr og miður, að eg
ei get fullnægt, því jafnvel þó ske kunni, að minn sál. maður hafi í
Khöfn látið sr Sæmund Holm teikna sig af, er og var mér það
aldeilis ókunnugt, og aldrei hefi eg soddan eður nokkurt af mínum
sál. tekið Skilderie séð, því síður að það sé í mínum vörzlum. Ef nú
vöntun þessi nauðsynlega þarf (sem eg nær því dirfist að draga í efa)
stanza Professor Olafsens eðalsinnaða ásetning að upprétta mínum
sál. manni áþekkt æruminni því sem hann upprétti sál. conferentsráði
J. Erichsen, hlýtur það svo að vera, hvörsu sem eg það innilega
trega, að míns sál. manns minning skal vanta að heiðrast af svo
dygðugs merkismanns stóru gáfum og konst sem Professor Olaf-
sens“.
22 Um minnismerki þetta hefur Matthías Þórðarson skrifað ítarlega í Islenzkum
listamönnum II, bls. 33—38.
23 Lbs. 26 fol., 171.