Ársrit Ræktunarfélags Norðurlands - 01.01.1985, Qupperneq 76

þess. Á landsvísu má reikna með að til falli um það bil 780.000
tonn af þessu hráefni og þar af á Norðurlandi um 190.000
tonn. Þetta vill með öðrum orðum segja að hægt væri hrá-
efnisins vegna að halda 340.000 tófur á Norðurlandi ef allur
þessi fiskúrgangur og bræðslufiskur væri notaður í fóður
handa þeim. Framleiðsluverðmæti þessa tófufjölda gæti verið
um 4 milljarðar króna. Varla er raunhæft að áætla að allt
þetta hráefni verði notað til að fóðra með loðdýr, en hitt er
jafn ljóst að vaxtarmöguleikar greinarinnar takmarkast vart
af hráefni í náinni framtíð hér á Norðurlandi.
Hráefnisverð hér á landi er nú um 4,00 kr. á kíló fóðurs, sem
er verulega lægra en gengur og gerist hjá helstu keppinautum
okkar í greininni. Vinnslukostnaður fóðursins er hins vegar
nokkru hærri hér, enn sem komið er, vegna þess að framleiðsla
hverrar fóðurstöðvar er enn of lítil. Á Norðurlandi eru nú
starfandi fjórar fóðurstöðvar svo sem áður greinir, en á Norð-
urlöndunum væri allt það fóðurmagn sem hér er framleitt
unnið í einni fóðurstöð. Það er því verulega mikils um vert að
loðdýraræktinni vaxi sem fyrst svo fiskur um hrygg í kringum
þessar fóðurstöðvar sem þegar eru komnar að við getum
unnið fóðrið með viðlíka kostnaði og aðrir gera. Þá munum
við að fullu geta nýtt okkur hið hagkvæma hráefnisverð sem
við búum við.
Stofnkostnaður loðdýrabúa hér á landi verður alltaf veru-
lega hærri en gengur og gerist í nágrannalöndum okkar,
vegna þess fyrst og fremst að við verðum að byggja vandaðri
hús en þar tíðkast. Ástæður þessa eru að veðrátta hér er mun
harðari en þar gerist. Einkum á þetta við á Norðurlandi. Hér
er til dæmis alveg nauðsynlegt að hafa möguleika á að loka
húsunum á haustin vegna þess að von getur verið á stórhríð-
um áður en til þess kemur að felda dýrin og slíkt veður getur
valdið verulegum skaða á feldinum. Að auki er hér mun
vindasamara en menn eiga að venjast annarsstaðar á Norð-
urlöndum en það gerir kröfur um mun traustari hús. Mikið
hefur verið unnið í því að koma byggingakostnaði hér niður
að undanförnu og verulega áunnist, en ugglaust má þó gera
mun betur. Víst er einnig að bændur verða að gæta ítrustu
78