Morgunblaðið - 11.05.2001, Blaðsíða 6

FRÉTTIR
6 FÖSTUDAGUR 11. MAÍ 2001 MORGUNBLAÐIÐ
MOKVEIÐI hefur verið í Litluá í
Kelduhverfi allar götur síðan áin var
opnuð til veiða 1. maí síðast liðinn.
Fyrsta hollið dró á land um 300 fiska
og næsta holl var með rúmlega 200
stykki.
Að sögn Pálma Gunnarssonar
annars leigutaka árinnar, var uppi-
staðan í aflanum spikfeitur og fal-
legur geldfiskur, 2,5 til 5 pund að
þyngd. Stærstir veiddust um það bil
8 punda fiskar, en menn bæði sáu og
settu í og misstu miklu stærri fiska.
Litlaá er einmitt þekkt fyrir 15 til 20
punda sjóbirtinga og hefur sést til
slíkra kumpána nú í vor.
Pálmi og félagi hans Erling Ingva-
son hafa innleitt veiða-sleppa fyrir-
komulag í Litluá í kjölfarið á því að
veiðin hefur verið í lægð í ánni síð-
ustu ár. Nú virðist hins vegar vera
góð uppsveifla. „Við merktum um 70
fiska fyrstu tvo dagana og síðast
þegar ég vissi höfðu aðeins fimm
veiðst aftur, sem er hreint út sagt
æðislegt,“ sagði Pálmi.
Menn hafa verið að fá ’ann í Vífils-
staðavatni, vatni sem margir nota til
að hita sig upp í á vorin. Einn sem
fréttist af fyrir mjög skömmu fékk
18 bleikjur á tveimur stundum að
kvöldi til. Fékk allar á lítinn Peacock
kúluhaus. Þetta voru mest fiskar á
bilinu tæpt pund upp í 1,5 pund. Vel
haldnir fiskar og fallegir. Fregnir af
fleirum hafa borist, 8 fiskar, 6 fiskar
og 11 fiskar. Nær allt bleikja og
fluguveiðimenn að fá bestu veiðina.
Þá hefur verið á stundum líflegt í
Þingvallavatni. Bleikjan mest 2-4
pund og Öfugsnáðinn og Lambhag-
inn drýgstu staðirnir. Veiðimaður
sem var nýverið í Presthólma fékk
fimm stórbleikjur í beit á stóra vel-
lakkaða Killer púpu, án kúlu.
Mokveiði í Litluá
Morgunblaðið/Friðþjófur Helgason
Halldór Róbertsson býr sig und-
ir að landa birtingi í Litluá.
ERU
ÞEIR AÐ
FÁ’ANN?
Samninganefnd FFSÍ
Styður
Grétar Mar
MORGUNBLAÐINU hefur borist
yfirlýsing frá samninganefnd Far-
manna- og fiskimannasambandsins
vegna ummæla forystu LÍÚ í gær
um forseta sambandsins. Á blaða-
mannafundi í fyrradag gagnrýndi
Friðrik J. Arngrímsson, fram-
kvæmdastjóri LÍÚ, Grétar Mar
Jónsson.
Á fundinum sagði Friðrik:
„Maður er hreinlega að vona að
ábyrgir aðilar innan félagsins taki
í taumana þannig að félagið komi
að viðræðum með ábyrgum hætti,
sem ekki hefur verið fram að
þessu.“
Vegna þessarar yfirlýsingar vill
samninganefnd FFSÍ taka fram:
„Samninganefnd Farmanna- og
fiskimannasambandsins lýsir undr-
un sinni á yfirlýsingum forystu-
manna Landssambands íslenskra
útvegsmanna í garð forseta sam-
bandsins, sem einkennast af per-
sónulegum árásum og dónaskap,
og hafa það eitt að markmiði að
reyna að skapa sundrungu í röðum
sjómanna. Slíkar yfirlýsingar for-
ystumanna útvegsmanna stuðla
ekki að lausn kjaradeilunnar.
Samninganefnd Farmanna- og
fiskimannasambands Íslands lýsir
yfir fullu trausti gagnvart Grétari
Mar Jónssyni, formanni nefndar-
innar og forseta sambandsins.“
HELGI Laxdal, formaður Vélstjóra-
félags Íslands, sagði á fundi með vél-
stjórum í gær að Vélstjórafélagið
hefði staðið frammi fyrir því að fá á
sig miðlunartillögu eða lög, sem
hugsanlega hefðu falið í sér fram-
lengingu á eldri kjarasamningi.
Hann viðurkenndi á fundinum að
dæmi væru um að breyting á mönn-
un hefði í för með sér launalækkun á
einstökum bátum.
Helgi sagði í upphafi fundar að
eftir fimm vikna verkfall hefðu vél-
stjórar staðið frammi fyrir þremur
kostum: að ná samningum, að fá á sig
miðlunartillögu eða lög sem hefðu
bundið enda á verkfallið. Hann sagði
að ekki hefði verið komið samkomu-
lag um neina þætti samningsins og
því hefðu lögin ekki getað falið annað
í sér en framlengingu á eldri samn-
ingi um tiltekinn tíma eða skipun
gerðardóms.
Á fundinum var farið yfir fisk-
verðsmálin og kom fram hjá sumum
fundarmönnum að þeim þótti sú að-
ferð sem lögð er til grundvallar í
samningnum nokkuð flókin og ekki
voru allir sannfærðir um að hún
færði þeim nægilega kjarabót. Fram
kom á fundinum að Verðlagsstofa
skiptaverðs mun ganga í að hækka
fiskverð hjá þeim sem greiða lægst
verð. Mikið breyting felst í því að
taka upp viðmiðun við verð á fisk-
mörkuðum. Verð í beinum viðskipt-
um er í dag 66% af því verði sem er á
fiskmörkuðum, en markmiðið er að
þetta hlutfall fari upp í 80%.
Dæmi um launalækkun
Gísli S. Sveinsson, vélstjóri á
Hrafni GK-111, gagnrýndi á fundin-
um ákvæði samningsins um mönnun.
Hann sagði að sú nýja „raunmönn-
un“ sem samningurinn kvæði á um
fæli ekki í öllum tilvikum í sér þá
mönnun sem væri algengust á bát-
um. Hann tók sem dæmi að sam-
kvæmt samningnum væri gert ráð
fyrir 11 mönnum um borð í 201–240
tonna báti með botnvörpu. Algeng-
ast væri að á þessum bátum væru
átta menn. Breytingin fæli í sér að
hlutur áhafnar sem væri 29,5% í dag
færi niður í 21,45%. Þetta væri 12,1%
launalækkun.
Tekið skal fram að í þessum út-
reikningum er ekki tekinn með í
reikninginn ávinningur sjómanna af
hærra fiskverði eða öðrum þáttum
kjarasamningsins.
Helgi Laxdal sagði á fundinum að
rétt kynni að vera að hægt væri að
finna dæmi um þetta. Hann sagði að
í ákvæðum samningsins um mönnun
hefði verið reynt að finna út hver
væri raunmönnun á bátunum. Hann
sagði að þessar tölur byggðust á
meðaltölum sem gæti þýtt að í ein-
hverjum tilvikum hefðu samninga-
menn vanmetið eða ofmetið mönn-
unarþörfina. Hann sagði að kafli
samningsins um raunmönnun væri
byggður á tillögu sem Sjómanna-
sambandið lagði fram í viðræðunum.
Í lok fundarins var farið yfir slysa-
tryggingarmál. Fram kom að þessi
mál hafa verið í miklum ólestri. Bæt-
ur til sjómanna hafa í mörgum til-
vikum verið lágar og þeir hafa oft
þurft að bera hluta af tjóni sjálfir.
Samningurinn verður kynntur
vélstjórum á landsbyggðinni í dag og
á morgun, en stefnt er að því að at-
kvæðagreiðslu ljúki á sunnudag.
Formaður Vélstjórafélagsins á kynningarfundi með vélstjórum
Gátum búist við lögum um
framlengingu á samningi
Morgunblaðið/Kristinn
Fjölmenni var á fyrsta kynningarfundi Vélstjórafélagsins í gær.
„ÞETTA er erfið staða sem er komin
upp fyrir þessa aðila. Ég legg ennþá
áherslu á að þeir nái saman og leysi
málið í heild,“ sagði Árni Mathiesen
sjávarútvegsráðherra að loknum
fundi með forystumönnum Sjó-
mannasambandsins og Farmanna-
og fiskimannasambandsins í gær. Á
fundinum var farið yfir þá stöðu sem
upp er komin í deilu sjómanna og út-
vegsmanna eftir að Vélstjórafélagið
og LÍÚ sömdu. Ekkert var rætt um
þann kost að leysa kjaradeiluna með
lögum.
Árni sagði að þó að erfiðleikarnir
væru miklir við að ná samningum
sýndi samningur LÍÚ og vélstjóra að
menn gætu það. Hann sagðist því
telja að samningur vélstjóra hefði
falið í sér jákvætt skref. „Það flækir
hins vegar stöðuna þegar einn er bú-
inn að semja en aðrir eiga ósamið.
Það setur auðvitað þrýsting á þá að
semja líka. Ég mun fylgjast með
þessum viðræðum áfram.“
Í samningi vélstjóra og LÍÚ kem-
ur fram að samningsaðilar ætli að
óska eftir því við stjórnvöld að sett
verði lög sem m.a. afnemi Kvótaþing.
Árni sagði að ekkert lægi fyrir um
viðbrögð stjórnvalda við þessari ósk.
Ekki væri ljóst hvenær frumvarpið
kæmi fram.
Segir að verið sé að rangtúlka
gögn Sjómannasambandsins
Sævar Gunnarsson, formaður Sjó-
mannasambands Íslands, sagði að
ekkert hefði verið rætt um lög á
verkfallið á fundinum með sjávarút-
vegsráðherra. Hann lýsti hins vegar
mikilli óánægju með samning vél-
stjóra.
„Það er alveg ljóst að vilji okkar
stendur til þess að ná samningum.
Það er það sem við höfum viljað allan
tímann. Ég tel hins vegar að það hafi
verið framin skemmdarverk með
þessari gerð í gærmorgun [í fyrra-
dag]. Það sem mér finnst sárast er að
forystumenn þeirra samtaka sem
luku samningum í gærmorgun hafa
báðir lýst því yfir í fjölmiðlum að þeir
hafi verið að nota gögn Sjómanna-
sambandsins, en þeir hafa annað-
hvort ekki skilið þau eða ekki kunnað
að fara með þau eða vísvitandi snúið
út úr þeim. Samninganefndir þess-
ara aðila hafa ekki lagt nokkurn
skapaðan hlut fram í vinnu við að
leysa þessa deilu. Verið er að mis-
túlka gögn Sjómannasambandsins
og síðan koma þeir fram í fjölmiðlum
og segja að þetta sé úr gögnum Sjó-
mannasambandsins, en fara í reynd
þvert á það sem þar stendur.“
Sævar sagði að Sjómannasam-
bandið væri búið að leggja fram gögn
sem sýndu glögglega fram á að
samningur Vélstjórafélagsins fæli í
sér lækkun launa sjómanna á tiltekn-
um bátum. „Við gerðum ráðherra
grein fyrir því að samningurinn fæli í
sér allt upp í 12% launalækkun í
sumum tilvikum,“ sagði Sævar.
Grétar Mar Jónsson, formaður
Farmanna- og fiskimannasambands-
ins, sagði að á fundinum með sjáv-
arútvegsráðherra hefði verið farið
yfir stöðuna í viðræðunum. „Ráð-
herra er ekki að hóta okkur lagasetn-
ingu. Við fórum einfaldlega yfir stöð-
una.“
Grétar Mar sagði aðspurður að
hann vonaði að ekki yrðu sett lög á
deiluna, en vissulega hefðu sjómenn
alla tíð óttast að stjórnvöld gripu til
þess ráðs að setja lög.
„Við reynum að leita lausnar á
þessari deilu. Við erum einlægir í
þeirri viðleitni okkar þó að útgerð-
armenn segi annað,“ sagði Grétar
Mar.
Forystumenn Sjómannasambandsins og FFSÍ hittu sjávarútvegsráðherra í gær
Ekkert rætt um lög
á kjaradeiluna
Morgunblaðið/Þorkell
Forystumenn sjómanna hittu sjávarútvegsráðherra í gær. F.v. Konráð
Alfreðsson, Hólmgeir Jónsson, Sævar Gunnarsson og Árni Mathiesen.