Morgunblaðið - 24.01.2002, Blaðsíða 6

FRÉTTIR
6 FIMMTUDAGUR 24. JANÚAR 2002 MORGUNBLAÐIÐ
Lágfargjaldaflugfélagið Go mun
ekki fljúga til Íslands næsta sumar,
eins og það hefur gert undanfarin
tvö ár. Meginástæða þess að félagið
hættir áætlunarflugi milli London
og Keflavíkur er sú að lendingar-
gjöld og afgreiðslukostnaður á
Keflavíkurflugvelli er allt of hár fyr-
ir lágfargjaldaflugfélög.
Go útilokar þó ekki að félagið
muni endurskoða flug til Íslands á
næsta ári ef forsendur breytast.
Þetta kemur fram í fréttatilkynn-
ingu sem flugfélagið sendi frá sér í
gær.
Flugfélagið Go flutti alls 61 þús-
und manns til og frá Íslandi síðasta
sumar og voru um tveir þriðju hlut-
ar farþeganna erlendir ferðamenn.
Kostnaður á Keflavíkurflug-
velli hærri en annars staðar
Í fréttatilkynningunni segir að
kostnaðurinn á Keflavíkurflugvelli
sé að jafnaði tvisvar sinnum hærri
en á flestum öðrum flugvöllum sem
Go flýgur til í Evrópu. „Lendingar-
og afgreiðslukostnaður á Keflavík-
urflugvelli er 24% hærri en næst-
dýrasti flugvöllur sem félagið notar.
Afgreiðslukostnaður Flugleiða, sem
hefur annast Go, er sá dýrasti sem
félagið greiðir í Evrópu eða fjórum
sinnum hærri en í München og 2,5
sinnum hærri en í Kaupmanna-
höfn.“
Í fréttatilkynningunni er haft eft-
ir David Melivio, að eins og staðan
sé nú, sé útilokað fyrir flugfélagið að
hagnast á flugi til Íslands vegna
hins mikla kostnaðar á Keflavíkur-
flugvelli. Hann segir að flug til Ís-
lands verði endurskoðað ef kostn-
aðarforsendur breytast.
„Okkur þykir mjög leitt að geta
ekki hafið flug til Íslands í sumar, en
við verðum að halda öllum kostnaði í
algjöru lágmarki til að geta ávallt
boðið lægstu mögulegu fargjöldin.
Þess vegna höfum við ákveðið að
einbeita okkur að þeim áfangastöð-
um þar sem við getum haldið þess-
um kostnaði í lágmarki. Það er krafa
nútíma ferðamannsins,“ segir Mel-
ivio.
Lægstu farmiðarnir frá Íslandi til
London með Go í fyrra kostuðu 15
þúsund krónur fram og til baka.
Kemur á óvart
„Fréttatilkynningin frá Go kemur
mér mjög á óvart því ég veit ekki til
þess að flugfélagið hafi leitað eftir
viðræðum um þessi gjöld,“ segir
Sturla Böðvarsson samgönguráð-
herra. „Það er mjög erfitt fyrir okk-
ur að keppa við stóru flugvellina þar
sem stærðarhagkvæmni hlýtur að
koma fram. Ég hef óskað eftir því
við ferðamálastjóra að hann kanni
þessi mál og gefi mér skýrslu.“
Sturla segir það slæmt þegar
dragi úr sætaframboði til og frá
landinu. „Flugfélögin eru í erfiðri
stöðu og eru að leita allra leiða til að
draga úr kostnaði. Það hefur skipt
heilmiklu máli fyrir okkur að fá
þessa flutninga sem Go hefur staðið
fyrir. Við verðum að sjá hvað setur
og hvort að einhverjir aðrir bætist
ekki þarna í hópinn.“
„Sérkennilegt að blanda
Flugleiðum í ákvörðun Go“
Gylfi Arnbjörnsson, fram-
kvæmdastjóri ASÍ, segir það veru-
legt áhyggjuefni að Go muni ekki
bjóða flugferðir til og frá Íslandi í
sumar. „Samkeppni á þessum mark-
aði hefur verið að þrengjast und-
anfarið og með þessu er verið að
skerða hana enn frekar. Go kom hér
inn á markaðinn fyrir tveimur árum
og hleypti lífi í þessa samkeppni, jók
ferðamöguleika Íslendinga og var
að bjóða mjög hagkvæm fargjöld.
Það er mikilvægt að það séu slíkir
valkostir í boði. Þetta er ekki í
fyrsta skipti sem erlendir aðilar
hætta við að fljúga hingað af þessum
ástæðum. Það verður fróðlegt að sjá
hvernig Flugleiðir munu mæta
þessu en þetta setur verulegan
þrýsting á þá að bjóða ákveðna val-
möguleika. Það hlýtur þó að læðast
að manni sá ótti að þetta komi til
með að hafa áhrif á verðlagninguna.
Þetta hefur áhrif á markaðsaðstæð-
ur sem stjórnvöld hljóta að íhuga.“
Guðjóni Arngrímssyni, upplýs-
ingafulltrúa Flugleiða, finnst sér-
kennilegt að Flugleiðum sé blandað
inn í ákvörðun Go með því að taka
fram í fréttatilkynningunni að af-
greiðslukostnaður Flugleiða sé sá
dýrasti sem Go greiði í Evrópu.
„Dótturfyrirtæki Flugleiða, Flug-
þjónustan Keflavíkurflugvelli, ann-
ast flugafgreiðslu þar ásamt a.m.k.
tveimur öðrum fyrirtækjum, en
þetta er frjáls starfsemi. Go tók til-
boði Flugleiða á sínum tíma og sá
samningur hefur verið eins í grund-
vallaratriðum frá upphafi og af-
greiðslukostnaðurinn verið sá sami
allan tímann. Ef þessi kostnaður er
ástæðan fyrir ákvörðun Go finnst
okkur sérkennilegt að þeir leiti ekki
til annarra sem keppa á þessum
sama markaði.“
Lágfargjaldaflugfélagið Go hefur ákveðið að fljúga ekki til Íslands í sumar
Hár kostnaður á
Keflavíkurflugvelli
helsta ástæðan
– Veit ekki til þess að flugfélagið hafi leitað eftir við-
ræðum um þessi gjöld, segir samgönguráðherra
VAFASÖM samskipti fullorðinna
og barna og unglinga á spjall-
rásum Netsins, hafa vakið við-
brögð dómsmálaráðuneytisins og
fleiri aðila með því að hafið er
átaksverkefnið Öruggt spjall.
Verkefnið, sem er að danskri
fyrirmynd, felst í útgáfu vegg-
spjalds og bæklings með myndum
og varnaðarorðum í þeim tilgangi
að vekja börn, ungmenni og for-
eldra til umhugsunar vegna þeirr-
ar áhættu sem felst í notkun spjall-
rása. Bæklingnum verður dreift í
15 þúsund eintökum til allra
grunnskólabarna í 7., 8., og 9. bekk
á landinu. Veggspjaldinu verður
jafnframt dreift til allra grunn-
skóla og félagsmiðstöðva landsins.
Það kemur ekki til af góðu að
ráðist er í átaksverkefnið, enda
hefur það komið fyrir á liðnum ár-
um, að kynni ungmenna við ókunn-
uga á spjallrásum, sem byrjar með
rabbi, hafi farið úr böndunum svo
úr verða kynferðisbrotamál sem
koma til kasta lögreglu.
„Til okkar hafa leitað aðilar og
aðstandendur þeirra sem hafa lent
í mjög alvarlegum málum vegna
samskipta á spjallrásum. Við höf-
um hrokkið við og vart trúað því
að svona nokkuð væri að gerast,“
segir Geir Jón Þórisson, yfirlög-
regluþjónn í Reykjavík. „Síðan
hefur fólk ekki viljað fylgja málum
eftir með kærum þannig að við
höfum ekki kærumál í gangi í dag.
Eitt mál varðaði ósjálfráða stúlku
sem hafði komist í tengsl við mann
og var leitað af lögreglu þar sem
hún hafði ekki skilað sér á réttan
stað í á annan sólarhring. Með
dómsúrskurði og samvinnu við net-
fyrirtæki gátum við fundið þann
aðila sem stúlkan var í samskiptum
við og fundum hana heima hjá við-
komandi. Það reyndist þó ekki
vera gegn hennar vilja. En við vit-
um um mál af þessu tagi og sum
eru alvarleg.“
Kvartanir ungmenna sem hafa
byrjað að spjalla við ókunnuga á
Netinu en síðan misst tökin á sam-
skiptunum, hafa sumar skilað sér
inn á borð umboðsmanns barna og
þar af ein er alvarleg ábending.
„Sá einstaklingur, sem var ungur
að árum, hafði samband við mig
því hann var orðinn hræddur og
leitaði því ráða,“ segir Þórhildur
Líndal, umboðsmaður barna. „Ég
benti honum á að koma kæru á
framfæri til lögreglunnar. Við-
mælandi hans á Netinu þóttist vera
annars kyns og talsvert yngri og
hélt öðrum staðreyndum leynd-
um.“
Sendi ekki nafn sitt eða
heimilisfang til ókunnugra
Í bæklingnum er brýnt fyrir
börnum og unglingum að senda
ekki nafn sitt, heimilisfang eða
símanúmer til ókunnugra. Sömu-
leiðis er þeim ráðlagt að segja ekki
í hvaða skóla þau séu og senda
ekki myndir af sér eða vinum sín-
um. Þá er þeim ráðlagt að fallast
alls ekki á að hitta ókunnuga, en ef
þau vilja hitta tölvuvin sinn, skulu
þau fá mömmu sína eða einhvern
annan fullorðinn með sér. Ef þau
hræðast tölvuvin eða eru haldin
óvissu, skulu þau tala um það við
einhvern fullorðinn.
Sólveig Pétursdóttir dóms-
málaráðherra segir að að það sé
þekkt að barnaníðingar reyni að
komast í samband við börn á spjall-
rásunum, en með því að fylgja
þeim varúðarreglum sem kynntar
eru í Öruggu spjalli og beint er til
foreldra og barna, geti börn sneitt
hjá þeirri hættu og og átt öruggt
spjall á Netinu. „Notkun Netsins á
Íslandi er mjög almenn og það get-
ur verið til gagns og gamans en
það eru ákveðnar hættur sem ber
að varast, segir Sólveig. „Þess
vegna þarf að beina þessum at-
hugasemdum til barna og ekki síst
til foreldra svo þeir átti sig á því ef
óheppilegt ástand sé að skapast.“
Hún vitnar til rannsóknar
Sunday Times á netnotkun barna
með aðstoð foreldra. Í ljós kom að
65% foreldra uppgötvuðu að börn
sín áttu í samskiptum við ókunn-
uga í gegnum spjallrásir. 10%
barnanna höfðu þá áhuga á að
hitta nýja netkunningjann augliti
til auglits án þess þó að hafa hug-
mynd um hver hann væri í raun og
veru. „Það er alveg ljóst að þarna
getur skapast ákveðið hættuástand
og við höfum orðið vör við nokkur
slík tilvik hér á landi þannig að við
þurfum að vera á varðbergi. En
þetta er þáttur í forvarnarstarfi
sem lögreglan leggur áherslu á að
efla í samstarfi við aðra sem vinna
með börnum og ungmennum.“
Ingibjörg Sólrún Gísladóttir
borgarstjóri hóf átakið formlega á
vef Íslenska menntanetsins, en þar
er að finna myndir af veggspjald-
inu á slóðinni www.ismennt.is/
spjall.
Ingibjörg Sólrún telur mik-
ilvægt að vekja foreldra til vit-
undar um að ýmsir geti villt á sér
heimildir á spjallrásunum og náð
sambandi við börn og unglinga.
„Foreldrar þurfa að kenna börnum
sínum að segja nei þegar verið er
að reyna að nálgast þau með óeðli-
legum hætti, alveg eins og við höf-
um þurft að kenna börnunum okk-
ar að neita því að fara upp í bíl til
ókunnugra. Það þarf að vekja for-
eldra til vitundar um þennan miðil
þar sem er greiður aðgangur að
börnunum þeirra. Börnin þarf þá
að styðja í að setja ákveðin mörk
og leita sér aðstoðar ef á þarf að
halda.“
Til eru gróf dæmi um hvernig
spjall við ókunnuga á Netinu geta
endað með ósköpum. Þeir sem
standa að átaksverkefninu taka
dæmi af 13 ára bandarískri stúlku
sem nýlega var í tölvusambandi við
ókunnugan karlmann. Hún sam-
þykkti að hitta hann og endaði það
með því að hann fór með hana
heim til sín og hlekkjaði hana við
rúmið þar sem hún fannst viku síð-
ar í slæmu ástandi eftir að Alrík-
islögreglunni tókst að rekja tölvu-
samskiptin.
Að Öruggu spjalli standa rík-
islögreglustjórinn, lögreglan í
Reykjavík, Fræðslumiðstöð
Reykjavíkur/Ísmennt, SKÝRR hf.
og umboðsmaður barna.
Átaksverkefnið Öruggt spjall í þágu öryggis barna á Netinu kynnt í gær
Ákveðnar
hættur sem
þarf að var-
ast á Netinu
Unglingar í sjöunda til níunda bekkjar grunnskóla um land allt fá brátt
heilræði varðandi spjall á Netinu.
Morgunblaðið/Júlíus
Haraldur Johannessen ríkislögreglustjóri, Sólveig Pétursdóttir dómsmálaráðaherra og Ingibjörg Sólrún Gísla-
dóttir borgarstjóri á blaðamannafundi í gær þar sem þau kynntu átaksverkefnið.