Fréttablaðið - 28.08.2008, Qupperneq 8

8 28. ágúst 2008 FIMMTUDAGUR
HANDBOLTAHETJURNAR KOMA HEIM
Sannkölluð þjóðhátíðarstemning ríkti í miðbæ
Reykjavíkur í gær þegar ólympíusilfurverðlauna-
hafarnir í handknattleik sneru aftur á Frón eftir
langt ferðalag frá Peking í Kína. Við stutta athöfn á
Kjarvalsstöðum tilkynnti Hanna Birna Kristjáns-
dóttir borgarstjóri meðal annars að settur hefði
verið á fót svokallaður „Silfursjóður“ í nafni
handknattleikslandsliðsins. Sá sjóður hefur það að
markmiði að gefa sem flestum ungmennum
tækifæri til að stunda handknattleiksíþróttina.
Eftir athöfnina á Kjarvalsstöðum var förinni
heitið niður á Skólavörðuholt. Þaðan keyrði liðið í
opnum vagni niður Skólavörðustíg og sem leið lá að
Arnarhóli, þar sem við tók glæsileg dagskrá. Gafst
milli 30 og 40.000 gestum tækifæri á að hylla
silfurstrákana veglega. Valgeir Guðjónsson stýrði
dagskránni af röggsemi og bjó þar til nýjan
málshátt, að gott silfur sé gulli betra.
Náði dagskráin hámarki þegar Valgeir og
hljómsveit, forseti Íslands, ráðherrar ríkisstjórnar-
innar, íslensku ólympíufararnir og allur Arnarhóll
sungu saman lag Valgeirs „Gerum okkar besta“.
Þaðan lá leið liðsins á Bessastaði, þar sem forseti
Íslands veitti leikmönnum fálkaorðuna við hátíðlega
athöfn.
Óhætt er að fullyrða að gærdagurinn verði lengi í
minnum hafður, og óskandi að ekki sé langt að bíða
annars slíks. - kg
Gott silfur gulli betra
VEL AÐ VERKI
STAÐIÐ Valgeir
Guðjónsson kynnti
Loga Geirsson á
svið sem „manninn
með flottasta
hárið og flottasta
hattinn“ og voru
það orð að sönnu.
Hér heilsast Logi
og Stefán Eiríksson
lögreglustjóri að
fornum fimmusið.
FRÉTTABLAÐIÐ/PJETUR
VIÐ GERÐUM OKKAR BESTA Talið er að
milli þrjátíu og fjörutíu þúsund manns
hafi safnast saman í miðbæ Reykjavíkur
til að hylla silfurstrákana. Mikil stemn-
ing myndaðist á Arnarhóli, þar sem
mannfjöldinn tók meðal annars undir
með Valgeiri Guðjónssyni og félögum
í slagaranum sívinsæla „Gerum okkar
besta“. FRÉTTABLAÐIÐ/PJETUR
STOLT ÞJÓÐARINNAR Allir landsliðsmennirnir, auk Einars Þorvarðarsonar framkvæmdastjóra HSÍ, voru sæmdir riddarakrossi
hinnar íslensku fálkaorðu. Þá fengu Ólafur Stefánsson landsliðsfyrirliði, Guðmundur Guðmundsson, þjálfari landsliðsins, og Guð-
mundur Ingvarsson, formaður HSÍ, stórriddarakross. FRÉTTABLAÐIÐ/VALLI
ÞJÓÐHÁTÍÐARSTEMNING Fólki dreif að úr öllum áttum þegar landsliðið hóf för sína
niður Skólavörðustíg í opnum vagni. FRÉTTABLAÐIÐ/STEFÁN
VELKOMNIR HEIM Silfurstrákunum var
vel fagnað þegar þeir lentu á Reykja-
víkurflugvelli eftir langt ferðalag. Ólafur
Stefánsson fyrirliði sagði meðal annars
í stuttri ræðu við Arnarhól að það væri
ótrúleg gjöf að fá að vera Íslendingur, og
að þjóðin ætti að halda ótrauð áfram að
breyta heiminum og vera best.
FRÉTTABLAÐIÐ/ARNÞÓR
ÞOLINMÆÐI ER DYGGÐ Fyrrverandi
borgarstjórar, þeir Ólafur F. Magnússon
og Vilhjálmur Þ. Vilhjálmsson, biðu
spenntir eftir komu landsliðsins á Kjar-
valsstaði. FRÉTTABLAÐIÐ/RÓSA
FAGNAÐARFUNDIR Landsliðsmennirnir
voru í skýjunum yfir að hitta aftur maka
og börn, enda langt um liðið. Hér er
Sigfús Sigurðsson ásamt syni sínum.
FRÉTTABLAÐIÐ/RÓSA
Í SJÖUNDA HIMNI Leikmenn þökkuðu þjálfara sínum, Guðmundi Guðmundssyni, vel
unnin störf með því að tollera hann á sviðinu við Arnarhól. FRÉTTABLAÐIÐ/STEFÁN