Frjáls verslun - 01.03.2006, Blaðsíða 68

68 F R J Á L S V E R S L U N • 3 . T B L . 2 0 0 6
N Ý R F O R M A Ð U R S I
„Samtök iðnaðarins sækjast fyrst og fremst eftir stöð-
ugleika. Það er það sem við teljum að skipti mestu máli í
efnahagslífinu. Hvernig við náum þessum stöðugleika leiðir
okkur að þeim áhyggjum sem við höfum af krónunni, að
hún sé ekki nógu öflugur miðill til að
tryggja okkur stöðugleika. Það er ekki
gott að fá svo miklu sveiflur í gengis-
málum sem við höfum verið að upplifa
á síðustu vikum.“
Á alþingi hafa verið umræður um
hvort við ættum að taka upp evruna
og ganga í Evrópusambandið. Helgi er
spurður hvort evran ein gæti stuðlað að
stöðugleika í atvinnulífinu?
„Umræðan um hvort Íslendingar eigi að ganga í Evr-
ópusambandið hefur verið viðloðandi um árabil. Það að
ganga í ESB er stórt mál sem hefur ýmsa kosti og ýmsa
galla og ekkert verður ákveðið nema sæmileg sátt náist
í þjóðfélaginu og ég tel að þeirri sátt verði ekki náð á
skömmum tíma. Hins vegar gæti það hentað okkur ef við
gætum tekið upp evruna sem gjaldmiðil. Það er að mínu
mati mun minna viðfangsefni og tekur skemmri tíma.
Staðreyndin er að krónan er veikur gjaldmiðill sem getur
valdið vandamálum, ekki aðeins í atvinnulífinu heldur
samfélaginu öllu. Ef krónan verður að slíku vandamáli er
erfitt að bíða með lausn vandans í mörg ár. Þess vegna
finnst mér góðra gjalda vert að það sé skoðað niður í
kjölinn hvort framkvæmanlegt sé að taka upp evru sem
gjaldmiðil án þess að sækja um aðild að ESB.
Valgerður Sverrisdóttir iðnaðarráðherra varpaði þessari
hugmynd fram og kallaði fram mjög hörð viðbrögð. Hafa
ýmsir hreinlega viljað slá hugmyndina út af borðinu og
segja að það standist ekki að tekin sé upp evrumynt án
þess að vera í ESB, á meðan aðrir segja að það sé hugsan-
legt. Ég held að þetta snúist um pólitískan vilja okkar og
viðsemjanda okkar. Ég minni á það að þegar við gengum
í EES á sínum tíma var það ekki sjálfgefið að við gætum
það. Það fór fram umræða í þjóðfélaginu sem leiddi til
þeirrar niðurstöðu að þáverandi ríkisstjórn vildi ná þessum
samningi. Ríkisstjórnin hafði einbeittan vilja, fór af stað,
þrýsti á mótaðilann og náði árangri. Við
vorum með öfluga samningamenn, með
Jón Baldvin Hannibalsson í broddi fylk-
ingar og studdan af Davíð Oddssyni og
öðrum ráðherrum í ríkisstjórn hans. Og
í Brussel var Hannes Hafstein sendiherra
ríkisstjórninni til halds og trausts. Ég vil
trúa að núverandi ríkisstjórn hafi afl til
að ná árangri og iðnaðarráðherra væri
ekki að leggja þetta til nema ríkisstjórnin hefði burði til að
leysa viðfangsefni af þessu tagi. Þetta er spurning um póli-
tískan vilja.“
Spennandi tímar framundan
Helgi segir aðspurður að ekki séu fyrirhugaðar neinar
breytingar á stefnu Samtaka iðnaðarins þótt þrjár breyt-
ingar hafi orðið á stjórn, m.a. formannsskipti: „Þetta er
eðlileg endurnýjun í átta manna stjórn. Samtökin eru
öflug og eru að vinna gott starf. Við gætum hagsmuna
þess breiða hóps sem myndar Samtök iðnaðarins og komi
til hagsmunaárekstra þá er það hlutverk stjórnarinnar
og öflugs hóps sem starfar hjá Samtökum iðnaðarins að
aðstoða við að greiða úr málum á sem farsælastan hátt.
Hvað varðar iðnaðinn í landinu í heild þá eru spennandi
tímar fram undan og miklu varðar hvernig til tekst. Við
höfum verið að fást við óeðlilega sterka krónu, allt of
háa vexti, mikla þenslu og halla á viðskiptum við útlönd.
Á móti kemur mikill hagvöxtur, mikill framkvæmda- og
framfarahugur í þjóðfélaginu og fyrir liggur að það hefur
náðst mikill árangur í atvinnulífinu almennt. Víst er að
enn á eftir að ná utan um breyttar aðstæður á ýmsum
sviðum, en ég trúi því að það muni takast.“
Samtök iðnaðarins sækjast
fyrst og fremst eftir stöðug-
leika. Það er það sem við
teljum að skipti mestu máli
í efnahagslífinu.