Tímarit um menntarannsóknir - 01.01.2007, Blaðsíða 150

148
Tímarit um menntarannsóknir, 4. árgangur 2007
annarra innan skólans, svo sem skólaráðgjafa.
Samt sem áður töluðu allir kennararnir um
mikilvægi tengsla við foreldra. Í orðum eins
kennarans kom fram að hann nyti þess að
vinna með foreldrum og að sú vinna væri
forsenda þess að barni liði vel í skólanum.
Kanadísku kennararnir sögðu að foreldrarnir
væru næmir fyrir viðhorfum og viðurkenningu
samfélagsins, þeir væru oft áhyggjufullir og
hræddir um að barnið þeirra skæri sig úr, og
þeir hefðu það í huga. Kennararnir sögðu
að börnin væru oft mjög dugleg í námi og
metnaðarfull, fjölskyldur þeirra bæru virðingu
fyrir náminu og legðu því að börnum sínum
að standa sig. Foreldrarnir kæmu gjarnan til
Kanada til þess að veita börnum sínum betri
námstækifæri en þeir stæðu frammi fyrir margs
konar erfiðleikum í nýju landi. Þeir fengju
oft ekki störf sem hæfðu menntun þeirra og
væri tungumálið helsta hindrunin. Þetta ástand
einangrar fjölskyldur og virðast mæður eiga
sérstaklega erfitt uppdráttar og oft vera lokaðar
inni á heimilum. Þó kom skýrt fram að fólk
sem flytur til Kanada gengur gjarnan inn í
samfélag þjóðar sinnar í landinu og fær þar
stuðning, annaðhvort frá eigin stórfjölskyldu
eða öðrum í samfélaginu. Þetta er fólkinu
augljóslega afar mikilvægur styrkur.
Í skólunum sex í Noregi kom fram að fyrir
liggur ákveðið skipulag innan skólanna um
hátt samskipta við foreldra. Fjórir kennaranna
töluðu um að haldnir væru reglulegir fundir
að hausti, bæði með foreldrum bekkjarins en
einnig með einkaviðtölum. Með samskiptabók
á að stuðla að gagnkvæmum samskiptum.
Samt sem áður kom fram hjá þessum fjórum
kennurum að tengslin eiga sér einungis stað
með þessum formlega hætti og virtist sem
kennararnir héldu ákveðinni fjarlægð frá
foreldrunum. Í viðtölunum kom fram að
foreldrarnir stæðu oft utan við hefðbundið
samfélag og ætti tungumálið stærstan þátt
í því, sérstaklega virtist þetta eiga við um
mæðurnar. Algengt virtist vera að foreldrarnir
gerðu ekki kröfur til skólans, jafnvel þótt þeir
gerðu kröfur til barna sinna. Tveir kennaranna
sögðust engin samskipti hafa við foreldrana.
Svo virtist sem flestir íslensku kennararnir
sýndu ábyrgðarleysi í samskiptum sínum við
foreldra nemenda. Fjórir kennaranna sögðust
aldrei leita upplýsinga um nemendur hjá
foreldrum og þrír þeirra höfðu engin svör
við spurningum sem vörðuðu samstarf við
foreldra. Foreldraviðtöl voru haldin tvisvar á
ári en ekki virtist vera annað ákveðið skipulag
af hendi skólans á samskiptum kennara og
foreldra. Fjórir kennaranna sögðust ekki hafa
frumkvæði að samskiptum við foreldrana. Þeir
höfðu allir litlar upplýsingar um væntingar
foreldra til skólans, hvernig foreldrar teldu að
börnum þeirra liði í skólanum eða hvort þeir
hefðu áhyggjur af skólagöngu barna sinna.
Einn kennaranna kvaðst hafa mikið og gott
samband við móður nemanda síns og hitta
hana oft í viku þegar hún kæmi í skólann.
Heimanám
Í kanadísku skólunum tveimur er ætlast til sama
heimanáms hjá öllum nemendum hvort sem
þeir eru af erlendum uppruna eða innfæddir.
Kennararnir voru sammála um að það væri upp
og ofan hvort foreldrar veittu börnunum hjálp
við heimanámið, almennt virtust kennararnir
ekki reiða sig á það. Ekki virtist um mikla
heimavinnu að ræða enda sögðu kennararnir
að almennt þýddi lítið að setja meira fyrir í
heimanámi en lestur og létt verkefni, svo sem
réttritunar- eða stafsetningarverkefni.
Í Noregi er lögð töluverð áhersla á heimanám
í skólunum sex sem farið var í. Í flestum
tilvikum er ætlast til daglegs heimanáms og
gjarnan er heimanámið sett fyrir tiltekna daga
eða gerð vinnuáætlun til ákveðins tíma og
nemendur skipuleggja sjálfir hvenær þeir ljúka
vinnu sinni. Sumir kennararnir ætlast til að
foreldrar hjálpi börnum sínum en aðrir sögðust
ekki geta gert kröfu til þess. Þess ber að geta
að í boði er aðstoð við heimanám í skólanum.
Þá kom fram að í einhverjum tilfellum stendur
til boða að móðurmálskennarar fari heim til
nemenda og veiti aðstoð þar við námið.
Í íslensku skólunum þremur er yfirleitt gefin
út heimavinnuáætlun. Nemendur eiga að ljúka
heimanámi fyrir vikulok og foreldrar kvitta
þegar vinnu er lokið. Börn sem eru í skólavistun
Fjölmenningarleg kennsla í Manitoba í Kanada, í Noregi og á Íslandi