Bændablaðið - 28.05.2015, Qupperneq 56

56 Bændablaðið | Fimmtudagur 28. maí 2015
Við hjónin hófum búskap á
Vörðubrún haustið 1998. Við
tókum við af foreldrum Lárusar,
Dvalni Hrafnkelssyni og Fríðu
Pálmars Þorvaldsdóttur.
Höfum breytt litlu en byggðum
360 fermetra stálgrindahús 2004
sem kemur sér vel á köldum vorum.
Býli: Vörðubrún.
Staðsett í sveit: Jökulsárhlíð,
Fljótsdalshéraði.
Ábúendur: Lárus B. Dvalinsson og
Steinunn Snædal.
Fjölskyldustærð (og gæludýra):
Við eigum 4 börn, þau heita Fríða
Pálmars (1998), Dvalinn (2000),
Pálmar (2004) og Auðun (2007).
Stærð jarðar? Stærð jarðar hefur
ekki verið mæld en túnin eru um 50
hektarar.
Gerð bús? Sauðfjárbúskapur.
Fjöldi búfjár og tegundir? 430
vetrarfóðraðar ær, hvítar með horn.
Hvernig gengur hefðbundinn
vinnudagur fyrir sig á bænum?
Dagurinn byrjar á að koma
börnunum í skólann og svo þarf
að sinna rollunum. Yfir hádaginn
er bóndinn eitthvað að bauka í
vélaskemmunni fyrir sjálfan sig og
aðra. Dagurinn endar svo á seinni
gjöf. Þessa dagana eru menn þó
nær öllum stundum í fjárhúsunum
vegna sauðburðar.
Skemmtilegustu/leiðinlegustu
bústörfin? Lárusi finnast
smalamennskurnar og heyskapurinn
án efa skemmtilegustu bústörfin
en leiðinlegast að gera við lélegar
girðingar.
Steinunni finnst heyskapurinn
skemmtilegur (í góðri tíð) en
átakanlega leiðinlegt að rýja og sjá
um gæðastýringar- og rollubókhaldið.
Hvernig sjáið þið búskapinn
fyrir ykkur á jörðinni eftir fimm
ár? Það er ekki stefnt á neinar
breytingar á næstu árum en fénu
gæti hugsanlega fjölgað eitthvað.
Hvaða skoðun hafið þið á
félagsmálum bænda? Erum
sérstaklega ánægð með nýja
framkvæmdastjóra LS.
Hvernig mun íslenskum
landbúnaði vegna í framtíðinni?
Vel, ef tekst að auka nýliðun í
greininni. Það þarf að auðvelda ungu
fólki að byrja búskap og nauðsynlegt
að tryggja netsamband í sveitum
landsins
Hvar teljið þið að helstu tækifærin
séu í útflutningi íslenskra búvara?
Þrátt fyrir einstök gæði íslenska
lambakjötsins þá teljum við að
tækifærin séu í mjólkurvörunum.
Hvað er alltaf til í ísskápnum?
Mjólk, ávextir, tortilla-kökur og
jógúrt.
Hver er vinsælasti maturinn á
heimilinu? Strákarnir segja bjúgun
hans Dvalins afa en við hin grillað
lambakjöt.
Eftirminnilegasta atvikið við
bústörfin? Þegar Lárus fótbraut
sig á fyrsta degi í smalamennskum
síðasta haust, þá kom vel í ljós hvað
við eigum góða vini og ættingja.
Allir tilbúnir að koma og hjálpa til.
Líf og lyst
BÆRINN OKKAR
Kryddlagður kjúklingur og gómsætar lambarifjur
Það er um að gera að prófa sig
áfram með framandi krydd til þess
að breyta til í eldamennskunni.
Hér er ljúffeng kjúklingauppskrift
á norður-afríska vísu þar sem
bragðlaukarnir fá virkilega að
njóta sín.
Lambahrygg er hægt að elda á
fjölbreyttan hátt en nýlega kom á
markað, undir merkjum Iceland
Lamb, nýr biti þar sem búið er að
hreinsa rifin. Fyrir þá sem vilja
minnka fituna á lambakjötinu má
skera hana frá til að hraða elduninni.
En munið að fitan bætir hið frábæra
íslenska lambabragð! Betra er að
gefa sér tíma í eldamennskuna svo
útkoman verði safarík og bragðgóð.
Marokkó kryddlagður kjúklingur
með apríkósum og tómat
› 1–2 stk. litlir kjúklingar
› 6 msk. ólífuolía
› Lítið búnt kóríander
› 1 msk. kúmenfræ
› 1 msk. fennelfræ
› 2 tsk. chilliflögur
› 2 hvítlauksrif
› Börkur og safi af tveimur sítrónum
› 4 msk. púðursykur
› 250 g grískt jógúrt, blandað með 1–2
þráðum af saffran (annars karrí eða
túrmerik til að fá litinn)
Apríkósur og tómatar
› 12 apríkósur, skornar til helminga og
steinhreinsaðar
› 3–5 tómatar (litlir tómatar á grein eru
góðir og fallegir fyrir augað)
› 3 msk. ljóst hunang
› 1 msk. appelsínu safi
› 4 msk. hvítvín edik
Setjið ólífuolíu, kóríander, kúmen,
fennel, chilli, hvítlauk, sítrónubörk
og -safa, púðursykur og nýmulinn
svartan pipar í matvinnsluvél eða
blandara og vinnið í fínt mauk.
Kryddlegið kjúklinginn í 2–48
klst. (fer eftir hvað þú hefur mikinn
undirbúningstíma) í ísskáp, gott að
nota rennilásapoka. Gott er að taka
hryggjarsúluna úr kjúklingnum með
skærum til að minnka eldunartíma.
Hitið grillið og látið logann deyja
út eða hitið ofninn í 220° C. Takið
kjúklinginn úr pokanum og kryddið
vel með salti. Grillið eða steikið
kjúklinginn í 25–30 mínútur á hvorri
hlið þar til hann er stökkur og eldaður
í gegn (70° C í kjarna). Setjið til
hliðar á fat, setjið álpappír lauslega
yfir til að hvíla á meðan þú gerir
apríkósurnar og tómatana. Það tekur
nokkrar mínútur í eldun. Flestir vilja
tómata og apríkósur snöggeldaðar til
að halda ferskleikanum.
Setjið apríkósur í álbakka. Hrærið
appelsínusafa, hunang og edik
saman. Hellið yfir apríkósur og
steikið á grilli, eða setjið í ofninn í
um 10 mínútur þar til þær eru mjúkar
og smá karmellaðar.
Berið kjúklinginn á borð með
jógúrtinu, ávöxtunum og tómat
ásamt góðu salati.
Lambarifjur með grænmetissalati
› 1 framhluti af lambahrygg (8 rif)
› 2 tsk. ólífuolía
› 1 tsk. salt
› 1/4 tsk. svartur pipar
› 2 matskeiðar jurtaolía
› 1 gulrót
› 1 stk. papríka
› 2 hausar rifið salat
› 1/4 fersk lauf að eigin vali, t.d. mynta,
kóríander eða jafnvel villtur kerfill eða
arfi
› Salat dressing að eigin vali, t.d. ólífu-
olía með ediki og appelsínusafa
Gott er að hafa egg, hnetur, góðan
ost eða annað sem fólki finnst gott
að hafa í matmiklu salati.
Undirbúningur
1. Hitið ofninn í 150° C. Nuddið
lambið með 2 tsk. ólífuolíu og
salti og pipar. Látið standa í 10
mínútur fyrir eldun.
2. Brúnið lambakjötið með 2 msk.
af olíu á heitri pönnu (eða grilli)
á háum hita í 8 til 10 mínútur
eða þar til kjötið er brúnað.
Snúið að lágmarki tvisvar
sinnum á meðan. Færið upp
á eldfasta pönnu eða bakka.
Bakið við 150 °C í 20 mínútur
eða þar til kjötið er um 60° C
með hitamæli sem settur er í
þykkasta hlutann (miðlungs)
eða meira ef óskað er eftir
„well done“ (65°C). Fjarlægið
lambið úr ofninum, hyljið með
álpappír og látið standa í 10
mínútur.
3. Á meðan, skerið papriku og
til dæmis gulrót eða annað
grænmeti í mjög þunnar ræmur
með grænmetisflysjara. Bætið í
salati, myntu og gulrót ræmur
með vinaigrette.
4. Skerið lambakjöt á milli
rifja í kótelettur. Berið fram
með salati og olíu, appelsínu
vinaigrette.
MATARKRÓKURINN – BJARNI GUNNAR KRISTINSSON MATREIÐSLUMEISTARI
Vörðubrún
Marokkó kryddlagður kjúklingur. Lambarifjur á salati.