Tímarit hjúkrunarfræðinga - 2015, Side 33
Tímarit hjúkrunarfræðinga – 1. tbl. 91. árg. 2015 29
Sigríður Huld segir alltaf ánægjulegt að útskrifa
nemendur. Ljósmynd: Hilmar Friðjónsson.
Samspil skólans og starfsins geta ekki
verið hvort án annars, það sem maður
lærir í vinnunni er ekki hægt að kenna í
skóla og svo öfugt.“
Sigríður Huld segir að hjúkrunarfræði
byggist að hluta til á nánum persónulegum
samskiptum. „Já, og það reynir ekki
beint á mann í slíkum samskiptum í
skólanum, en að vísu er mikið fjallað um
samskipti og umönnun á námstímanum
og grunnurinn er lagður þar. Og ég vil líka
benda á að samskipti við samstarfsfólk
eru ekki síður mikilvæg en samskiptin við
sjúklinga og aðstandendur.“
Símenntun nauðsynleg
Sigríður Huld segir að stefnan hafi alltaf
verið sett á Fjórðungssjúkrahúsið á
Akureyri að loknu námi við Háskólann á
Akureyri. „Ég fékk vinnu á kvennadeildinni,
líklega sótti ég um að starfa þar vegna
þess að amma mín var ljósmóðir og á
þessum árum var ég farin að gæla við að
fara í slíkt nám. Starfið var í senn fjölbreytt,
skemmtilegt og gefandi og ég naut mín
vel á deildinni. Einn daginn var maður
kannski að hjálpa til á fæðingardeildinni
og hinn daginn á kvensjúkdómadeildinni
þar sem dauðinn var nálægur. Eftir fyrsta
árið í starfi var þó orðið ljóst að ég færi
líklega ekki í ljósmæðranám. Ég ákvað að
fara í kennsluréttindanám við Háskólann
á Akureyri og þar fann ég vel hversu
grunnurinn í hjúkrunarfræðináminu var
gagnlegur. Kennsla og hjúkrun eru á
margan hátt lík, til dæmis eru samskipti
við fólk stór hluti starfsins.“
Eftir að Sigríður Huld hafði aflað sér
kennsluréttinda starfaði hún áfram sem
hjúkrunarfræðingur en sinnti jafnframt
stundakennslu við Háskólann á Akureyri
og Fjórðungssjúkrahúsið á Akureyri.
„Síðan sótti ég um stöðu verkefnastjóra
fræðslumála við sjúkrahúsið og var ráðin,
en það þýddi að ég var ekki eins mikið
við störf á kvennadeildinni. Fræðslusviðið
var enn í mótun á þessum árum en það
sér meðal um námskeið fyrir starfandi
sjúkraliða og hjúkrunarfræðinga auk
þess að skipuleggja námskeið og fleira.
Heilbrigðisstéttir leggja ríka áherslu
á símenntun enda eru framfarir og
breytingar í heilbrigðisgeiranum örar og
þess vegna er nauðsynlegt að símenntun
sé stöðugt í boði. Hjúkrunarfræðingar
eru margir í fjarnámi á tilteknum sviðum
greinarinnar og verkefni fræðslusviðsins
er meðal annars að hvetja starfsfólk til
að stunda slíkt nám. Sjálf er ég á þeirri
skoðun að hjúkrunarfræðingar eigi að
leggja meiri áherslu á klíníska fræðslu
frekar en fræðilega fræðslu. Um þetta eru
reyndar skiptar skoðanir en aðalatriðið
er engu að síður að símenntun er
nauðsynleg. Um það eru allir sammála.“
Gagnast landsbyggðinni
Sigríður Huld segir að hjúkrunarfræðinámið
við Háskólann á Akureyri skipti miklu
máli, ekki aðeins fyrir stéttina heldur fyrir
allt samfélagið. „Starf hjúkrunarfræðinga
hefur tekið breytingum í gegnum tíðina,
verkefni sem hjúkrunarfræðingar sinna
í dag eru orðin fjölbreyttari. Þetta á
við um almenna umönnun, stjórnun og
stefnumótun. Fyrir landsbyggðina er þetta
nám á Akureyri afskaplega mikilvægt
enda sýna tölur að hjúkrunarfræðingar,
sem útskrifast frá Háskólanum á Akureyri,
starfa frekar á landsbyggðinni. Deildin
gagnast þess vegna ekki aðeins Akureyri
og byggðarlögunum hérna fyrir norðan
og ég bendi líka á að deildin býður upp
á fjarnám. Þannig er hjúkrunarfræðinám í
boði á Ísafirði svo dæmi sé tekið.“
Hjúkrunarfræðingurinn stendur
með skólameistaranum
Sigríður Huld ákvað að skipta um starfs
vettvang árið 2006 en þá var hún ráðin
aðstoðarskólameistari Verkmennta
skólans á Akureyri sem er einn stærsti
framhaldsskóli landsins. Nemendur
skólans eru um 1.200. „Ég hafði
kennt svolítið við skólann enda með
kennsluréttindi. Þegar þessi staða var
auglýst ákvað ég að sækja um og var
ráðin. Á þessum árum var farið að tala
um hvaða leiðir væru færar til að breyta
uppbyggingu náms á framhaldsskólastigi
og ég hafði áhuga á að taka þátt í
þeim breytingum. Þegar þú spyrð hvort
breytingin á starfinu hafi verið mikil er
svarið bæði já og nei. Núna er ég til
dæmis laus við vaktavinnuna en hins
vegar er bindingin á margan hátt mun
meiri enda um að ræða stjórnunarstöðu.
Starfið er mjög svo skemmtilegt, rétt eins
og í hjúkrunarfræðinni. Í þessum stéttum
koma oft upp mál sem eru erfið úrlausnar
og snúast um mannleg samskipti. Margt
í starfinu og náminu í hjúkrunarfræðinni
stendur virkilega vel með mér í því sem
ég er að starfa við í dag.“
Sigríður Huld segir ánægjulegt og gefandi
að starfa með æsku landsins sem á
stundum njóti ekki sannmælis meðal
almennings. „Langflestir, sem koma til
okkar, standa sig með ágætum og koma
til með að gera í framtíðinni. Auðvitað á
þetta ekki við um alla, þannig hefur það
alltaf verið. Möguleikar ungs fólks eru
allt aðrir og betri en á árum áður. Að
mínu viti eru framhaldsskólar landsins
framsæknir og bjóða allir upp á gott nám.
Núna er verið að breyta námstímanum til
stúdentsprófs og skiptar skoðanir eru um
þá tilhögun. Sjálf er ég sannfærð um að
stytting námsins sé rökrétt skref og að
námið verði skilvirkara fyrir vikið.“
Hún segir alltaf ánægjulegt að útskrifa
nemendur. „Já, brautskráningin er klár