Tímarit Máls og menningar - 05.06.2001, Blaðsíða 1

bls. 1
Frá ritstjóra
Brynhildur Þórarinsdóttir
Fyrsta tölublað tmm eftir breytingar vakti að vonum mikla athygli og
sannaði kannski það sem Sigurður A. Magnússon, rithöfundur, sagði í
hringborðsumræðu blaðsins: „... við erum ógurlega þrasgjörn.“ Það er
vitaskuld ánægjulegt að sjá að fólk hefur sterkar skoðanir á menning-
arumfjöllun og enn betra að þær skuli vera skiptar. Menningartímarit
sem vekur enga umræðu eða athygli er einfaldlega dæmt til að deyja
drottni sínum.
Annað tölublað breytts tmm er komið út. Tímaritið er lent og
ferðalagið hafið; flugstöðin að baki og grásvört hraunbreiðan, en allur
hringvegurinn er eftir, sveitatroðningar upp til fjalla og hliðargötur í
borginni. Framundan er fjölbreytt landslag þar sem ótal tegundir gróa,
fornar íslenskar hríslur jafnt sem framandi jurtir, sem græða landið og
auðga íslenska flóru. Hér blómstrar að sama skapi fjölbreytt menning,
sprottin af gömlum rótum og aukin af erlendum straumum.
tmm býður í náttúruskoðunarferð í þessu tölublaði. Þorvarður Árnason, náttúrufræðingur, stýrði hringborðsumræðu listamanna og vísindamanna um
náttúrusýn. Anne Brydon, mannfræðingur, fjallar um rannsóknir sínar á sjálfsmynd Íslendinga út frá viðhorfum þeirra til náttúrunnar og Bjarni Hinriksson heiðrar
náttúrufræðinginn Jónas Hallgrímsson með myndasögu.
Náttúran leitar líka á hagfræðinginn Sólmund Kristjánsson en þó í annars konar merkingu. Sólmundur hefur setið með reiknistokkinn og reiknað út kostnað
kynlífsins. Sólmundur leggur kalt mat á kynhvöt mannsins og sýnir um leið að hagfræðin er býsna heimspekilegt fag.
Ragnar Halldórsson, kvikmyndagerðarmaður, svarar grein Ásgríms Sverrissonar um Ara Magg og Leni Riefenstahl úr síðasta tölublaði og heldur áfram að
ræða um frelsi listamanna til að sækja sér hugmyndir í gamlar stefnur og strauma. Slík skoðanaskipti eru undirstaða gagnrýninnar umræðu og áhugavert
innlegg í blaðið.
Annað efni er fjölbreytt. Björn Th. Björnsson rifjar upp hernámsárin, Ármann Jakobsson skrifar fróðlega og skemmtilega grein um Dagfinn dýralækni og
alheimstungumálið. Birt er sigursagan úr smásagnasamkeppni striks.is, fjallað er um Salman Rushdie og nýja bók hans, bítkynslóðin í Bandaríkjunum kemur
við sögu svo og ungir myndlistarmenn á Íslandi sem gerðust innbrotsþjófar eina nótt og uppskáru heilt hús fyrir vikið.
Þetta annað tölublað breytts tmm lítur dagsins ljós í júní. Það er því við hæfi að óska lesendum gleðilegs sumars
og ekki síður, gleðilegrar þjóðhátíðar.
Louisa Matthíasdóttir 1917-2000.
Úr Reykjavík 75x55. © Erfingjar/Myndstef
Búnaðarbankans
Listgluggi
www.bi.is
tmm júní 22x27 Ó 5.6.2001 19:55 Page 1