Litli Bergþór - des. 2017, Blaðsíða 30

30 Litli-Bergþór
Biðlisti í leikskólann. Á fundi byggðaráðs
í lok september kom fram, að farinn er að
myndast biðlisti barna sem óskað er eftir að
fái inni í skólanum. Kannað hafði verið hvort
mögulegt væri að börn á biðlistanum fengju
inni á Flúðum og undirtektir sagðar hafa verið
jákvæðar. Sveitarstjóra var falið að semja við
Hrunamannahrepp vegna þessa.
Miðhúsafréttir. Jóhannes í Múlakaffi festi í haust
kaup á íbúðarhúsinu Miðhúsum 3 og er hann að
gera það upp til nota í ferðaþjónustu sinni, sem
hann stundar m.a. í Úthlíð.
Búfjárgöng voru sett undir þjóðveginn við
Miðhús og Fellskot í september. Eru þau 2,60-
2,80 m í þvermál og því vel mann- og hestgeng.
Á sama tíma voru sett kúagöng undir veginn hjá
Miðdalskoti.
Lyfjafræðingur í Laugarási. Geirþrúður
Sighvatsdóttir, lyfjafræðingur, sneri til baka til
starfa í lyfsölunni í Laugarási þann 1. september,
eftir árs leyfi. Nú býðst viðskiptavinum lyfsölunnar
ekki aðeins að kaupa lyf, heldur einnig að taka þátt
í heimspekilegum vangaveltum um lífið almennt,
jafnvel tilgang þess, enda lagði Geirþrúður stund
á heimspeki í ársleyfi sínu.
Nýr vígslubiskup. Kristján Valur Ingólfsson,
vígslubiskup í Skálholti, átti að láta af störfum
í lok október. Fram fór kosning um eftirmann,
en þar sem enginn þeirra sem í kjöri voru hlaut
meira en helming atkvæða, þarf að kjósa milli
þeirra tveggja sem flest atkvæði hlutu í fyrri
umferð, þeirra Eiríks Jóhannssonar og Kristjáns
Björnssonar. Kristján Valur mun gegna embættinu
eitthvað áfram, eða þar til nýr vígslubiskup tekur
við keflinu.
Orgeltónleikar í Skálholtskirkju. Jón Bjarnason,
organisti í Skálholti, var með orgeltónleika í
hádeginu þrisvar í viku í nóvember, til styrktar
gluggasjóði Skálholtskirkju og til að bjóða gestum
upp á lifandi tónlist.
Bókasafn í Slakka, samkeppni um nafn. Í
byrjun nóvember var opnaður lítill bókakofi fyrir
utan hliðið í Slakka. Hann er alltaf opinn og er
fyrir allan aldur. Hugmyndin að bókakofanum er
til komin vegna þess að eigendum Slakka fannst
yndislegt að það væri aftur komið barnalíf í
Laugarás, en nú eru 17 börn í leik- og grunnskóla
með lögheimili í Laugarási. Fyrir þrem árum var
það aðeins eitt. Slakkafólk vildi búa til einhverja
afþreyingu til að gleðja og auka ánægju íbúanna
og telja tilvalið að fara með börnin í kvöldgöngu,
velja sér bók og lesa í kofanum eða taka með heim.
Síðan er alveg frábært fyrir eldri göngugarpana
að koma við í upphituðum kofanum og glugga í
bók eða íhuga um stund.
Þetta nýja bókasafn eða bókakofi hefur ekki
fengið nafn og því hefur verið blásið til samkeppni
um nafn á kofann/safnið.