Litli Bergþór - des. 2017, Síða 44

44 Litli-Bergþór
Miklaholti bættu úr því og færðu mér þrjár kindur,
sem ég setti inn í Litlu-Brún, lítið hús, sem byggt
var á sama stað og boddýið af vörubílnum hafði
áður staðið. Síðan var ég gjaldkeri fjallskilasjóðs
í 42 ár, meira að segja í þrjú ár eftir að ég flutti á
Selfoss. Og þegar kvótakerfið var sett á, fengum
við 13 kinda kvóta! Frá 2008 hefur Eiríkur
í Gýgjarhólskoti verið gjaldkeri. Ég náði að
vera með þrem kynslóðum frá Bræðratungu í
fjallskilanefndinni, með Skúla, Sveini og Kjartani.
Á öðrum bæjum keyrði ég fyrir þrjá ættliði og
held að ég hafi einhverntíma farið með flutning á
hvern einasta bæ í Tungunum á starfsævinni.
Í hreppsnefndinni var ég í 28 ár. Var næstum
búin að koma Önnu prestsfrú í nefndina árið 1958.
Vantaði bara 2-3 atkvæði uppá að hún kæmist
inn! Ef það hefði tekist, hefði hún orðið fyrsta
konan til að sitja í hreppsnefnd í Tungunum, sem
hefði verið í frásögur færandi. Ég hafði frétt af
því að hún hefði verið að „agitera“ fyrir mig í
kosningunum á undan og næst „agiteraði“ ég því
fyrir henni. Svona gekk það nú fyrir sig! Seinna
var ég í hreppsnefndinni með Þuríði í Vegatungu
og Ágústu í Úthlíð og með Höllu á Vatnsleysu
fyrsta kjörtímabilið eftir að listakosningar byrjuðu
1986. Eftir það hætti ég. Ég gerði það stundum
að gamni mínu fyrir kosningar að sækja fisk á
Eyrabakka til Óskars á Jaðri, sem var í Mjölni,
og selja á bæjunum í sveitinni. Sumir töldu að ég
gæfi fiskinn í áróðursskyni, en það var ekki satt.
Ég tel að það hafi að mörgu leyti verið auðveldara
fyrir mig að sitja í hreppsnefnd og taka þátt í öðru
félagsmálavafstri í Tungunum í öll þessi ár, þar
sem ég átti ekkert skyldfólk í sveitinni.
Eins og ég sagði, var ég yfirleitt gjaldkeri í
þeim félögum sem ég var í. Ég var gjaldkeri í
Ungmennafélaginu þar til ég varð sjötugur, reifst
á hverjum aðalfundi við Sigurjón í Vegatungu um
bókasafnið! Fundarmenn urðu nú að hafa einhver
skemmtiatriði! Ég var gjaldkeri í húsnefnd
Aratungu í níu ár fyrir hreppsnefndina og einnig
gjaldkeri fyrir Reykholtssundlaug. Seldi inn á
sveitaböllin frá um 1975 og þar til þau hættu og
fór yfirleitt síðastur af ballinu. Þá beið lögreglan
stundum eftir mér og lét mig blása, en þeir höfðu
lítið upp úr því. Ég hef alltaf verið bindindismaður!
Ég var í sóknarnefnd Torfastaðakirkju í 12 ár,
sá um að slá garðinn og er minnisstætt þegar ég
heyrði út um glugga í Guðmundi Gíslasyni, sem
þá bjó á Torfastöðum, æfa söng. Það var ágætasta
skemmtun.
Í stjórn sjálfstæðisfélagsins Hugins, sem var
sjálfstæðisfélagið í uppsveitum Árnessýslu,
var ég í 15-16 ár, og að sjálfsögðu gjaldkeri.
Sigurður í Syðra-Langholti og Steinþór á Hæli
voru með mér í þessari stjórn. Í stjórn Veiðifélags
Hvítárvatns var ég kosinn af hreppnefndinni
og var þar með Sveini í Tungu og Guðmundi á
Vatnsleysu. Stjórnin sá um að gera leigusamninga
um veiði í Hvítárvatni og hittist yfirleitt einu sinni
á ári.
Í ritnefnd Bergþórs, blaðs Ungmennafélagsins,
sem var fyrirrennari þessa blaðs sem nú kemur út,
var ég á árunum 1963–1968. Það komu út þrjú
blöð, en þá lognaðist það útaf.
Nú, svo má geta þess að ég var lengi í skólanefnd
barnaskólans í Reykholti og kom þar að því að
semja um skólaaksturinn við bílstjórana þegar
skólaakstur hófst 1967.
Fyrir daga sjónvarpsins var mikið spilað milli
bæja. Spiluð vist og ég man sérstaklega eftir
tilþrifunum hjá Gunnari á Efri-Reykjum. Hann
sagði ekkert nema heila, hálfa eða forhandar
grand! Sveinn í Miklaholti var hinsvegar mikill
nóló-maður. En Ingvar, faðir Gunnars, og Sveinn
voru hálfbræður frá Miklaholti. María Eiríksdóttir,
kona Bjarna Guðmundssonar á Bóli var systir
þeirra. En þau María og Bjarni voru foreldrar
Eiríks frá Bóli (sem var þekktur tónlistarmaður
og hótelhaldari í Hveragerði m.a.) og Sigrúnar,
konu Sigurðar Greipssonar.
Eins og ég sagði, hætti ég að keyra um sjötugt en
var áður byrjaður að vinna á Selfossi á skrifstofu
Mjölnis sem framkvæmdastjóri. Byrjaði þar
þegar ég varð 67 ára árið 1992. Ók í 13 ár ofan
úr Tungum á hverjum degi og til baka aftur,
eða þar til við hjónin seldum Brún og fluttum
á Selfoss árið 2005. Þá hafði ég búið á Syðri-
Hreppsnefnd Biskupstungnahrepps 1974-1978. Talið f.v: Róbert
Róbertsson Brún, Gísli Einarsson oddviti, Kjarnholtum, Sveinn Skúlason
Bræðratungu, Jón Þ. Einarsson Neðradal, Björn Erlendsson Skálholti,
Sigurður Þorsteinsson Heiði og Arnór Karlsson Bóli. Myndin er tekin úr
bókinni „Sunnlenskar byggðir I“ frá árinu 1980.