Borgfirðingabók - 01.12.2012, Page 113

113Borgfirðingabók 2012
Tvær hækur (þríhendur) 12.4. 2007
Ástvinir koma
skrúfa upp koluljósið
í hjarta mínu.
Ástvinir fara.
Það slokknar á kolunni,
hjarta mitt grætur.
Þetta var fallegur dagur - eða hvað?
Hvar eru dagarnir áður en þeir koma?
Jú þeir eru handan sólarupprásarinnar.
Þar leika þeir sér saman,
bíða þess að fá dagstimpil
og verða sendir á vettvang
til þess að lifa einn dag.
Sumir kvíða ferðalaginu,
aðrir eru heppnir og verða dagar
sem fólk hlakkar til að komi
til dæmis laugardagar og sunnudagar
eða frídagar eins og jól og páskar.
Einum er fagnað af þjóðinni allri
og kallaður 17. júní.
Þó eru þeir allir jafn stórir
og eins þegar þeir fæðast.
Allir þessir bræður eiga það sameiginlegt
að vera afmælisdagar sem ákveðnir hópar
bíða eftir með spenningi og væntingum.
Sérhver dagur á sér sín örlög og tækifæri,
sem við mannfólkið getum haft allnokkur áhrif á.
Ósnertur tandurhreinn dagur að morgni
fær sinn dóm að kveldi.
Þetta var fallegur dagur - eða hvað?