Skírnir - 01.09.2008, Side 25

SKÍRNIR
GRÓÐURHÚSAÁHRIF ...
299
að bregðast við; sé jafnvægissvörunin 3°C þarf losun að ná há-
marki innan tíu ára. Ef miðað er við næsta þrep, þ.e. að halda
hlýnun innan við 2.0-2.4 °C frá iðnbyltingu (sem er 1.5-1.9°C í
Töflu ) þarf losun líka að ná hámarki fljótlega, en samdrátturinn
þarf „einungis" að ná um 50% af núverandi losun um miðja öld-
ina.16 Þessu telur IPCC að megi ná með núverandi tækni.
Kýótó-bókunin við fyrrnefndan Rammasamning var gagn-
rýnd fyrir það að hún gengi ekki nógu langt. Bókunin ein hefði
ekki nægt til þess að forðast hættulega röskun á loftslagi, en vænt-
anlega mun arftaki hennar ganga lengra. Hversu langt á að ganga
þyrfti helst að fara eftir jafnvægissvöruninni sem líklega liggur á
bilinu 2.0-4.5°C. Meðan óvissubilið er svona stórt getum við ekki
verið viss um við hvaða jafnvægisstyrk eigi að miða til að forðast
hættulega röskun. í vísindasamfélaginu hefur sá möguleiki verið
ræddur að hafa sveigjanleg mörk sem hægt er að stilla þegar þekk-
ingu fleytir fram. Þó tæknilega sé mögulegt að draga úr losun
nægilega hratt til að ná flestum raunhæfum jafnvægismörkum, er
það ákaflega erfitt viðfangsefni fyrir stefnumótendur að ná saman
um aðgerðir.
Loftslagsbreytingar, réttlæti og siðferði
Loftslagsbreytingar eru viss tegund af kreppu sem skellur á sam-
tímis því sem ýmis önnur umhverfisvandamál ná að verða mjög
alvarleg. Meðal þeirra má nefna ofnýtingu vatnsauðlinda, jarð-
vegseyðingu og mengun. Milliríkjanefndin bendir á að slíkir álags-
þættir geta gert afleiðingar loftslagsbreytinga erfiðari viðfangs.
Þetta getur haft áhrif á framþróun hjá fátækum þjóðum, en nei-
kvæðar afleiðingar loftslagsbreytinga munu bitna harðast á fátæk-
um samfélögum.
Loftlagsbreytingar af mannavöldum eru alþjóðlegt vandamál,
en því fer fjarri að sá gjaldi sem valdi. Losun gróðurhúsaloft-
tegunda á mann er mest meðal olíuframleiðsluríkja og iðnvæddra
16 Sjá þriðja kafla skýrslu vinnuhóps III í Fisher o.fl. (2007:173) í fjórðu úttekt
IPCC.