Skírnir - 01.09.2008, Qupperneq 146
420
ÁSTRÁÐUR OG EYSTEINN
SKÍRNIR
Hannes Sigfússon og Sigfús Daðason, brutu nýjungum braut í
ljóðagerðinni um miðja öldina en atómhugtakið var einnig tengt
tveimur eldri brautryðjendaskáldum, Jóni úr Vör og Steini Stein-
ari. Árið 1950 lét Steinn þessi frægu orð falla í viðtali: „Hið hefð-
bundna ljóðform er nú loksins dautt.“ I sama viðtali var Steinn
spurður um Eliot og svaraði: „Eliot, æ já, nú er ég orðinn þreyttur
á honum, þegar allt kemur til alls er hann bara leiðinlegur, kristinn
hundur. Samt sem áður held ég, að hann sé mikið skáld, og kvæði
hans, The Waste Land er í raun og veru guðspjall tuttugustu aldar-
innar, en það er líka ort hér um bil 30 árum áður en þeir veittu
honum Order of Merit og Nóbelsverðlaunin.“23
Og fleiri töldu greinilega að Eliot væri þýðingarmikill fyrir
atómskáldskapinn á íslandi. Árið 1951 birti Ólafur Halldórsson,
síðar virtur fornritafræðingur, skopkvæði sem hann kallaði „Atóm-
kvæði um T.S. Eliot“ sem hefst á kveinstöfum um hversu erfitt sé
að reyna að skilja Eyðilandið. Með því að nota orð og minni úr
Eyðilandinu er Eliot beinlínis ávarpaður og honum tjáð að hann
skilji við allt þurrt og skrælnað: „þurrt varð mér orðið / er þrum-
aði af vörum þínum.“24 Skopstæling sem þessi kann að vera gagn-
rýnin en hún er líka til vitnis um mikilvægi viðfangsefnisins.
Sumir andstæðingar módernisma töldu greinilega að hjá Eliot
kjarnaðist reynsla lesenda sem væru skildir eftir ringlaðir og þeim
allar bjargir bannaðar þegar reynt væri að rata um atómskáldskap-
inn. Einn þeirra var Kristmann Guðmundsson sem ritaði Heims-
bókmenntasögu í tveimur bindum (1955-56). Þar stendur að Eliot
hafi hlotið Nóbelsverðlaunin fyrir „ljóðagerð, sem er umdeild og
fáir skilja [...] unz svo er komið, að menn spyrja ósjálfrátt, hvort
ekki sé þarna um að ræða einungis nýju fötin keisarans". Síðar
segir Kristmann um Faulkner: „... hann er, eins og T.S. Eliot,
meistari í þeirri íþrótt að skrifa lítt skiljanleg og raunar stundum
alveg óskiljanleg verk.“25
23 Steinn Steinarr: „Hið hefðbunda ljóðform er nú loksins dautt“ [viðtal], Líf og
list, október 1950, bls. 3-5.
24 Ólafur Halldórsson: „Atómkvæði um T.S. Eliot", Líf og list, apríl 1951, bls. 3.
25 Kristmann Guðmundsson: Heimsbókmenntasaga, síðara bindi, Reykjavík:
Bókaútgáfa Menningarsjóðs 1956, bls. 39-40 og 57.