Goðasteinn - 01.06.1977, Side 58

og flestir, sem þar hvíla undir, féllu í valinn á unga aldri fyrir land
og þjóð, í vitfirrtum heimi. Á vegi mínum varð ungur maður, sem
ég réðst í að spyrja til vegar. Hann var langt að kominn eins og
ég, háskólastúdent allar götur sunnan frá Uruguay, en götuna
þekkti hann og grafirnar fann ég. Þær láta ekki mikið yfir sér
enda allir jafnir fyrir dauðanum. Ég hvarf brátt til baka og kom á
hátíðarsvæðið rétt í þann mund, sem byrjaði að slá fölskva á Jóns-
messubálið og fiðlutónarnir voru að deyja út.
Nú leið að lokum veru okkar í Washington. Gestafjöldi var alltaf
h.inn sami. Þorsteinn Ingólfsson kom með fjölskyidu sinni að sjá
atferli okkar og óska okkur fararheilla. Hans G. Andersen scndi-
herra og frú hans létu það einnig vera eitt fyrsta verk sitt eftir
komuna til Washington að heilsa ferðafólkinu frá Islandi.
Ekki get ég skilist svo við Washington að ég minnist ekki á fólkið,
sem á vegi okkar varð. Skoðanir okkar hér heima á hinum almenna
ameríska borgara virðast oft litaðar af áhrifum frétta um afbrot í
einhverri mynd og af áhrifum glæpamynda, sem haldið er að fólki
í kvikmyndahúsum og sjónvarpi. Kynnin af venjulegu fólki þar
vestra eru ákaflega ólík þeirri ranghverfu mannlífs, sem fjölmiðlar
hampa hæst nú í dag. Aldrei hef ég kynnst betra fólki upp til hópa
en á vegi mínum varð þar vestra. Áberandi þættir í fari þess eru
alúð, góðvild, greiðvikni og fýsi tii fróðleiks. Fólk þar vestra er
mun frjálslega í framkomu gagnvart ókunnugum en maður á að
venjast hér að heiman, þar sem samlíkingin um að vera eins og
stunginn upp í hrútshorn virðist geta átt við marga. Hver, sem er,
getur ávarpað þig að fyrra bragði og fyrr en varir er eins og þú
sért að tala við gamlan vin. Menn eru örlátir á góðar óskir: „Have
a nice day, Have a good day“ er venjulegt kveðjuávarp hjá flestum,
sem maður hefur eitthvað saman við að sælda. Við hittum mikinn
fjölda hvítra manna og svartra í Washington og mættum sömu alúð
og vinsemd hjá öllum. „Eitt bros getur dimmu í dagsljós breytt",
sagði Einar Benediktsson-
Mánudaginn 28. júní fengum við með góðra manna tilstilli skoð-
unarferð um borgina. Ung kona ók okkur Islendingunum og Bárði
Jákubsen í bíl sínum um þekkta staði. Við námum sem snöggvast
staðar við grafir Kennedy bræðra. Eldur logar nótt og dag á gröf
56
Goðasteinn