Morgunblaðið - 29.05.2001, Blaðsíða 6

FRÉTTIR
6 ÞRIÐJUDAGUR 29. MAÍ 2001 MORGUNBLAÐIÐ
OPINBER heimsókn forseta Íslands
Ólafs Ragnars Grímssonar til Suður-
fjarða í Suður-Múlasýslu hófst í gær-
morgun á Reyðarfirði þar sem Inger
L. Jónsdóttir, sýslumaður, ásamt
sveitastjórum Breiðdals-, Stöðvar- og
Búðahrepps og Friðmari Gunn-
arssyni, oddvita Fáskrúðsfjarð-
arhrepps, tóku á móti forseta og
fylgdarliði.
Frá Reyðarfirði var haldið að Kol-
freyjustað í Fáskrúðsfirði þar sem
Ingigerður Jónsdóttir formaður
sóknarnefndar og Carlos Ari Ferrer
sóknarprestur sýndu kirkjuna og
greindu frá ríkri sögu þessarar
gömlu kirkju og staðarins. Grunn-
skóli Fáskrúðsfjarðar var því næst
heimsóttur þar sem kennarar og
nemendur skólans og leikskólans
tóku með virktum á móti forsetanum.
Nemendurnir hafa í vetur unnið að
margvíslegum myndlistarverkefnum
þar sem innblástur og efniviður er
sóttur í þjóðsögurnar og náttúru
fjarðarins og vöktu verkin athygli
gestanna. Því næst var litið í heim-
sókn til vistmanna á hjúkrunar- og
dvalarheimili aldraðra í Uppsölum.
Forsetinn skoðaði einnig Loðnu-
bræðsluna á Fáskrúðsfirði undir leið-
sögn Gísla Jónatanssonar kaup-
félagsstjóra og Magnúsar
Ásgrímssonar framkvæmdastjóra.
Færeyskir togarar hafa verið á kol-
munnaveiðum síðustu vikur og land-
að á Fáskrúðsfirði. Það sem af er vori
hefur fimmtán þúsund tonnum af kol-
munna verið landað og var vinnsla
því í fullum gangi í verksmiðjunni í
gær. Loðnubræðslan er mikið tölvu-
vædd og kemur mannshöndin lítið
nærri en Magnús sagði verksmiðjuna
skapa undirstöðu þess að hægt sé að
vinna síld og loðnu til manneldis en
sú vinna skapi mörg störf. Sakir
góðra hafnarskilyrða á Fáskrúðsfirði
sækja sjómenn nú sem fyrr í að landa
úr skipum sínum í höfninni.
Franskir sjómenn settu sem kunn-
ugt er sterkan svip á bæjarlífið þar
sem Fáskrúðsfjörður var aðal-
bækistöð þeirra á Íslandi frá miðri
19. öld til ársins 1914 og voru á þeim
blómatíma allt að 5000 menn að veið-
um í einu og segl hundruða franskra
skútna blöktu á firðinum. Gestirnir
fengu að skyggnast inn í samtvinnaða
sögu Íslendinga og Frakka í heim-
sókn í Templarann þar sem Albert
Eiríksson leiddi gesti um sýninguna
Fransmenn á Íslandi. Þar er að finna
fjölmarga muni sem tengjast Frans-
mönnunum en margar skútur strönd-
uðu við Ísland og voru þá að sögn Al-
berts haldin uppboð á góssinu.
Gott að alast upp í sjávarplássi
Frá Fáskrúðsfirði var haldið yfir í
Stöðvarfjarðarhrepp þar sem
hreppsnefndin tók á móti forseta og
fylgdarliði. Við Grunnskóla Stöðv-
arhrepps beið forsetans fánaborg og
bros á andliti hvers nemenda en börn
frá leikskólanum Balaborg komu
einnig í skólann til að hitta forsetann.
Ólafur Ragnar sagði börnunum að
honum hefði alltaf þótt það mikil
gæfa að hafa alist upp í sjávarplássi í
miklum tengslum við sjóinn og at-
vinnulífið þar sem samheldni íbúanna
væri eftirtektarverð.
Forsetinn lagði í heimsókn sinni
ríka áherslu á að menntun og mann-
auður væri mikilvægasta fjárfesting
hverrar þjóðar sem þyrfti að hlú að.
Hann sagði einnig að þótt íbúum
kynni að finnast á brattann að sækja í
atvinnumálum þá sæi hann þrótt og
dug í byggðarlögunum á Aust-
fjörðum.
Fyrirtækið SMS-fjarvinnsla var
því næst heimsótt en það hefur verið
starfrækt um tveggja ára skeið þar
sem 10 starfsmenn vinna við síma-
sölu. Starfsemin hefur reynst lyfti-
stöng fyrir atvinnulífið í þessu 268
manna byggðarlagi. Sólrún Friðriks-
dóttir leirlistakona og Richard Valt-
ingojer grafíker eru einnig með eigin
atvinnurekstur í myndlistargalleríi
sínu Gallerí Snærós sem var næsti
viðkomustaður. Þau fluttu til Stöðv-
arfjarðar árið 1985 og stofnuðu gall-
eríið þremur árum síðar og var það
þá fyrsta gallerí utan höfuðborg-
arsvæðisins og Akureyrar. Richard
sýndi gestum grafíkpressu sem hann
hannaði en slíkar pressur eru nú
smíðaðar á Stöðvarfirði og notaðar
við myndlistarkennslu víða um land.
Í galleríinu eru eingöngu verk lista-
mannanna tveggja til sýnis.
Skoðaði steinasafnið
á Stöðvarfirði
Forsetinn og fylgdarlið skoðaði
gömlu sóknarkirkjuna í Stöðvarfirði
þar sem séra Gunnlaugur Stefánsson
rakti þætti úr sögu hennar sem nær
allt aftur til ársins 1879. Kirkjan var
afhelguð eftir að ný kirkja var vígð og
henni breytt í gististað undir stjórn
eigenda hússins, þeirra Birgis Al-
bertssonar og Ingibjargar Eyþórs-
dóttur.
Heill ævintýraheimur beið svo
gestanna á næsta viðkomustað,
Steinasafni Petru á Stöðvarfirði.
Petra tók sjálf á móti gestum líkt og
hún er vön og sýndi þeim safnið sem
telur ógrynnin öll af fallegum stein-
um sem Petra hefur safnað á lífsleið-
inni. Sérhver steinn er lítið listaverk
náttúrunnar og er haganlega fyrir
komið í sýningarskápum inni á heim-
ili Petru og í garðinum. Það stirndi á
hvert litbrigði steinanna í rigning-
arúðanum í gær og sagðist Petra að-
spurð varla geta gert upp á milli hver
þeirra henni þætti fallegastur.
„Uppáhaldssteinninn minn er
reyndar úti í garði en hinir eru líka
ósköp ágætir. En það get ég sagt fyr-
ir satt að flestir sem vettlingi geta
valdið hafa hjálpað til við söfnunina,
meira að segja heimiliskötturinn sem
dró eitt sinn keldusvín heim að dyr-
um,“ sagði Petra og kvað samhjálp-
ina ríka í samfélaginu. Spurð hvort
ekki væri senn komið nóg af steinum
svaraði Petra neitandi, hún ætti eftir
að finna mikið meira nýtt, það eina
sem hægt væri að kvarta yfir væri
burðurinn heim í hlað en söfn-
unarferðir Petru skipta eflaust þús-
undum og steinarnir tonnum enda
byrjaði hún að safna þegar í barn-
æsku og kvaðst því fegnust að engum
hefði dottið í hug að fleygja safninu
hennar.
Fjölskylduhátíð
Frá Stöðvarfirði var ekið á Breið-
dalsvík þar sem hreppsnefndin tók á
móti forseta og fylgdarliði. Dagvist
aldraðra í Hrauntúni var heimsótt og
kvöldverður því næst snæddur á
Hótel Bláfelli þar sem Rúnar Björg-
vinsson sveitarstjóri flutti ávarp. Að
kveldi dags var svo boðið til veg-
legrar fjölskylduhátíðar fyrir íbúa
Fáskrúðsfjarðarhrepps, Búða, Stöðv-
arfjarðar og Breiðdalsvíkur í íþrótta-
húsinu á Stöðvarfirði þar sem fjöl-
breytt dagskrá var á boðstólum.
Ólafur Ragnar ávarpaði fjölsótta
samkomuna og þakkaði hlýjar mót-
tókur og skemmtilega dagskrá. Lars
Gunnarsson oddviti og sr. Gunn-
laugur Stefánsson fluttu einnig
ávörp. Samkór Suðurfjarða flutti
söngdagskrá og nemendur úr tónlist-
arskólum byggðarlaganna sáu um
fjölbreyttan tónlistarflutning við góð-
an róm viðstaddra.
Morgunblaðið/GolliHlýtt á tónlist í Grunnskólanum á Stöðvarfirði.
Þróttur og
dugur í byggð-
arlögunum
Ólafur Ragnar Grímsson, forseti Íslands, er
núna í tveggja daga heimsókn á Austur-
landi. Í gær heimsótti hann Fáskrúðsfjörð,
Stöðvarfjörð og Breiðdalsvík.
Fyrsti viðkomustaðurinn var kirkjan á Kolfreyjustað við Fáskrúðsfjörð.
Með forsetanum og heitkonu hans er Carlos Ari Ferrer sóknarprestur.
Petra Sveinsdóttir sýnir forsetanum og heitkonu hans steinana í steina-
garði sínum á Stöðvarfirði.
Opinber heimsókn forseta Íslands í Suður-Múlasýslu
SMÁBÁT með tveimur mönnum inn-
anborðs rak á land í Fáskrúðsfirði í
gærmorgun, eftir að grásleppunet
flækist í skrúfunni með þeim afleið-
ingum að báturinn slóst utan í klett og
skrúfan brotnaði af. Hermann Steins-
son, eigandi Eddu SU-253, segir þá
hafa verið að draga upp net skammt
undan landi við klappir þegar netið
fór aftur fyrir bátinn og flæktist þar í
skrúfunni og báturinn varð stjórnlaus
eftir að skrúfan brotnaði af við
áreksturinn við klettinn.
Að sögn Hermanns stökk félagi
hans, Agnar Sveinsson, í land á klapp-
irnar en sjálfur beið hann í bátnum
sem rak hægt og rólega inn í vík þar
rétt hjá. Þegar báturinn kenndi lands
stökk Hermann út fyrir og óð í land
og þeir félagar settu utan á bátinn
belgi til að verja hann fjörugrjótinu.
„Ég hringdi á bát til að láta draga
okkur, en báturinn var strandaður og
það var farið að fjara það mikið undan
honum að ég þorði ekki að láta draga
hann. Síðan biðum við eftir flóðinu og
fórum heim í millitíðinni áður en við
náðum í hann.“
Að sögn Hermanns er báturinn lít-
ið skemmdur og telur hann þá ekki
hafa verið í umtalsverðri hættu svo
nálægt landi, en meiri hætta hefði
getað verið á ferðum hefði slíkt gerst
fyrir utan land. „Hérna geta menn
alls staðar með góðu móti stokkið í
land.“
Rak á land
þegar net
festist í skrúfu
NÝTT sendiráð Íslands í Austurríki
var formlega opnað í Vín í gær þar
sem áður voru húsakynni fastanefnd-
ar Íslands hjá Öryggis- og samvinnu-
stofnun Evrópu, ÖSE, og stofnunum
Sameinuðu þjóðanna þar í borg. Hall-
dór Ásgrímsson utanríkisráðherra
var viðstaddur opnunina og stóð fyrir
móttöku. Þangað var boðið fulltrúum
erlendra ríkja ásamt Íslendingum bú-
settum í Vín og fulltrúum austurrísks
viðskipta- og menningarlífs.
Í ávarpi Halldórs við opnunina
lagði hann áherslu á hvað samskipti
Íslands og Austurríkis hefðu verið
traust í gegnum tíðina, ekki síst á
menningar- og vísindasviði. Hann
sagði austurríska ferðamenn á Ís-
landi trygga en alls kæmu hingað um
fjögur þúsund manns frá Austurríki
ár hvert.
Einnig lagði utanríkisráðherra
áherslu á það hlutverk sem Austur-
ríki ætlaði sér í Evrópusambandinu
og við stækkun þess til austurs og
jafnvel suðurs. Landfræðilega væri
sendiráðið í Vín vel í sveit sett og mik-
ilvægt fyrir íslenska utanríkisþjón-
ustu.
Ísland vel kynnt
Þórður Ægir Óskarsson er sendi-
herra nýja sendiráðsins í Vín og af-
henti hann forseta Austurríkis,
Thomas Klestil, trúnaðarbréf sitt 7.
maí síðastliðinn. Þórður hefur frá
vormánuðum 1999 verið fastafulltrúi
Íslands hjá ÖSE og stofnunum SÞ í
Vín og þar áður var hann skrifstofu-
stjóri varnarmálaskrifstofu utanrík-
isráðuneytisins í Reykjavík. Hann
hefur starfað í utanríkisþjónustunni
frá árinu 1988. Auk Þórðar eru tveir
starfsmenn sendiráðsins í Vín, þau
Emil Breki Hreggviðsson sendiráðs-
ritari og Sigrún Andrésdóttir ritari.
Þórður sagði við Morgunblaðið að
sendiráðið hefði ýmsum hnöppum að
hneppa og landið væri vel kynnt í
Austurríki. Starfrækt er Íslendinga-
félag í Vín þar sem um 100 manns eru
skráðir og íslenskt-austurrískt vin-
áttufélag telur um 300 meðlimi. Með-
al næstu verkefna sendiráðsins er að-
stoð við heimsmeistaramót íslenska
hestsins sem haldið verður í nágrenni
Vínarborgar í ágúst nk.
Nýtt sendi-
ráð Íslands
opnað í
Austurríki
♦ ♦ ♦