Morgunblaðið - 24.01.2002, Page 12

FRÉTTIR
12 FIMMTUDAGUR 24. JANÚAR 2002 MORGUNBLAÐIÐ
ÞRJÁTÍU og þrír hluthafar í eign-
arhaldsfélagi Dagblaðsins, sem
eiga samtals 20% eignarhlut í fé-
laginu, hafa kært Svein R. Eyjólfs-
son stjórnarformann og aðaleig-
anda félagsins, til ríkislögreglu-
stjóra fyrir meint umboðssvik og
fjárdrátt og brot á lögum um
einkahlutafélög og bókhald. Eign-
arhaldsfélag DB á tæp 50% af
hlutafé í Frjálsri fjölmiðlun sem á
dögunum seldi hlut sinn í dag-
blaðinu DV.
Kæran tengist dómsmáli sem 17
hluthafar í DB höfðuðu á hendur
Sveini vegna deilna um forkaups-
rétt á hlutabréfum í félaginu. Hér-
aðsdómur hafnaði meginkröfum
kærenda, en ógilti jafnframt
ákvarðanir fundarstjóra sem tekn-
ar voru á aðalfundi félagsins 1999.
Kærendur telja að Sveinn hafi
staðið fyrir málamyndagerningi
fyrir aðalfund félagsins árið 2000
til að koma í veg fyrir að tillaga
um rannsókn á félaginu næði fram
að ganga. Komið hafi verið í veg
fyrir að nokkrir hluthafar hafi get-
að greitt atkvæði á fundinum.
Í kærunni saka hluthafarnir
Svein um undanskot þegar fast-
eignir DB voru í desember 1998
seldar til Eigna – rekstrar og ráð-
gjafar ehf. sem var í eigu Sveins.
Um er að ræða Tryggvagötuhúsið,
34% fasteignarinnar Vesturgötu 2,
og DV-húsið í Þverholti 11–13 auk
18% nýbyggingar. Þá kæra hlut-
hafarnir kaup Sveins R. Eyjólfs-
sonar á hlutabréfum sem þeir
segja að hafi verið greidd með
skuldabréfi útgefnu af DB en ekki
verði séð að DB hafi haft neinn
hag af viðskiptunum heldur hafi
Sveinn hyglað sjálfum sér á kostn-
að annarra hluthafa. Þá kæra hlut-
hafarnir Svein fyrir að hafa mis-
notað fjármuni DB í eigin þágu
með því að nota fé félagsins til að
fjármagna starfsemi Hilmis ehf.,
félags á vegum Sveins um Leiru-
bakka í Landsveit.
Í lok kærunnar segir að þessi
brot séu til þess fallin að valda
þessum hluthöfum miklu tjóni og
hafi augljóslega gert það í sumum
tilvikum. Mælst er til þess að rík-
islögreglustjóri rannsaki sérstak-
lega hvort aðrar eignir DB séu
enn til staðar og óveðsettar.
Kæra á hend-
ur stjórnarfor-
manni DB
MORGUNBLAÐINU hefur borist
eftirfarandi yfirlýsing frá Sveini R.
Eyjólfssyni:
„Hinn 26. júní 2000 var kveðinn
upp dómur í Héraðsdómi Reykjavík-
ur í máli, sem nokkrir hluthafar í
Eignarhaldsfélaginu DB ehf. höfð-
uðu gegn mér undirrituðum og eign-
arhaldsfélaginu. Málatilbúnaður
þessara manna byggðist á því, að ég
hefði brotið á þeim rétt við kaup á
hlutabréfum í félaginu og við með-
ferð á fjármálum þess. Skemmst er
frá því að segja, að fjölskipaður hér-
aðsdómurinn sýknaði mig af þessum
kröfum að því er alla efnislega þætti
snerti, þó að fallist hafi verið á, að
ekki hafi að öllu leyti verið gætt
réttra fundarskapa á fundi í félaginu
8. júní 1999. Það hafði þó enga þýð-
ingu fyrir efnisleg skipti aðilanna.
Stefnendur áfrýjuðu ekki þessum
dómi.
Nú, nærfellt 19 mánuðum síðar,
hafa þessir sömu aðilar, eða lögmað-
ur þeirra Gunnar Sturluson hrl., sent
fréttatilkynningu til fjölmiðla, þar
sem þeir segjast hafa sent til Rík-
islögreglustjóra kæru á hendur mér
af sama tilefni og réð málsókninni
forðum. Í fréttatilkynningunni, eins
og hún hefur verið birt í fjölmiðlum,
er sagt frá sakargiftum sem varða
brot á ákvæðum almennra hegning-
arlaga um fjárdrátt og umboðssvik,
auk þess sem fleiri lögbrot eru nefnd
til sögunnar. Þetta er ótrúlegt fram-
ferði manna, sem virðast enn vera í
sárum vegna niðurstöðu dómsmáls-
ins 1999. Þó að meira en eitt og hálft
ár sé nú liðið frá því dómurinn var
upp kveðinn, og ekki hafi heyrst frá
þeim þann tíma, reiða þeir nú hátt til
höggs. Er svo að sjá sem fréttatil-
kynningin sé þeim þýðingarmeiri en
lögreglukæran, að minnsta kosti
hafði ég ekkert af henni heyrt, þegar
fréttirnar voru fluttar. Sýnist til-
gangurinn vera sá að koma höggi á
mig persónulega. Að minnsta kosti
treysta þeir sér ekki til að bíða með
tilkynningar til fjölmiðla, þar til séð
verður um örlög kæru þeirra.
Sakargiftir þessara manna á mínar
hendur eru tilhæfulausar með öllu.
Mun ég freista þess að draga þá til
ábyrgðar fyrir þetta framferði. Þeir
hafa brotið gegn 148. gr. almennra
hegningarlaga, þar sem það er mælt
refsivert að bera fram rangar kærur,
auk þess sem háttsemi þeirra felur í
sér augljósar ærumeiðingar.“
Reykjavík 23. janúar 2002,
Sveinn R. Eyjólfsson.
Yfirlýsing frá Sveini R. Eyjólfssyni
Tilhæfulausar
sakargiftir
 GUNNAR Guðnason varði dokt-
orsritgerð sína við Tækniskóla Dan-
merkur, Danmarks Tekniske Uni-
versitet (DTU), 7. nóvember sl.
Doktorsnám sitt stundaði Gunnar við
upplýsingatæknideild háskólans, sem
nú kallast Örsted DTU. Ritgerðin
ber heitið CMOS Circuit Design for
Biomedical Telemetry og fjallar hún
um hönnun og prófanir stafrænna og
hliðrænna rafrása, sem að hluta til
eru ætlaðar til
ígræðslu í líkama
sjúklinga sem af
einhverjum
ástæðum hafa
skerta líkams-
starfsemi vegna
slysa, lömunar
eða annarra
áfalla.
Aðalleiðbein-
andi Gunnars var Erik Bruun, pró-
fessor við DTU. Andmælendur voru
Tor Sverre Lande prófessor við Ósló-
arháskóla, Ivan Jörgensen Ph.D. frá
Oticon A/S og Ole Hansen prófessor
MIC, DTU.
Ritgerðin greinir frá niðurstöðum
rannsókna, sem gerðar hafa verið
varðandi hönnun hliðrænna samrása
fyrir læknisfræðileg fjarkönn-
unartæki, nánar tiltekið fyrir það
sem á ensku nefnist Functional
Electrical Stimulation og fyrir fjar-
skynjun taugamerkja. Þessi ígræddu
tæki fá alla raforku sína og stýri-
merki með rafsegulbylgjum frá sendi
sem liggur utan líkamans. Með þess-
ari gerð sambands við ytri stjórnstöð
er ekki þörf fyrir leiðslur í gegnum
húðina, en kröfur til orkusparnaðar
aukast jafnframt vegna lélegrar
nýtni.
Í ritgerðinni er greint frá lausnum
sem fundist hafa á mörgum þeim
vandamálum sem setja ígræddum
raftækjum skorður. Sagt er frá rás-
um sem eru að mörgu leyti betri en
þær sem áður hafa þekkst, meðal
annars með tilliti til fjölhæfni og
orkusparnaðar. Þar að auki hefur
verið notuð einföld CMOS fram-
leiðslutækni, andstætt fyrr birtum
lausnum sen nota flóknari fram-
leiðslutækni. Tekist hefur að hanna
rásarhluta sem hægt er að setja sam-
an í fullkomið ígræðanlegt viðtæki,
en jafnframt notar lágmarksfjölda
íhluta utan kísilflögunnar.
Ennfremur er sagt frá hönnun við-
tækja sem eru sérstaklega aðlöguð
kröfum sem stafa af því hvernig
burðarbylgjan er notuð til að flytja
bæði afl og upplýsingar. Að lokum
eru teknar fyrir tvær kerfislausnir,
sem leggja áherslu á það hvernig há-
marka megi afköst ígræddra kerf-
isrása innan þeirra takmarkana sem
þær eru háðar.
Í niðurstöðum dómnefndar var
lögð áhersla á vísindalegt mikilvægi
verkefnisins. Öll framsetning hafi
verið með ágætum og beri vott um
hæfni höfundar og gott vald á þeim
vísindalegu og tæknilegu vanda-
málum, sem við er að etja í sambandi
við ígræddar samrásir. Varnarræðan
hafi verið greinargóð framsetning á
öllum helstu vandamálum sem snerta
verkefnið, og standi allar líkur til að
það verði viðmiðunarverk á sínu sviði.
Gunnar lauk stúdentsprófi frá
Menntaskólanum við Hamrahlíð
1987. Hann lauk BS námi í eðlisfræði
við Háskóla Íslands 1991 og var síðan
eitt ár við framhaldsnám í eðlisfræði
við Kaliforníuháskóla í San Diego.
Hann lauk námi í rafmagnsverkfræði
við DTU í Kaupmannahöfn 1997 en
hóf þá að vinna að doktorsverkefni
sínu við Örsted DTU. Niðurstöður
sínar hefur hann kynnt á nokkrum
fjölþjóðlegum ráðstefnum. Gunnar
hóf störf hjá Nokia Mobile Phones í
Kaupmannahöfn í mars á síðasta ári.
Sambýliskona Gunnars er Sigríð-
ur Hilda Radomirsdóttir rafmagns-
verkfræðingur hjá LM Ericsson í
Kaupmannahöfn. Sonur þeirra er
Egill Milan. Foreldrar Gunnars eru
Guðni G. Sigurðsson Dr.rer. nat.,
eðlisfræðingur og Þóra Th. Hall-
grímsdóttir, leiðsögumaður.
Doktor
í rafmagns-
verkfræði
KALDIR norðaustanvindar hrekja
nú flesta íbúa höfuðborgarsvæð-
isins inn í ylinn innandyra. Iðn-
aðarmönnum sem vinna verk sín ut-
andyra yrði þó lítið úr verki ef þeir
létu smávegis kuldakast á sig fá og
því ekki annað að gera en að búa
sig vel.
Það gerði þessi maður sem var
við vinnu í Salahverfi í Kópavogi
þar sem háhýsin rísa nú hvert af
öðru.
Morgunblaðið/Kristinn
Klæðir af sér kuldakastið
FIMMTÁN framboð bárust vegna
prófkjörs sjálfstæðisfélaganna í
Hafnarfirði, en framboðsfrestur
rann út á mánudagskvöld. Kjörnefnd
félaganna fór yfir framboðin að lokn-
um framboðsfresti.
Í fréttatilkynningu segir að sam-
kvæmt prófkjörsreglum hafi kjör-
nefndin enn heimild til að leita eftir
fleiri frambjóðendum, „en með hlið-
sjón af þeim framboðum sem liggja
fyrir var nefndin sammála um að
ekki væri ástæða til að nýta þessa
heimild nema sérstakt tilefni verði
til.“
Kjörnefnd mun leggja lista próf-
kjörsframbjóðenda fram til sam-
þykktar á fulltrúaráðsfundi nk.
mánudag og þar verða nöfn fram-
bjóðenda í prófkjörinu kynnt. Próf-
kjörið í Hafnarfirði fer fram laug-
ardaginn 16. febrúar.
Fimmtán
framboð
bárust
HAFSTEINN Hafsteinsson, for-
stjóri Landhelgisgæslunnar, segir í
Gæslutíðindum, fréttabréfi Land-
helgisgæslunnar, að ljóst sé að ekki
sé hægt að taka alvarlega tillögu
dómsmálaráðuneytisins um auknar
fjárveitingar til Gæslunnar á síðasta
ári. Fjárframlag til Landhelgisgæsl-
unnar var hækkað um 8 milljónir við
afgreiðslu fjárlaga, en að mati Rík-
isendurskoðunar þarf að hækka
framlagið um 46-80 milljónir.
Hafsteinn vitnar í Gæslutíðindum
í skýrslu Ríkisendurskoðunar frá því
í febrúar 2001, en þar segir að athug-
un á rekstri Landhelgisgæslunnar
hafi leitt í ljós að núverandi fyrir-
komulag rekstrar veiti lítið svigrúm
til sparnaðar. Dregið hafi verið svo
úr umfangi rekstrar í viðleitni til að
halda kostnaði innan fjárheimilda, að
ekki verði komið við frekari sparnaði
án samdráttar í þjónustu eða ein-
hvers konar uppstokkun og breyt-
ingum á rekstrarfyrirkomulagi. Nið-
urstaða Ríkisendurskoðunar er að
48 milljónir vanti að meðaltali á ári
upp á að reglubundnar fjárheimildir
nægi fyrir rekstri stofnunarinnar
miðað við gjöld og tekjur undanfar-
inna ára. Vöntunin er hins vegar 80
milljónir ef aðeins er miðað við
reglubundnar tekjur stofnunarinn-
ar.
Við afgreiðslu fjárlagafrumvarps-
ins gerði dómsmálaráðuneytið til-
lögu um að fjárveitingar til Land-
helgisgæslunnar hækkuðu um 8
milljónir milli ára.
„Það er ljóst að tillaga um 8 millj-
ónir króna er fjarri því að mæta fjár-
þörf Landhelgisgæslunnar. Slíka til-
lögu er engan veginn unnt að taka
alvarlega,“ segir Hafsteinn í Gæslu-
tíðindum.
Ekki sanngjörn gagnrýni
Ingvi Hrafn Óskarsson, aðstoðar-
maður dómsmálaráðherra, sagði að
tillögur Ríkisendurskoðunar hefðu
verið skoðaðar gaumgæfilega í
dómsmálaráðuneytinu. „Dómsmála-
ráðherra hefur fullan hug á því að
vinna að þessu máli á grundvelli
skýrslu Ríkisendurskoðunar. Það er
hins vegar ekki að öllu leyti sann-
gjarnt að gagnrýna ráðuneytið fyrir
fjárveitingar í fjárlögum fyrir yfir-
standandi ár. Eins og menn vita var
mikils aðhalds gætt í fjárlagagerð-
inni á síðasta ári.“
Í fyrirspurnatíma á Alþingi í gær
kom fram í máli Sólveigar Péturs-
dóttur dómsmálaráðherra að hún
áformar að stofna starfshóp til að
fjalla frekar um tillögur Ríkisendur-
skoðunar um fjármál Landhelgis-
gæslunnar.
Forstjóri Landhelgisgæslunnar
Gagnrýnir fjár-
veitingar til Land-
helgisgæslunnar
♦ ♦ ♦
Prófkjör sjálf-
stæðisfélaganna
í Hafnarfirði