Morgunblaðið - 29.04.2003, Blaðsíða 22
LANDIÐ
22 ÞRIÐJUDAGUR 29. APRÍL 2003 MORGUNBLAÐIÐ
STÓRTÆKAR endurbætur hafa
verið gerðar á fjósinu á bænum
Grímshúsum í Aðaldal. Það er Hall-
grímur Óli Guðmundsson bóndi og
fjölskylda hans sem hefur staðið í
miklum framkvæmdum að undan-
förnu og hefur breytt fjósi sínu í 68
kúa legubásafjós auk þess að setja
upp Lely mjaltaþjón sem er sá fyrsti
sinnar tegundar á samlagssvæðinu
austan Vaðlaheiðar.
Það var hinn 10. febrúar sem hafist
var handa og voru allar kýrnar og
geldneytin flutt í eldra fjós að bænum
Árnesi þar sem gripirnir voru hafðir
meðan á framkvæmdunum stóð. Þar
var komið upp bráðabirgðaaðstöðu til
þess að mjólka kýrnar og má segja að
það hafi gengið mjög vel fyrir sig.
Allar gömlu innréttingarnar í fjós-
inu í Grímshúsum voru teknar niður
og þeim hent enda voru þær sumar
orðnar 40 ára og því búnar að gera
sitt gagn. Þá var steypt í gólfið og þar
komið fyrir legubásum og flórsköfu-
kerfum. Þá var og opnað inn í hluta
hlöðunnar og aukið við plássið með
því að setja þar einnig legubása og
færanlegan fóðurgang þar sem kýrn-
ar hafa frjálsan aðgang að heyi þann-
ig að ekki þarf að gefa þeim nema
með nokkurra daga millibili.
Framkvæmdirnar tóku stuttan
tíma og 29. mars voru kýrnar fluttar
aftur heim eftir að endurbótunum
lauk og strax byrjað að mjólka þær
við þessar nýju og gjörbreyttu að-
stæður.
Að sögn ábúenda gengu þessar
breytingar á högum kúnna ótrúlega
vel fyrir sig og flestar hafa vanist vel
þessum nýju mjöltum.
Í mjaltaþjóninum fá kýrnar kjarn-
fóður meðan þær eru mjólkaðar, en
nythæstu kýrnar fá einnig kjarnfóð-
ur í svokölluðum kjarnfóðurbás sem
er staðsettur í miðju lausgöngupláss-
ins. Allar kýrnar hafa hálsband með
númeri og þegar þær koma inn í bás-
inn eru þær skynjaðar á innrauðu
ljósi. Mjaltaþjónninn getur sagt til
um ýmisleg frávik í heilsufari, t.d.
júgurbólgu o.fl. auk þess sem mjólkin
er litgreind með tilliti til blóðs eða
broddmjólkur og eru þær kýr þá
mjólkaðar í sérstakt ílát. Hver speni
er mjólkaður einn og sér og er tekið
af hverjum spena fyrir sig þegar
hann er búinn. Þannig er ekki um
neinar tómmjaltir að ræða sem hefur
mjög jákvæð áhrif á júgurheilsuna.
Í tengslum við mjaltaþjóninn er
eftirlitsmyndavél og ef eitthvað fer
úrskeiðis er hringt til bóndans úr
tölvunni til þess að hægt sé að laga
það.
Allar innréttingar komu frá
Landstólpa ehf., en alla smíðavinnu
sá Trésmiðjan á Rein um, undir verk-
stjórn Sigmars Stefánssonar.
Hallgrímur Óli segist mjög ánægð-
ur með þá nýju fjósgerð sem búið er
að koma upp í Grímshúsum og er
bjartsýnn á framhaldið. Hann er nú
að koma upp kálfafóstru sem fóðrar
mjólkurkálfana og segir að það muni
auðvelda mjög kvíguuppeldið sem
þarf skiljanlega að vera mikið í svo
stóru fjósi og þá ætlar hann einnig að
auka við sig í framleiðslunni til þess
að nýta allt plássið.
Ekki er að sjá annað en að kúnum
líði vel og m.a. hafa þær sérstakan
rafmagnsbursta sem þær geta farið í
til þess að kemba sér sjálfar og er
hann óspart notaður. Þá má geta
þess að kýrnar eru mjög rólegar og
virðast ekki láta ókunnuga trufla sig
en eins og gefur að skilja hefur verið
gestkvæmt í Grímshúsum að undan-
förnu.
Fyrsti mjaltaþjónninn
austan Vaðlaheiðar
Morgunblaðið/Atli Vigfússon
Guðmundur Hallgrímsson, Ingibjörg Stefánsdóttir og Hallgrímur Óli Guð-
mundsson með soninn Stefán Óla hjá nýja mjaltaþjóninum í Grímshúsum.
Laxamýri
JÓN Kristjánsson, heilbrigðis- og
tryggingamálaráðherra, heimsótti
Heilbrigðisstofnun Þingeyinga á
dögunum og tilefnið var afar
ánægjulegt, að sögn Friðfinns Her-
mannssonar, framkvæmdastjóra
stofnunarinnar. Ráðherra staðfesti
með bréfi stefnumótandi áætlun HÞ
um helstu verkefni og áherslur til
næstu þriggja ára. Áætlunin er
gerð í samræmi við samkomulag
heilbrigðis- og tryggingamálaráðu-
neyti-sins og HÞ um árangurs-
stjórnun.
Einnig staðfesti ráðherra með
bréfi þá ákvörðun ráðuneytisins að
ráðstafa 20 milljónum króna af fjár-
lögum til stofnunarinnar. Er það
hækkun á rekstrargrunni stofn-
unarinnar til frambúðar en þetta er
mikil viðurkenning á starfi því sem
hefur verið unnið við stofnunina á
síðustu árum að sögn Friðfinns. Þá
afhenti ráðherra HÞ fjórar millj-
ónir til tækjakaupa.
Þess er líka vert að geta að ný-
lega var ákveðið að veita stofn-
uninni 1,8 milljónir úr fram-
kvæmdasjóði aldraðra til
Garðshorns, endurhæfingar og úti-
vistarsvæðis við stofnunina og hef-
ur ráðherra þegar sent HÞ bréf því
til staðfestingar. Segir Friðfinnur
þetta allt vera mjög ánægjulegt og
skipta miklu máli fyrir framtíð
Heilbrigðisstofnunar Þingeyinga.
Stefnumót-
andi áætlun
staðfest
Húsavík
Morgunblaðið/Hafþór Hreiðarsson
Jón Kristjánsson ásamt Dagbjörtu Þyri Þorvarðardóttur hjúkrunarfor-
stjóra og Friðfinni Hermannssyni, framkvæmdastjóra HÞ.
LOFTORKA í Borgarnesi ætlar að
hefja framleiðslu á risastórum stein-
rörum, sem verða allt að 3 m í þver-
mál. Stærstu rörin sem hingað til
hafa verið framleidd hér á landi eru
um 1.10 m í þvermál og stærri hafa
verið innflutt.
Framkvæmdir standa nú yfir hjá
Loftorku við stækkun verksmiðj-
unnar um helming eða í 5.000 fm.
Með stækkun verksmiðjunnar verð-
ur kleift að steypa og framleiða
stærri rör en áður. Reiknað er með
að verksmiðjan verði tilbúin í ágúst
og nú þegar hafa fyrstu pantanir
borist frá Vegagerðinni sem ætlar að
nota þessi stóru rör í Kolgrafarfjörð.
Jafnframt hefur Loftorka fram-
leiðslu á forspenntum plötum sem
eru kallaðar holplötur. Þeirra helstu
kostir eru að þær eru burðarmeiri
heldur en aðrar forsteyptar plötur
og geta spannað 20 metra án þess að
súlur haldi þeim uppi. Einnig verða
framleiddir forspenntir bitar sem
nýtast í stærri byggingar og brýr.
Konráð Andrésson, forstjóri Loft-
orku, er bjartsýnn á framtíðina og
segir að störfum muni fjölga hjá fyr-
irtækinu um 15. Núverandi starfs-
mannafjöldi er 70 manns og nýir að
bætast við. Hann segist afar heppin
með starfsfólk og eru dæmi um að
menn séu búnir að starfa í Loftorku í
40 ár. Með framleiðslu röra af þess-
ari stærðargráðu eru þeir brautryðj-
endur. Spurður um útflutning svarar
Konráð því til að ekki hafi verið at-
hugað hvað Færeyingar vilji en hann
sjái ekki að verra sé að selja íslenska
steypu til útlanda en hvað annað.
Framleiðslan er viðurkennd vara og
undir stöðugu eftirliti starfsmanna
og Rannsóknarstofnunar byggingar-
iðnaðarins.
Loftorka Borgarnesi ehf. er al-
hliða verktakafyrirtæki á sviði bygg-
ingamannvirkja og sérhæfir sig í
framleiðslu á forsteyptum hlutum úr
steinsteypu, steinsteyptum eining-
um til húsbygginga og steinrör í hol-
ræsi.
Framleiðir rör sem
eru 3 metrar í þvermál
Borgarnes
LÍKT og undanfarin ár voru nem-
endur og starfsfólk Garðyrkjuskóla
ríkisins að Reykjum í Ölfusi með op-
ið hús á sumardaginn fyrsta. Það er
orðin hefð hjá mörgum að koma við
og sjá hvað er að gerast í skólanum
og er talið að um átta þúsund manns
hafi lagt leið sína í skólann í ár. Að
venju var mikið um dýrðir og fengu
gestir vorið „beint í æð“, því alls
staðar voru blóm og fallegar skreyt-
ingar eftir nemendur. Einnig kynntu
allmörg fyrirtæki starfsemi sína.
Dagskráin var fjölbreytt, flutt voru
fræðsluerindi, kynnt var námskeiðið
„Lesið í skóginn – tálgað í tré“ sem
er samvinnuverkefni skólans og
Skógræktar ríkisins. Að ógleymdu
barnahorninu þar sem krakkarnir
gátu útbúið sínar blómaskreytingar,
fengið andlitsmálun og flogið flug-
drekum á útisvæðinu.
Guðni Ágústsson landbúnaðarráð-
herra kom og skrifaði, með gullpenn-
anum sínum, undir samning þess
efnis að Garðyrkjuskólinn fái form-
lega heimild, að uppfylltum tiltekn-
um skilyrðum, til að útskrifa nem-
endur á háskólastigi. Guðni sagði
þetta eina af stærri stundum lífs
síns. Þetta gerði skólanum kleift að
útskrifa nemendur með B.S. gráðu,
sem væri eðlilegt framhald af því
starfi sem í skólanum væri unnið. At-
hygli vakti sú yfirlýsing ráðherra að
hann sagðist vilja flytja Skógræktina
að Mógilsá í Garðyrkjuskólann, selja
eignir þar og nota hagnaðinn í að
byggja upp byggingar Garðyrkju-
skólans. Ráðherra sagði að engum
dyldist að nú yrði að byggja upp og
efla viðhald bygginga sem fyrir eru.
Sagði hann að verið væri að undir-
búa hvernig standa ætti að málum og
myndu línur skýrast á næstu vikum.
„Garðyrkjuskólinn býr í hjarta
þessarar þjóðar,“ sagði landbúnað-
arráðherra.
Garðyrkjuskólinn
verður háskóli
Morgunblaðið/Margret Ísaksdóttir
Guðni Ágústsson landbúnaðar-
ráðherra skrifar undir samninginn
með gullpenna, samningurinn er þá
líklega gulls ígildi.
Hveragerði
NEMENDUR grunnskólans í
Fljótshlíð settu upp ásamt kenn-
urum sínum leiksýningu sem sýnd
var sumardaginn fyrsta í félags-
heimilinu Goðalandi. Fjölmennt
var á leikritinu og því fjarska vel
tekið enda nokkur afar óvænt
aukaatriði sem jafnvel tóku öðru
góðu fram.
Um var að ræða leikgerð nokk-
urra valinna kafla úr Njálssögu,
en leikinn sömdu nemendur sjálfir
í samráði við kennara skólans.
Foreldrar barnanna saumuðu bún-
inga og smíðuðu leiktjöld og leik-
muni. Allir nemendur skólans, 21
talsins, tóku þátt í leikritinu.
Foreldrafélagið annaðist kaffi-
veitingar að leiksýningu lokinni.
Morgunblaðið/Önundur S. Björnsson
Þessir leikarar áttu eftir að skemmta fólki betur en björtustu vonir stóðu til þegar myndin var tekin og það gerðist
með óvæntu „uppistandi“ sem ekki yrði hægt að endurtaka þótt mikið lægi við. Áhorfendur voru fjölmargir.
Vel heppnuð Njálusýning
nemenda Fljótshlíðarskóla
Fljótshlíð