Morgunblaðið - 09.01.2004, Blaðsíða 12

VIÐSKIPTI/ATHAFNALÍF
12 FÖSTUDAGUR 9. JANÚAR 2004 MORGUNBLAÐIÐ
LOÐNUFRYSTING stendur nú
sem hæst og hjá Hraðfrystistöð
Þórshafnar hafa á tæpri viku verið
fryst um 50 tonn, allt á Rússlands-
markað. Unnið er á tólf tíma vöktum
allan sólarhringinn og hefur vantað
meiri mannskap í vinnu, en um átján
manns eru á vakt í einu.
Tíundi bekkur grunnskólans hefur
komið í vinnu um helgar og einnig
hafa þau komið dag og dag eftir há-
degi á virkum dögum en það þykir
ágæt viðbót við skólalærdóminn að
komast í beina snertingu við undir-
stöðuatvinnugrein þjóðarinnar. Í
svona tarnavinnu er oftast líf og fjör
og enginn deyfðarbragur á mann-
skapnum þótt unnið sé næturlangt.
Loðnan sem nú veiðist er fín í
frystingu en kvótinn að verða búinn
og spurning hvað fæst mikill viðbót-
arkvóti en verið er að meta stöðuna.
Mikil vinna í loðnufrystingu
Morgunblaðið/Líney
BÆJARRÁÐ Vesturbyggðar lýsir
algjörri vanþóknun á vinnubrögðum
sjávarútvegsráðuneytisins við út-
hlutun byggðakvóta Vesturbyggðar.
Samkvæmt beiðni ráðuneytisins um
úthlutunina er ljóst að aflaheimildum
er úthlutað til báta sem seldir hafa
verið burt og báta sem ekki landa í
byggðarlaginu.
Þetta kom fram á fundi bæjarráðs
nú í vikunni er kynnt var úthlutun
Fiskistofu á byggðakvóta Vest-
urbyggðar.
Í samþykkt bæjarráðs segir svo:
„Fyrir liggur í skiptingu Fiskistofu,
að úthlutað er til báta sem seldir hafa
verið í burtu frá 1. sept. s.l. 10,5 tonn-
um og ennfremur að öðrum 15 tonn-
um er úthlutað til báta sem alla jafna
leggja ekki upp í Vesturbyggð þó
skráð heimahöfn sé í Vesturbyggð.
Bæjarráð lýsir algjörri vanþóknun á
vinnubrögðum ráðuneytisins en hefði
verið farið að tillögum bæjarstjórnar
Vesturbyggðar hefði öllum byggða-
kvótanum 76 tonnum verið landað í
Vesturbyggð. Með þessari úthlutun
er sjávarútvegsráðuneytið að ganga
þvert á tillögur bæjarstj. Vest-
urbyggðar og gera lítið úr þeirri
vinnu sem bæjarstjórn lagði í úthlut-
unarreglur. Það er sérkennilegt að
sjávarútvegsráðuneytið skuli úthluta
byggðakvóta til Vesturbyggðar á
aðra staði en í Vesturbyggð og styður
þá ekki við atvinnulíf á svæðinu. Það
hlýtur jafnvel sjávarútvegsráðu-
neytið að skilja.“
Vesturbyggð fékk úthlutað 70,6
tonnum samtals.
Lýsir vanþóknun
á vinnubrögðum
ÚR VERINU
GUÐJÓN Arngrímsson, upplýs-
ingafulltrúi Flugleiða, vísar á bug
orðum Ólafs Haukssonar, forstöðu-
manns almannatengsla hjá Iceland
Express, um að Icelandair, dótt-
urfélag Flugleiða, hafi stórskaðað
tekjumyndun sína á síðasta ári
með undirboðum. Þvert á móti
mun ársuppgjör Flugleiða fyrir
síðasta ár sýna hagnað félagsins.
Í viðtali sem birtist við Ólaf og
Jóhannes Georgsson, fram-
kvæmdastjóra Iceland Express, í
viðskiptablaði Morgunblaðsins í
gær kom fram í máli Ólafs að far-
þegafjöldi Iceland Express hafi
verið töluvert umfram áætlanir á
fyrsta rekstrarárinu en tekjur af
hverjum farþega nokkuð undir
áætlunum. „Rekstrarniðurstaðan
er viðunandi, en ljóst er að mikil
undirboð Icelandair á samkeppn-
isleiðunum hafa höggvið skarð í
hagnað Iceland Express. Á móti
vegur að kostnaður við rekstur fyr-
irtækisins var lægri en áætlanir
gerðu ráð fyrir. Ljóst er að und-
irboðum Icelandair er ætlað að
hindra að Iceland Express nái fót-
festu, þótt sú ráðagerð gangi illa.
Áætla má að með undirboðunum
hafi Icelandair hirt 200 milljónir
króna af hagnaði Iceland Express.
Til að ná þeim árangri hefur Ice-
landair þurft að lækka heildar far-
þegatekjur sínar um rúmlega þrjár
milljarða króna. Icelandair er því
farið að stórskaða eigin tekju-
myndun, langt umfram það sem
telja má eðlileg viðbrögð við sam-
keppni,“ að sögn Ólafs í viðtali við
viðskiptablað Morgunblaðsins í
gær.
Skáldaðar sögur
Guðjón segir Ólaf og Jóhannes
hjá Iceland Express hafa sérkenni-
legan áhuga á því í þessu afmæl-
isviðtali að beina talinu frá eigin
rekstri og afkomu. „En skálda þess
í stað sögur um einhver ímynduð
vandræði Icelandair. Staðreyndin
er sú að Flugleiðir munu skila
hagnaði fyrir árið 2003 og árið
gæti orðið það næstbesta í sögu fé-
lagsins. Flugfargjöld fara stöðugt
lækkandi hér á landi sem annars
staðar, við það miðast reksturinn
og gengur vel,“ að sögn Guðjóns.
Hann segir Icelandair stunda
heiðarlega og kröftuga samkeppni
á ferðamarkaðinum hér á Íslandi
líkt og annars staðar. „Samkeppni
virðist hins vegar hafa komið Ice-
land Express í opna skjöldu og það
er beinlínis fyndið þegar fyrirtæki
sem þykist vera lággjaldaflugfélag
ber sig illa undan venjulegri sam-
keppni og kallar hana „undirboð“.
Iceland Express hefur án árangurs
reynt að fá vernd fyrir samkeppni
með því að kæra okkur aftur og
aftur til samkeppnisyfirvalda og
þegar kærum þeirra er hafnað
kalla þeir það klúður hjá Sam-
keppnisstofnun. Það kæmi mér
Guðjón Arngrímsson upplýsingafulltrúi Flugleiða
Reksturinn gengur vel
ekki á óvart að þeir kærðu næst
Icelandair fyrir það eitt að vera
til,“ segir Guðjón.
Skrýtinn feluleikur
Hann segir það greinilegt af við-
tali við forsvarsmenn Iceland Ex-
press að á fyrsta starfsárinu er af-
koma Iceland Express mun verri
en gert var ráð fyrir. „Það er auð-
vitað áhyggjuefni þar sem félagið
er hvorki flugfélag né ferðaskrif-
stofa og hefur því ekki tryggingar
eins og slíkum fyrirtækjum ber. Í
viðtalinu segja þeir að Iceland Ex-
press sé flugfélag, en svo er alls
ekki. Samkvæmt túlkun samgöngu-
ráðuneytisins er í raun um að ræða
áætlunarflug breska félagsins
Astreus. Forráðamenn Astreus
hafa hins vegar sagt í viðtölum að
Astreus sé ekki áætlunarflugfélag,
heldur leiguflugfélag sem eingöngu
fljúgi fyrir ferðaskrifstofur. Þetta
er skrýtinn feluleikur, en vonandi
skýrist þetta allt á endanum.
Hafi Iceland Express þótt sam-
keppnin hörð og erfið á fyrsta
starfsári sínu í fyrra, þá get ég lof-
að neytendum, sem njóta góðs af
henni, að hún verður enn þá harð-
ari á þessu ári. Í þessari sam-
keppni látum við hjá Icelandair
verkin tala og stöndum ekki í karpi
við samkeppnisaðilana. Ég færi
þeim hjá Iceland Express bestu
óskir á afmælisdaginn,“ segir Guð-
jón Arngrímsson.
RÚMLEGA 71% fyrirtækja hyggst halda óbreytt-
um fjölda starfsfólks næstu 3-4 mánuði, samkvæmt
könnun sem Samtök atvinnulífsins gerðu meðal
aðildarfyrirtækja í desember sl. Meðal þeirra sem
svöruðu hyggjast tæp 15% fjölga fólki og rúm 14%
hyggjast fækka fólki. Þetta er lítið breytt mynd
frá því í júní sl., þegar 13% fyrirtækja hugðust
fjölga starfsfólki en 10% hugðust fækka því. Breyt-
ingin er þó talsverð frá því í desember 2002, þegar
21% fyrirtækja hugðist fækka starfsfólki en 8%
hugðust fjölga því. „Þetta kemur nokkuð á óvart í
ljósi þess að flestir gera ráð fyrir nokkuð örum
hagvexti á árinu eða á bilinu 3-3,5%, minnkandi at-
vinnuleysi og aukinni eftirspurn á vinnumarkaði. Í
síðustu haustspá fjármálaráðuneytisins var t.d.
gert ráð fyrir að hlutfallslegt atvinnuleysi minnk-
aði um 0,75% á næsta ári og að mannaflanotkun
ykist um 2.000 ársverk. Þá er mikill munur á þess-
ari niðurstöðu og niðurstöðu könnunar Gallups
fyrir Seðlabankann í september sl. þar sem vísitala
um ráðningaráform fyrirtækja næstu sex mánuði
mældist 134, en hún getur hæst orðið 200 og 100
merkir hvorki fjölgun né fækkun. Fjöldi á atvinnu-
leysisskrá fyrsta virka dag ársins 2004 virðist á
hinn bóginn samræmast þessari niðurstöðu þar
sem hann var 5.267 sem var 72 fleiri en sama dag í
fyrra. Minnkun árstíðaleiðrétts atvinnuleysis virð-
ist því hafa stöðvast,“ að því er segir á vef SA.
Morgunblaðið/Kristján
Samkvæmt könnun SA hyggst rúmlega 71% fyrirtækja halda óbreyttum fjölda starfsfólks á næstunni.
Litlar breytingar á vinnumarkaði
BRESKA verslunarfyrirtækið Big
Food Group, sem rekur matvöru-
verslanirnar Iceland og heildsöluna
Booker, greindi frá því í gær að salan
hefði aukist í þeim verslunum sem
einnig voru til á samanburðartíman-
um um 2% á þrettán vikna tímabili
fram til 26. desember. Er þessi nið-
urstaða í takt við spár á markaði.
Á fimm vikna tímabili fram til 2.
janúar nam söluaukningin 3,2% hjá
samanburðarhæfum verslunum, sem
er nokkuð umfram væntingar. Ice-
land-keðjan, sem átt hefur í rekstr-
arerfiðleikum, jók söluna um 1,9% á
þessu tímabili en um 1,2% á lengra
tímabilinu.
Þessi niðurstaða þykir góð í ljósi
þess að aðeins þrír mánuðir eru liðn-
ir frá því að salan hjá Iceland fór að
aukast allt frá sumrinu 2000, sam-
kvæmt fréttavef Ananova. Þá segir í
frétt Reuters að verð hlutabréfa í
Big Food Group hafi hækkað um
80% á sl. sex mánuðum í kjölfar end-
urskipulagningar á Iceland. Fram-
kvæmdastjóri keðjunnar hefur hins
vegar tilkynnt að hann sé á förum frá
Iceland í september og leit er að
hefjast að eftirmanni hans.
Big Food Group gerði nýlega til-
boð í verslunarkeðjuna Londis og
gengur hart eftir að eignast þá
keðju. Aðrir hafa sýnt Londis áhuga
en álits stjórnar fyrirtækisins á yf-
irtökutilboðum í keðjuna þarf að bíða
a.m.k. til loka febrúar.
Aukin sala
hjá Big
Food Group
GREINING Íslandsbanka hefur
óskað eftir að koma á framfæri leið-
réttingu á afkomuspá sinni sem birt
var í töflu á forsíðu Viðskiptablaðs
Morgunblaðsins í gær. Samkvæmt
Greiningu Íslandsbanka urðu mistök
við gerð spár um afkomu Össurar og
Landsbanka Íslands fyrir árið 2003.
Rétt er spá Greiningar Íslandsbanka
þannig: Hagnaður Össurar fyrir af-
skriftir, EBITDA, 656 milljónir
króna og hagnaður eftir skatta 303
milljónir króna. Spá Greiningar Ís-
landsbanka um hagnað Landsbank-
ans eftir skatta er 3.879 milljónir
króna.
Leiðrétting á spá
Íslandsbanka
FJÁRFESTING Industrivär-
den í Össuri hf. var til umfjöll-
unar í sænska viðskiptablaðinu
Dagens Industri í vikunni.
Sænska fyrirtækið Industrivär-
den er einn helsti fjárfestingar-
sjóður Norðurlanda og á tæp-
lega 16% í Össuri. Sjóðurinn er
því annar stærsti hluthafi Öss-
urar á eftir stofnanda fyrirtæk-
isins Össuri Kristinssyni, sem á
tæplega fjórðungshlut.
Dagens Industri segir að árið
2002 hafi Industrivärden keypt
sig inn í Össur og fjárfestingar-
sjóðurinn hafi með því komið á
réttum tíma inn á íslenska
markaðinn, því markaðurinn
hafi hækkað mikið á síðasta ári.
Valið á Össuri hafi hins vegar
verið það versta sem hugsast
gat, því gengi Össurar hafi
þróast verst allra í Úrvalsvísitöl-
unni og lækkað um rúmlega
19%.
Dagens Industri hefur eftir
Bengt Kjell, sem fer fyrir nýjum
fjárfestingum hjá Industrivär-
den, að skýringarnar á erfiðu
gengi Össurar sé veikur Banda-
ríkjadalur og slæmt ástand á
Bandaríkjamarkaði. Í fyrirtæk-
inu sjálfu séu hins vegar engin
sérstök vandamál. Industrivär-
den fjárfesti til langs tíma og
Össur sé spennandi fyrirtæki
sem muni ná sér á strik.
Órólegir fjárfestar í Indust-
rivärden, sem er skráð félag,
eru í Dagens Industri sagðir
geta huggað sig við að Össur sé
aðeins um 1% af eignasafni fjár-
festingarsjóðsins.
Lækkun
Össurar
til um-
fjöllunar í
Svíþjóð