Morgunblaðið - 16.04.2005, Blaðsíða 4

4 LAUGARDAGUR 16. APRÍL 2005 MORGUNBLAÐIÐ
FRÉTTIR
Skógarhlíð 18, sími 595 1000.
www.heimsferdir.is
Munið Mastercard
ferðaávísunina
Stökktu til
Benidorm
24. apríl í 24 nætur
frá kr. 39.990
Verð kr. 49.990
Flug, skattar, gisting og íslensk fararstjórn.
Stökktu tilboð. M.v. 2 fullorðna
í stúdíó/íbúð. Netverð.
Verð kr. 39.990
Flug, skattar, gisting og íslensk fararstjórn.
Stökktu tilboð. M.v. 2 fullorðna og 2 börn,
2-11, ára í íbúð. Netverð.
Heimsferðir bjóða nú glæsilegt tilboð á síðustu sætunum til Benidorm 24.
apríl í 24 nætur. Beint flug. Þú bókar ferðina og tryggir þér síðustu sætin
og 4 dögum fyrir brottför færðu að vita hvar þú gistir.
ÁRNI Mathiesen sjávarútvegsráðherra hefur
ákveðið að íslenskum skipum verði heimilt að
veiða 157.700 lestir af norsk-íslenskri síld á
þessu ári. Er þetta 14% meira en hlutur Íslend-
inga hefði að óbreyttu verið af heildarkvóta, mið-
að við ráðgjöf Alþjóðahafrannsóknaráðsins, en í
tilkynningu frá sjávarútvegsráðuneytinu kemur
fram að þetta sé gert þar sem engin merki séu
um að Norðmenn ætli að endurskoða einhliða
ákvörðun sína um aflaheimildir í norsk-íslenskri
síld árið 2005.
Norðmenn kröfðust
þess að fá stærri hlut
Í tilkynningu frá sjávarútvegsráðuneytinu seg-
ir, að samkvæmt vísindaráðgjöf frá Alþjóða-
hafrannsóknaráðinu sé lagt til að veiddar verði
890 þúsund lestir alls úr stofninum á yfirstand-
andi ári og sé það í samræmi við langtímastjórn-
un á veiðum úr norsk-íslenska síldarstofninum.
Almennt samkomulag sé meðal þeirra ríkja, sem
eigi hlut í stofninum, um að nota þessa ráðgjöf
sem viðmiðun.
„Samkvæmt þeirri skiptingu sem ríkti á með-
an samningar voru í gildi um stjórn veiða úr
stofninum, var hlutur Íslands 15,54% af leyfileg-
um heildarafla. Samkvæmt því hefði hlutur Ís-
lands orðið 138,300 tonn á þessu ári. Norðmenn
hafa hins vegar ekki viljað fallast á skiptingu
heildarmagnsins á óbreyttum forsendum og
krafist þess að fá stærri hlut en þeir hafa haft
samkvæmt fyrri samningum. Til að fylgja þeirri
kröfu eftir settu þeir sér kvóta fyrir árið 2005
sem er 14% hærri en sá kvóti sem Noregur hefði
fengið samkvæmt fyrri skiptingu. Sjávarútvegs-
ráðherra sendi sjávarútvegsráðherra Noregs
bréf þann 2. mars 2005 þar sem Norðmenn eru
hvattir til að endurskoða ákvörðun sína og bent
er á að ef þeir geri það ekki neyðist Íslendingar
til þess að setja sér hærri kvóta en þeir hefðu
annars gert. Þannig yrði hækkun Íslendinga að
vera í það minnsta til jafns við hækkun Norð-
manna.
Í ljósi þess að ekkert bendir til þess að Norð-
menn muni endurskoða ákvörðun sína um afla-
heimildir í norsk-íslenskri síld árið 2005, þá hef-
ur verið ákveðið, að veiðiheimildir íslenskra
skipa verði 14% hærri en sem nemur 138.300
tonnum og er því íslenskum skipum heimilað að
veiða 157.700 tonn árið 2005,“ segir í tilkynningu
ráðuneytisins.
Veiðiheimildir í norsk-íslenskri
síld auknar einhliða um 14% ÁRNI M. Mathiesen, sjávarútvegs-
ráðherra, segir að hann hafi ekki
fengið viðbrögð frá Noregi við þeirri
ákvörðun að auka veiðiheimildir Ís-
lendinga í norsk-íslensku síldinni um
14%. Ákvörðunin var tekin í ljósi
þess að Norðmenn ákváðu í vetur að
auka sinn hlut um 14%.
Árni sagði, að Norðmenn hefðu
ekki viljað semja við aðra um skipt-
ingu veiðiheimildanna heldur ákveð-
ið sinn kvóta einhliða og þeir gætu
þá ekki haft neitt við það að athuga
að aðrar þjóðir ákvæðu sinn kvóta.
Teldu þeir óhætt að auka veiðarnar
svona mikið þá væri það ágætt.
Ekki liggur fyrir, að sögn Árna,
hvert er verðmæti þess viðbótarafla,
sem ákveðinn hefur verið.
Engin viðbrögð
hafa borist
frá Noregi
HÉRAÐSDÓMUR Reykjaness
sýknaði í gær Vegagerðina af kröf-
um Íslenskra aðalverktaka og
norska fyrirtækisins NCC Inter-
national sem kröfðust þess að við-
urkenndur yrði réttur þeirra til
skaðabóta úr hendi Vegagerðarinn-
ar vegna missis hagnaðar vegna
þeirrar ákvörðunar hennar 8. júlí
2003 að hafna tilboði fyrirtækjanna í
gerð Héðinsfjarðarganga.
Héraðsdómur hafnaði þeirri kröfu
Vegagerðarinnar í málinu að ógilda
úrskurð kærunefndar útboðsmála
frá í ágúst 2003 um að frestun fram-
kvæmda við Héðinsfjarðargöng
hefði verið ólögmæt.
Að mati dómsins hafði Vegagerðin
brotið gegn ákvæðum laga um op-
inber innkaup þegar tilboðum var
hafnað. Ákvörðunin hefði verið póli-
tísk en ekki byggð á málefnalegum
forsendum útboðslýsingar.
Úrskurðarnefndin áleit Vegagerð-
ina skaðabótaskylda gagnvart Ís-
lenskum aðalverktökum og NCC
vegna kostnaðar við að undirbúa til-
boð og taka þátt í útboðinu og gerði
henni að greiða fyrirtækjunum hálfa
milljón króna vegna þess kostnaðar.
Þeirri niðurstöðu vildi Vegagerðin
ennfremur fá hnekkt en án árang-
urs.
Þarf að sýna fram á tjónið
Í dóminum segir að óhjákvæmi-
legt skilyrði málshöfðunar til viður-
kenningar á skaðabótaábyrgð sé að
sá sem krefjist bóta sér til handa
sýni fram á að hann hafi beðið tjón
og hvert tjónið væri þótt ákvörðun
bótafjárhæðar væri látin bíða. Óum-
deilt væri að fyrirtækin tvö hafi ver-
ið með lægsta tilboðið í göngin. Í út-
boðslýsingu komi fram að
samanburður tilboða yrði fjárhags-
legur sem þyrfti ekki endilega að
þýða að það lægsta væri það hag-
stæðasta. Yrði ekki fullyrt um það
miðað við fyrirliggjandi gögn að til-
boð fyrirtækjanna hefði verið það
hagkvæmasta og því hefði verið tek-
ið.
Þar sem öllum tilboðum hafi verið
hafnað hafi ekki reynt á hvort tilboð
Íslenskra aðalverktaka og NCC hafi
verið það hagkvæmasta. Hafi fyrir-
tækin engin haldbær gögn lagt fram
sem sýndu það svo ekki yrði um
villst að tilboð þeirra hefði verið hag-
kvæmast. Þá hefðu þau heldur engin
haldbær gögn lagt fram sem stað-
festu að þau hefðu orðið af hagnaði
vegna frestunarinnar.
Sú fullyrðing þeirra að það felist
og í eðli máls að verktakar áætli sér
alltaf eðlilegan hagnað í tilboði og að
sú staðreynd að boð þeirra hafi verið
3% hærra en kostnaðaráætlun veiti
líkindi fyrir því að hagnaður hefði
orðið umtalsverður væri allsendis
ósönnuð. Enda ekki útilokað að
kostnaðaráætlun hefði ekki staðist ef
á hefði reynt. Yrðu fyrirtækin að
bera hallann af þeim sönnunarskorti.
Málið dæmdi Gréta Baldursdóttir
héraðsdómari. Jóhannes Karl
Sveinsson hrl. flutti málið fyrir ÍAV
og NCC. Einar Karl Hallvarðsson
hrl. flutti málið fyrir Vegagerðina.
Vegagerðin sýknuð af kröfum ÍAV
Engin gögn um
hagnaðarmissi
vegna frestunar
FÉLAGSDÓMUR komst að þeirri
niðurstöðu í gær, að Útgerðar-
félagið Sólbakur hefði brotið gegn
ákvæðum kjarasamninga Lands-
sambands íslenskra útvegsmanna
og Vélstjórafélags Íslands þegar
vélstjórar skipsins fengu ekki 30
klukkustunda hafnarfrí eftir lönd-
un á Eskifirði í september á síðasta
ári.
Útgerðarfélagið Sólbakur krafð-
ist sýknu m.a. á þeirri forsendu, að
ráðningarsamningur vélstjóranna
á Sólbaki EA-7 fæli í sér betri kjör
um hafnarfrí en ákvæði kjara-
samningsins. Þessu hafnaði Fé-
lagsdómur, og sagði að með
ákvæðum ráðningarsamningsins
um hafnarfrí væri ljóst að ákvæð-
um kjarasamningsins um sama
efni hefði í grundvallaratriðum
verið kollvarpað. Að því athuguðu
og þegar litið væri til eðlis þeirra
starfskjara, sem felist í hafnarfrí-
um, þætti naumast efni til saman-
burðar á ákvæðum kjarasamnings-
ins annars vegar og ráðningar-
samningsins hins vegar. Þá hefði
útgerðarfélagið ekki með viðhlít-
andi hætti lagt fram heildstæðan
og markvissan samanburð, heldur
nánast varpað því fram með al-
mennum hætti að ákvæði um hafn-
arfrí samkvæmt ráðningarsamn-
ingnum væru hagstæðari.
Vélstjórafélagið segir í tilkynn-
ingu, að með dómi Félagsdóms sé
því slegið föstu að allir íslenskir út-
gerðarmenn þurfi að tryggja ís-
lenskum sjómönnum lágmarkskjör
samkvæmt ákvæðum hinna al-
mennu kjarasamninga milli sjó-
manna og útvegsmanna. Þeim út-
gerðarmönnum, sem standi utan
samtaka atvinnurekenda, sé ekki
heimilt að semja um lakari kjör við
sjómenn sína en hinir almennu
kjarasamningar greini og breyti
félagsaðild sjómannanna engu í
þeim efnum. Hafi það verið mark-
miðið með stofnun Útgerðarfélags-
ins Sólbaks, að skjóta útgerð fiski-
skipsins Sólbaks EA- 7, undan
skyldubundnum og ófrávíkjanleg-
um ákvæðum kjarasamninga um
frítökurétt sjómanna, þá hafi það
markmið augljóslega ekki náðst.
Útgerð Sólbaks talin hafa
brotið samninga vélstjóra
EKKI liggur fyrir hve margir
hafa skráð sig í Samfylkinguna
síðustu vikurnar, vegna for-
mannskjörs flokksins, en kosn-
ingastjórar frambjóðendanna
giska á að félagsmönnum hafi
fjölgað um nokkur þúsund. Kjör-
skrá var lokað kl. 18 í gær. Flosi
Eiríksson, formaður kjörstjórnar,
segir að kjörstjórnin muni fara
yfir nýskráningar um helgina;
keyra þær saman við þjóðskrá og
skrá þær í flokksskrána. Hann
segir stefnt að því að kjörskrá
verði endanlega staðfest annað
kvöld.
Flosi segir ómögulegt að giska
á hve margir hafi skráð sig í
flokkinn síðustu vikurnar. Miklar
annir hafi þó verið á skrifstofu
flokksins í gær vegna nýskrán-
inga. „Það var straumur af fólki
svo til allan daginn, alveg þar til
kjörskrá var lokað,“ segir hann.
Morgunblaðið/Sverrir
Fólk var að ganga í Samfylkinguna allt fram til klukkan 18 í gær þegar kjörskrá var lokað.
Hafi fjölgað um nokkur þúsund
ÁGÚST Ólafur Ágústsson, þingmað-
ur Samfylkingarinnar, vonast til
þess að þingheimur fái tækifæri til
að greiða atkvæði um frumvarp sitt
um afnám fyrningarfrests í kynferð-
isafbrotum gegn börnum. Frum-
varpið er til meðferðar í allsherjar-
nefnd þingsins.
Ágúst Ólafur segir að það muni
ráðast á næstu dögum eða vikum
hvort frumvarpið fáist afgreitt úr
nefnd. „Ég er bjartsýnn á að þessi
þverpólitíski stuðningur við frum-
varpið skipti þar máli,“ segir hann.
„Ég vil að þingheimur fái tækifæri
til að kjósa um þetta mál í lokaaf-
greiðslu.“ Á ellefta þúsund manns
ritaði nafn sitt undir áskorun for-
varnarverkefnis Ungmennafélags
Íslands, Blátt áfram, til allsherjar-
nefndar Alþingis um að hún afgreiði
frumvarpið fljótt úr nefnd svo þingið
geti tekið afstöðu til þess fyrir þing-
lok í vor.
Þingið greiði atkvæði um frumvarpið