Fréttablaðið - 13.09.2006, Blaðsíða 72

36 13. september 2006 MIÐVIKUDAGUR
sport@frettabladid.is
HANDBOLTI Á heimasíðu Vals má
enn finna nokkur bréf skrifuð af
„Rieg“ og Fréttablaðið hefur einn-
ig undir höndum spjallþráð sem
hefur verið eytt af síðunni en í
honum fer „Rieg“ mikinn. Við
skulum byrja á að draga út nokk-
ur ummæli í þræðinum sem var
eytt en „Rieg“ stofnaði hann 23.
maí 2006, skömmu eftir að Ernir
Hrafn Arnarsson hafði gengið í
raðir Vals. Fram var eitt þeirra
liða sem vildi fá Ernir í sínar
raðir.
„Nú frétti ég að stjórnin bauð
honum (Erni, innsk., blm) gull og
græna skóga á sama tíma og
okkar efnilegustu strákar spila
nánast fyrir skóna og smánarleg-
an bónus. Hvað er verið að meina
með þessu að borga Erni rúmlega
þrisvar sinnum meira en Fannar
og Elvar fá samtals. Þetta kalla
ég ekki að fá til liðsins menn á
réttum forsendum. Svo er algert
lágmark að standa í skilum við þá
leikmenn sem eru hjá okkur áður-
en stórir samningar eru gerðir við
unglinga. [...] Ég tel þetta ekki
rétta vettvanginn til að nefna
tölur nákvæmlega en þetta er
alveg pottþétt svona. Ernir var í
viðræðum við Stjörnuna og faðir
hans gaf sterklega til kynna hvað
hann fengi hjá Val og meira að
segja Stjörnumönnum þótti það
mikið. Ég veit alveg hvað Fannar,
Elvar og Ingvar eru að fá og það er
í engum tengslum við þetta [...]
það er skandall hvernig stjórnin
hefur komið fra við Loutoufi og
það er líka skandall hve seint og
illa vissum leikmönnum hefur
verið greitt. Svo eru menn bara
með stæla þegar núverandi leik-
menn vilja fá smá hækkun. [...]
það er annað sem gerir mig ósátt-
ann. Hvernig Óskar Bjarni kom
fram í Fréttablaðinu þegar til-
kynnt var um Erni. Af ummælum
Óskars að dæma hefur hann mun
meiri trú á þessum Erni heldur en
okkar strákum, sem ég tel að séu
meira efni ef eitthvað er. Enda
kemur þetta fram í samningnum
sem stjórnin gerir við Erni sem er
margfaldur á við aðra samninga
við stráka af svipuðu reyki.“
Þegar þarna er komið við sögu
stígur Örn Franzson, faðir Ernis
Hrafns, inn í umræðuna og
útskýrir sína hlið mála þó honum
sé það ekki að skapi þar sem ásak-
anirnar komi frá manni sem þori
ekki að koma fram undir nafni.
„Rieg“ var fljótur til svars.
„Ég fer ekki ofan af því að
samningurinn hans Ernis er miklu
hærri en hjá öðrum leikmönnum
Vals á svipuðum aldri. [...] svo er
það alveg óþolandi að í hvert
skipti sem einhver Valsmaður
gagnrýnir stjórn félagsins þá er
hann orðinn óvinur. [...] ég get
engann veginn sætt mig við að vel
menntaður maður eins og þú (Örn
Franzson., innsk. blm) skulir
skrifa á spjall okkar Valsmanna
og efast um heilindi mín sem Vals-
manns [....] byrjaði nú á að ganga
í Val og segja af þér sem fjölmiðla-
fulltrúi Aftureldingar áður en þú
kemur á þetta spjall og hraunar
yfir menn sem hafa stutt Val í
gegn súrt og sætt og það án þess
að sonur þeirra sé að fá milljónir í
laun (á samningstímanum). [...]
virðingarfyllst, RIEG, stuðnings-
maður Vals síðan 1981.“
„Rieg“ tjáir sig einnig á spjall-
síðu Vals þegar Baldvin Þor-
steinsson hafði framlengt samn-
ing sinn við Valsmenn.
„Mér finnst nú samt skrítið að
þessi afkomandi kvótagreifa
númer 1 skuli þurfa að fá borgað
frá klúbbi sem veltir minna á ári
en fyrirtæki pabba hans fyrir
hádegi á einum góðum degi. Mér
bara finnst þetta og tel að við
hefðum ekki átt að láta það eftir
Óskari að sleikja upp sloslóðann
eftir hann Baldvin til að fá hann
til baka. Við höfum helling af
ungum ferskum rétthentum Vals-
mönnum sem hafa vanist því að
vinna fyrir hlutunum innan sem
utan vallar.“
- hbg
Hvað skrifaði „Rieg“ á spjallborð Vals?
Talar frjálslega um peningamál leikmanna Valsliðsins
FJARLÆGT Hér sést hluti af svari „Rieg”
til Arnar Franzsonar, föðurs Ernis
Arnarsonar. Stór hluti þessa svars er í
greininni sem fylgir þessari mynd.
AF HVERJU FÆR BALDVIN BORGAÐ?
„Rieg” tjáir sig hér um launamál Bald-
vins Þorsteinssonar.
HANDBOLTI Eins og fram kom í
Fréttablaðinu í gær hefur Geir
Sveinsson, fyrrum landsliðsfyr-
irliði, sakað Hjálmar Vilhjálms-
son, varaformann handknatt-
leiksdeildar Fram, um að fara
huldu höfði á spjallborði Vals-
manna þar sem hann hafi reynt
að skapa óróa með ummælum
sínum og hafi einnig haldið því
fram að hann væri gallharður
Valsari. Sumt af því sem Hjálmar
er ásakaður um að hafa skrifað á
síðunni er það gróft að Valsmenn
urðu að fjarlægja það af síðunni.
Notandi að nafni „Rieg“ á
spjallsíðu Vals var rakinn inn í
fyrirtæki Hjálmars en fram-
kvæmdastjóri fyrirtækisins
segir Hjálmar vera eina manninn
í fyrirtækinu í fyrirtækinu sem
hafi áhuga og vit á handbolta.
Geir heldur því fram að Hjálmar
hafi játað fyrir sér verknaðinn
þegar hann gekk á hann með
málið. Hjálmar vildi ekki ræða
málið við Fréttablaðið en sagði
sögu Geirs ósanna.
Fréttablaðið setti sig í sam-
band við formann Fram, Guð-
mund B. Ólafsson, en Geir gekk á
hans fund á sínum tíma og fór
fram á afsökunarbeiðni frá
Hjálmari fyrir sig og Val.
„Geir Sveinsson talaði við mig
en í sjálfu sér kom ekkert út úr
því. Ég sagði við hann að ef þetta
væri rétt þætti mér það mjög
leitt fyrir hönd félagsins,“ sagði
Guðmundur, sem talaði við
Hjálmar í kjölfarið. „Við rædd-
um saman og það samtal er á
milli okkar. Annars er verið að
bera sakir á Hjálmar og þetta
kemur í sjálfu sér Fram ekkert
við. Ég hef engar sannanir um
eitt eða neitt og Hjálmar verður
að svara því til sjálfur hvort þess-
ar ásakanir séu sannar.“
Guðmundur segir að honum
finnist ekki eðlilegt að menn séu
að tjá sig á öðrum spjallsíðum, en
þeir sem það geri verði að standi
fyrir sínu sjálfir.
„Aðalstjórn félagsins mun
ekkert gera í þessu máli en hand-
knattleiksdeildin hlýtur að ræða
þetta á sínum fundi þar sem um
er að ræða varaformann deildar-
innar. Annars er þetta ekki mál-
efni Fram. Ef Hjálmar er að
skrifa það sem hann er sakaður
um þá er hann að skrifa það per-
sónulega og ekki fyrir hönd
félagsins á neinn hátt. Þannig að
þetta er í sjálfu sér Fram óvið-
komandi,“ sagði Guðmundur.
Kjartan Ragnarsson, formað-
ur handknattleiksdeildar Fram,
vildi lítið tjá sig um málið þegar
eftir því var leitað í gær.
„Ég vísa þessu máli bara á
Hjálmar enda hef ég ekkert
kynnt mér það. Hjálmar hlýtur
að geta svarað fyrir sig,“ sagði
Kjartan en eftir að blaðamaður
hafði kynnt málið fyrir Kjartani
sagði hann: „Mér finnst þetta
ekki stórar ásakanir og málið
ekki stórt. Þetta er alfarið mál
Hjálmars og þú verður að tala við
hann.“
henry@frettabladid.is
Þetta er ekki málefni Fram
Guðmundur B. Ólafsson, formaður Fram, segir deilu Geirs Sveinssonar og Hjálmars Vilhjálmssonar ekki
koma Fram við. Hafi Hjálmar á annað borð gert það sem hann sé sakaður um sé það hans eigið mál enda
hafi hann ekki verið að mæla fyrir hönd félagsins. Formaður handknattleiksdeildar segir málið ekki stórt.
FORMAÐURINN RÓLEGUR Kjartan Ragn-
arsson, formaður handknattleiksdeildar
Fram, segir ásakanirnar í garð varafor-
mannsins ekki merkilegar.
HVAÐ GERIR HJÁLMAR? Hjálmar Vilhjálmsson, varaformaður handknattleiksdeildar
Fram, hefur enn ekki tjáð sig um ásakanir Geirs Sveinssonar í sinn garð. Hann sést
hér í leik með Fram gegn Val fyrir tveim árum síðan.
FORMÚLA Heimsmeistarinn í
formúlu 1, Fernando Alonso,
gagnrýnir Michael Schumacher í
viðtali við spænska blaðið Marca.
„Michael Schumacher er
óheiðarlegasti ökumaðurinn í
sögu Formúlu 1 og sá ökumaður
sem hefur fengið flestar refsing-
ar,“ sagði Alonso.
Alonso, sem er tveimur stigum
á undan Schumacher í keppni
ökumanna, segir einnig að
Schumacher og Ferrari njóti
forréttinda í Formúlu 1. „Það er
mikil pólitík í formúlunni.
Schumacher er sigursælasti
ökumaðurinn í sögu keppninnar
og hefur oft notið góðs af því.
Ferrari-liðið hefur svo oft farið
yfir strikið að það er ólýsanlegt,“
sagði Alonso. - dsd
Fernando Alonso:
Schumacher er
óheiðarlegur
FERNANDO ALONSO Er ekki sáttur við
keppinaut sinn Michael Schumacher og
keppnislið hans, Ferrari.
NORDIC PHOTOS/GETTY IMAGES
Ívar Ingimarsson hefur leikið alla leiki Reading í ensku úrvals-
deildinni á þessari leiktíð og virðist vera búinn að festa sig vel í
sessi hjá liðinu. Ívar skoraði sigurmark Reading á mánudaginn
þegar liðið sigraði Manchester City á heimavelli, 1-0. Markið
skoraði Ívar með skalla en í sömu andrá og hann skallaði
boltann koma varnarmaður Manchester City og
skallaði í höfuð Ívars. Við þetta vankaðist Ívar og
hann segist ekkert muna eftir því að hafa skallað
að marki.
„Varnarmaður þeirra, Distin, var aðeins á eftir
mér og ég veit ekki hvort hann skallaði í
gagnaugað á mér eða hvort öxlin á honum
fór í mig, en ég vankaðist í smá tíma. Ég sá
bara stjörnur en það var mjög fínt að fá að
frétta það eftir á að boltinn hefði farið í mark-
ið. Ég man ekkert eftir að hafa skallað boltann
en svo kom James Harper, liðsfélagi minn, til mín
brosandi og hristi mig til og þá áttaði ég mig á því
hvað hefði gerst,“ sagði Ívar um markið góða.
„Ég er mjög ánægður með þetta. Gott að fá markið, halda
hreinu og fá þrjú stig, þannig að þetta er frábært fyrir okkur.
Okkur veitir ekkert af því að fá eins mörg stig og við getum
fengið,“ sagði Ívar.
Reading hefur nú fengið sex stig úr fyrstu fjórum leikjunum
og Ívar er nokkuð sáttur við þá byrjun. „Byrjunin hefur
bara verið ágæt og að vera komnir með sex stig eftir
fjóra leiki er bara nokkuð gott. Það skiptir gríðarlega
miklu máli að byrja vel í þessari deild og við höfum
núna unnið báða okkar heimaleiki en tapað báðum
útileikjunum. Vonandi förum við bara að ná í stig á
útivelli líka,“ sagði Ívar og bætti því við að markmið
Reading væri að halda sæti sínu í deildinni. „Mark-
miðið er að halda sætinu í deildinni og að gera
það vel. Eftir gott tímabil í fyrra er sjálfstraustið
mjög gott í liðinu en við vitum alveg að við erum í
úrvalsdeild núna og það er erfiðara.“
ÍVAR INGIMARSSON: SKORAÐI SITT FYRSTA ÚRVALSDEILDARMARK Á MÁNUDAGINN Í SIGURLEIK READING
Man ekki eftir að hafa skallað boltann
Ísland mætir Lúxemburg í kvöld
Íslenska landsliðið í körfubolta mætir í kvöld Lúxemburg
í B-deild Evrópukeppninni en leikurinn verður í Keflavík.
Ísland hefur ekki riðið feitum hesti frá þeim tveimur leikj-
um sem liðið hefur leikið til þessa. Ísland
tapaði fyrir Finnum á heimavelli fyrir
viku síðan og um síðustu helgina tapaði
íslenska liðið fyrir Georgíu ytra. Leikurinn
í kvöld er því gríðarlega mikilvægur og
óhætt er að segja að ef þessi leikur
tapist sé öll nótt úti. Lúxemborgarar hafa
sömuleiðis tapað báðum sínum leikjum
til þessa. Leikurinn er því gríðarlega þýð-
ingarmikill fyrir íslenska liðið. Leikurinn
er eins og áður sagði í Keflavík og hefst
hann kl. 20.00. Fjölmennum nú á leikinn
og hvetjum strákana okkar til sigurs.