Fréttablaðið - 28.08.2008, Qupperneq 38

28. ÁGÚST 2008 FIMMTUDAGUR2 ● fréttablaðið ● í túninu heima
Mosfellsbær er einstakur bær. Fallegt bæjarstæði, fellin, árnar og nátt-
úran mynda bæjarumgjörð sem er öfundsverð enda hefur bærinn vaxið
einna hraðast allra bæjarfélaga á landinu síðastliðinn áratug. Á árunum
1997 til 2007 fjölgaði íbúum í Mosfellsbæ um hvorki meira né minna
en 57 prósent, úr um 5.200 íbúum í um 8.200 sem er nánast einsdæmi á
landsvísu.
Ástæðan hlýtur að vera sú að í Mosfellsbæ líður fólki vel. Að minnsta
kosti halda íbúar því fram. Þeir sem velja að búa í Mosfellsbæ gera það
af þeim ástæðum að bærinn uppfyllir óskir þeirra og kemur til móts við
þær kröfur sem nýir og gamlir íbúar gera til bæjarins. Í uppgangnum á
höfuðborgarsvæðinu á undanförnum árum hafa bæjarfélög keppt sín á
milli um að laða til sín íbúa því auðvitað fylgir íbúafjölgun ákveðin hag-
ræðing fyrir bæjarfélögin og tækifæri til að bæta þjónustuna og auka
gæðin. Hlutfallslega flestir hafa komist að þeirri niðurstöðu að Mosfells-
bær sé það bæjarfélag sem eftirsóknarverðast er að búa í. Hér er þjón-
usta við íbúa til fyrirmyndar og aðstaða mjög góð. Möguleikar til útivist-
ar eru óþrjótandi enda nálægðin við ósnortna náttúru mikil og útivistar-
svæði innan bæjarmarkanna mörg og göngu-, hjóla- og reiðstíganetið
á vart sinn líka. Barnafjölskyldur velja að búa hér meðal annars vegna
þeirrar ríku áherslu sem lögð hefur verið á skólamál. Mikill metnaður
hefur verið lagður í að móta framsækna skólastefnu sem hæfir þörfum
nútímaþjóðfélags og hafa tveir nýir grunnskólar hafið göngu sína í Mos-
fellsbæ á undanförnum árum. Nýjastur þeirra er Krikaskóli sem fjallað
er um hér í blaðinu þar sem bryddað er upp á nýjungum sem eflaust eiga
eftir að vekja mikla athygli á næstu árum. Þá hafa nýir leikskólar tekið
til starfa og eru úrræði fyrir yngstu grunnskólabörnin að loknum skóla-
degi til fyrirmyndar, þó að reyndar sé unnið að því að gera enn betur í
þeim efnum, því lengi má gott bæta. Frístundastarf yngstu barnanna er
komið undir stjórn skólanna sjálfra með því markmiði að mynda heild-
stæða umgjörð um skóladag barnanna þar sem börnum er meðal annars
gert kleift að sinna tómstundum og íþróttum innan skóladagsins.
Mosfellsbær er framsækið bæjarfélag sem samt sem áður hefur
tekist að halda sérstöðu sinni. Það er ekki langt síðan hér var sveit og í
raun má segja að hér sé enn sveit fyrir þá sem þess óska. En auðvitað
er Mosfellsbær um leið hluti af höfuðborginni okkar og öllu því sem
hún hefur upp á að bjóða, eins konar sveit í borg. Til marks um metnað
bæjar félagsins, að stuðla sífellt að bættum hag og velferð bæjarbúa,
var farið í mikla stefnumótunarvinnu fyrir skömmu. Tilgangur hennar
var að leggja grunn að enn betra samfélagi til að lifa og starfa í. Niður-
staðan var til að mynda að skilgreind voru gildi og framtíðarsýn fyrir
bæjarfélagið. Gildi Mosfellsbæjar eru virðing, jákvæðni, framsækni og
umhyggja. Framtíðarsýnin snýr meðal annars að því að Mosfellsbær sé
eftirsótt bæjarfélag til búsetu þar sem fjölskyldan er í fyrirrúmi.
Þótt sérstaða Mosfellsbæjar felist ekki síst í nálægð við náttúruna er
ekki síður hægt að halda því fram að menningar- og listalíf sé hér með
eindæmum gott. Hér er til að mynda starfræktur metnaðarfullur lista-
skóli þar sem hlúð er að áhuga bæjarbúa á myndlist, tónlist og leiklist
enda getur bærinn státað af ótalmörgum framúrskarandi listamönnum á
ýmsum sviðum. Sést það best á hinni metnaðarfullu og fjölbreyttu dag-
skrá bæjarhátíðarinnar Í túninu heima sem fram fer nú um helgina þar
sem fram kemur fjöldinn allur af ungum og eldri Mosfellingum ásamt
fleiri listamönnum. Ég hvet alla til að koma og njóta þess sem hátíðin
hefur upp á að bjóða.
Verið hjartanlega velkomin í Mosfellsbæ.
Haraldur Sverrisson bæjarstjóri.
Hver árgangur á sitt
hreiður í Krikaskóla
Fyrsta starfsár nýs og byltingar-
kennds skóla er hafið í Brekku-
koti í Mosfellsbæ. Sá heitir
Krikaskóli og er í framtíðinni
ætlaður börnum á aldrinum
eins til níu ára.
Snotrar byggingar hafa sprottið
upp Helgafellsmegin við Álafoss-
kvosina. Þetta er tímabundið hús-
næði hins nýja Krikaskóla og heit-
ir Brekkukot. Skólastjóri er Þrúð-
ur Hjelm og hún kveðst einungis
verða með tvær deildir í vetur,
fyrir þriggja til fimm ára börn,
samhliða því að vinna að opnun
stóra skólans sem á að komast í
gagnið að ári. Teikningar af húsi og
lóð liggja fyrir en skipulagsferlið
er enn í gangi. Þrúður segir mikl-
ar væntingar gerðar til skólans
bæði af foreldrum og skólafólki.
„Þetta er fyrsti skólinn á landinu
fyrir
eins til níu ára börn og býður sam-
felldan skóladag til rúmlega fimm.
Þarna er verið að bræða saman
tvö skólastig, tvo kennarahópa og
fleira fólk með uppeldismenntun,“
útskýrir hún.
Það er ekki bara aldur nemend-
anna í Krikaskóla sem er sérstak-
ur heldur líka hugmyndafræð-
in. Hún byggist á verðlaunatil-
lögu hóps sem kallar sig Bræðing
og hefur arkitekta, verkfræðinga,
landslagsarkitekt, skólafólk og rit-
höfund innan sinna vébanda. „Við
hengjum okkur ekki í að fimm
ára börn eigi að læra eitt og sex
ára börn annað heldur leggjum
áherslu á samvinnu nemenda. Þó
þannig að hver einstaklingur fái
notið sín. Að finna sterku hliðarn-
ar og vinna út frá þeim. Við höfum
verið með mörg fjögurra og fimm
ára börn sem eru læs og það á
bara að leyfa þeim að halda áfram.
Stundum verð ég vör við að börn
læra að
lesa á sama hátt og þau lærðu að
tala, án þess að taka eftir því að
einhver var að kenna þeim það.
Það finnst mér mjög gott. Hver
árgangur kemur til með að hafa
heimasvæði í skólanum sem við
köllum hreiður en eru þó ekki af-
lokaðar kennslustofur.“
Þrúður segir hönnun skólans
styðja þær aðferðir og leiðir sem
farnar verða í skólastarfinu og
meira að segja skólalóðin verði
uppbyggð sem hluti af náms- og
kennslurými, auk þess að vera
leiksvæði.
„Börnin verða með pollagall-
ana með sér því þau eiga vísa úti-
veru og þau fá morgunmat, há-
degisverð og síðdegishressingu.
Það verður sem sagt boðið upp á
þá þjónustu sem leikskólinn hefur
verið með en fyrir allan þennan
aldurshóp sem getur ekki séð um
sig sjálfur meðan foreldrarnir
vinna fullan vinnudag.“
- gun
„Við hengjum okkur ekki í að fimm ára börn eigi að læra eitt og sex ára börn annað.“ FRÉTTABLAÐIÐ/GVA
Krikaskóli hinn nýi
eins og hann lítur út á
teikniborðinu.
Haraldur Sverrisson, bæjarstjóri Mosfellsbæjar. FRÉTTABLAÐIÐ/GVA
PISTILL BÆJARSTJÓRA
Mosfellsbær – þar
sem fólki líður vel