Vikan - 15.03.1979, Blaðsíða 31
Kate Bush: DRAUMURINN
ER BILLIE HOLLIDAY
Ef verið er að tala um tvítuga stúlku,
fulla af rómantík, sem semur sín eigin
lög og texta og er á toppnum, þá er
enginn í vafa um, að þar er átt við Kate
Bush. Ellefu ára var hún byrjuð að fikta
við pianóið og setja saman lög, og 15 ára
undirritaði hún samning við hljómplötu-
fyrirtækið EMI.
Fjölskylda Kate er mjög músíkölsk,
og hún segir, að það hafiaðallegaverið
bræður hennar tveir, sem spila með
írskum þjóðlagasönghóp, sem hafi vakið
áhuga hennar á tónlist. Einnig er hún
mjög þakklát foreldrum sínum, sem
hafa verið henni ómetanleg stoð og
stytta þó aldrei hafi þeir hvatt hana til
að leggja út á þessa braut.
Það var Dave Gilmore, gítarleikarinn
í Pink Floyd, sem svo að segja
uppgötvaði hana. Hann heyrði hana
spila, þegar hún var 15 ára, og hjálpaði
henni með peninga, svo hún gæti spilað
inn á plötu. EMI sá, að hér var
snillingur á ferð, og gerði samning við
hana um hæl. Fyrirtækið lét hana
árlega fá dágóða peningaupphæð, og í
þrjú ár samdi hún lög, sótti danstíma og
kennslu í látbragðsleik án þess að koma
nokkurn tíma fram opinberlega. Þessi
ár, á meðan hún var að þroskast og
„finna sjálfa sig”, segir hún hafa verið
dýrmætustu ár lífs síns.
Kate Bush er mjög hrifin af írskri og
enskri þjóðlagatónlistog telur ástæðuna
vera, að það var sú tegund tónlistar, sem
bræður hennar spiluðu, er hún hóf að
syngja með þeim. Einnig er hún mjög
hrifin af rokksöngvurum eins og David
Bowie og Bryan Ferry og hljómsveitinni
Roxy Music.
Og hana dreymir um að geta sungið
eins og Billie Holliday.
II. Vikan31