Tímarit lögfræðinga - 01.02.1995, Blaðsíða 9

Hér er einnig ástæða til að nefna, hversu brýnt það er að vitund almennings
um mikilvægi óháðs dómsvalds verði jafnan vakandi. I því mikla og óstöðv-
andi upplýsingastreymi, sem einkennir þjóðfélagið í dag, er nauðsynlegt að
séð verði fyrir staðgóðri fræðslu um uppbyggingu og þýðingu dómskerfisins,
ekki síður en um aðra þætti þjóðfélagsins. Hér hafa skólarnir miklu hlutverki
að gegna en einnig ber að nefna þátt fjölmiðlanna, sem verður sífellt stærri.
Opinberar umræður um réttarfar og dómsmál eru nauðsynlegar en á miklu
ríður að þær grundvallist á ábyrgð og þekkingu. Málefnaleg gagnrýni og um-
ræða stuðlar að réttaröryggi, sem er einn af hornsteinum heilbrigðs þjóðfélags.
Að sjálfsögðu hafa oft verið skiptar skoðanir um einstakar úrlausnir Hæsta-
réttar í 75 ára sögu hans og svo mun jafnan verða. Hitt ber að vona að enginn
efist um að hæstaréttardómarar hafi ætíð haft það fyrst og síðast í huga að
dæma af alúð og samviskusemi í hverju máli, stóru sem smáu, og á þann veg
er þeir telja rétt lög krefjast. Hæstarétti íslands ber að vera brjóstvöm laga
og réttar í landinu og standa vörð um réttaröryggi borgaranna. Skal sú von
látin í ljós að þessu hlutverki auðnist honum alla tíð að gegna með reisn og
á þann hátt að hann verðskuldi traust þjóðarinnar.
3