Skessuhorn - 26.11.2014, Síða 28

28 MIÐVIKUDAGUR 26. NÓVEMBER 2014
Komst áfram í stærðfræðikeppni framhaldsskólanema
Anna Chukwunonso Eze er sextán
ára stúlka á Akranesi. Hún er fædd
og uppalin á Skaganum og er nú
á fyrsta ári í Fjölbrautaskóla Vest-
urlands á Akranesi. Anna stundaði
nám við Grundaskóla áður og fékk
fjölda viðurkenninga fyrir góðan ár-
angur í náminu þegar hún útskrif-
aðist þaðan síðastliðið vor. Í októ-
bermánuði tók hún þátt í stærð-
fræðikeppni framhaldsskólanema í
fyrsta sinn. Sú keppni er haldin ár-
lega fyrir nemendur um allt land af
Íslenska stærðfræðafélaginu og Fé-
lagi raungreinakennara. Keppnin
er tískipt, neðra stigið er fyrir nem-
endur sem eru á fyrsta og öðru ári
og efra stigið er fyrir þá sem lok-
ið hafa tveimur námsárum. Anna
varð ein af efstu 20 nemendunum á
neðra stigi keppninnar, en þar tóku
165 nemendur þátt. 20 efstu á báð-
um stigum er svo boðið að taka þátt
í úrslitakeppni sem fram fer í mars
á næsta ári og er þeim sem lenda í
efstu sætum þar boðið að taka þátt
í Norrænu stærðfræðikeppninni.
Þetta er ekki í fyrsta sinn sem Anna
tekur þátt í stærðfræðikeppni en
hún sigraði í sínum árgangi í stærð-
fræðikeppni grunnskólanna á Vest-
urlandi fyrir tveimur árum og varð
í öðru sæti í fyrra.
Er allt eða ekkert
manneskja
Anna hefur alltaf haft gaman af því
að læra og þá sérstaklega stærð-
fræðina. „Ég skil stærðfræði og þess
vegna finnst mér hún skemmti-
legust. En þegar efnafræðin er að
ganga upp, þá er hún skemmtileg
líka. Ég er á náttúrufræðibraut enda
hef ég mestan áhuga á vísindagrein-
um. Það mætti segja að ég sé stærð-
fræðinördið,“ segir Anna í samtali
við Skessuhorn. Hún hefur mikinn
metnað fyrir því sem hún tekur sér
fyrir hendur og leggur sig alla fram
við lærdóminn. Hún lauk fyrstu
tveimur stærðfræði áföngunum í
fjölbrautaskólanum á meðan hún
var enn í grunnskóla og kláraði auk
þess fjóra enskuáfanga. Hún var því
búin með alla ensku sem hún þarf
að læra á náttúrufræðibrautinni,
áður en hún hóf formlegt nám við
skólann. „Ég hef reyndar alltaf átt
frekar auðvelt með að læra. Mig
langar að standa mig vel í skólanum
og í því sem ég geri yfirleitt. Ég er
svona allt eða ekkert manneskja,“
útskýrir Anna og brosir. Eins og al-
gengt er með afburðanemendur þá
æfir Anna einnig íþróttir, með góð-
um árangri. „Ég hef æft sund frá
því í 3. bekk og mér gekk mjög vel.
Svo tók ég mér árs pásu á meðan ég
var í 10. bekk. Þá var ég með önn-
ur markmið og vildi frekar einbeita
mér alveg að þeim. Ég æfði fitnes
box á meðan, sem var algjört æði.“
Anna er aftur komin á fullt í sund-
inu en keppir þó ekki. „Ég var farin
að meiðast og finnst núna þægilegt
að vera bara á bakkanum að hvetja
hina áfram.“
Var bara að prófa
Anna segist ekki hafa átt von á því
að komast áfram í keppninni enda
hafi hún bara verið að prófa að
taka þátt. „Halla stærðfræðikenn-
ari í FVA sagði okkur frá þessu. Ég
hugsaði með mér að fyrst ég tók
þátt í hinum stærðfræðikeppnun-
um, þá gat ég prófað þessa líka. Ég
ætlaði samt bara að prófa og hafði
engar væntingar,“ segir Anna. Hún
bætir því við að dæmin sem lögð
voru fyrir þátttakendur hafi ver-
ið af öðrum toga en þau sem eru
í skólabókunum. „Þarna gat ég til
dæmis ekki notað reglurnar sem ég
hef lært og þurfti að hugsa út fyr-
ir kassann.“ Anna segir að hún geti
undirbúið sig aðeins fyrir úrslita-
keppnina sem haldin verður í vor,
því þátttakendur fá send æfinga-
dæmi. Anna er þó ekki með hug-
ann við úrslitakeppnina strax enda
hefur hún nóg annað að gera. Hún
vinnur við afgreiðslu í Krónunni
með skólanum, er í Gettu betur
liði skólans og svo eru prófin hand-
an við hornið. Aðspurð um fram-
tíðina segir hún ekkert ákveðið í
þeim efnum. „Ég stefni á að klára
stúdentinn á tveimur og hálfu ári
eða þremur, ég veit það samt ekki
enn fyrir víst. Annars er ég mikið
að pæla í hvað ég geri í framhald-
inu. Ég gæti til dæmis farið í lækn-
isfræði eða verkfræði og draumur-
inn er að komast í háskóla í Banda-
ríkjunum. Annars veit ég svo sem
ekki hvað verður, ég er alls ekki
búin að ákveða neitt. Mig lang-
ar samt mest að starfa við eitthvað
í framtíðinni þar sem ég get haft
einhver áhrif,“ segir Anna Eze að
endingu.
grþ
Anna Chukwunonso Eze.
Rafræn áskrift
Pantaðu núna og þú færð
fyrsta mánuðinn frían
Ný áskriftarleið
Fyrir 1950 kr,- á mánuði færð þú
aðgang að nýjasta tölublaði
Skessuhorns ásamt eldri árgöngum
Svona pantar þú áskrift:
Hringdu í okkur í síma 433 5500
Sendu okkur póst á askrift@skessuhorn.is
Pantaðu á vefnum www.skessuhorn.is