Frjáls verslun - 01.09.2007, Blaðsíða 66

66 F R J Á L S V E R S L U N • 9 . T B L . 2 0 0 7
„Segja má að jól séu ávallt eftirminnileg. Þau eru
sérstakt tímabil fyrir okkur öll, væntanlega ekki síst
fyrir presta,“ segir séra Vigfús Þór Árnason. „Á jólum
er almennt mikið um að vera í söfnuðinum. Aðventan,
undirbúningstími jólanna, hefur á undanförnum árum
fengið á sig nýja mynd og breytta þótt innihaldið
hafi vitanlega ekki breyst. Aðventan hefur orðið að
fjölskylduhátíð þar sem fleiri og fleiri gefa sér tíma til
þess að vera til og njóta þess sem hún hefur upp á að
bjóða. Einn þáttur í helgihaldi aðventunnar er sá, að
leikskólabörn og börn í grunnskólum heimsækja kirkjuna
sína undir leiðsögn kennara. Á aðventunni streyma
um átta þúsund manns í kirkjuna sína í Grafarvogi og
yndislegt að sjá fólk koma og eiga helga stund.
Fyrir nokkrum árum var einn grunnskólanna í
Grafarvogi í heimsókn. Nemendur flytja gjarnan
jólaguðspjallið. Í þetta sinn var það vel æft og flutt. Þá
kom að því í jólasögunni – jólaguðspjallinu, að María og
jósef bönkuðu upp á í gistihúsinu. Gistihúseigandinn litli
átti að segja, að ekki væri rúm fyrir þau í gistihúsinu
og benda þeim Maríu og jósef á fjárhúsið. Svo opnaði
gistihúseigandinn dyrnar, leit á Maríu og jósef og fannst
þau svo aumkunarverð að hann svaraði: „Ég held að það
sé eitt herbergi laust.“ Með það fóru þau inn í gistihúsið.
Og þá var það búið. Prestar og kennarar áttu erfitt með
að halda aftur af hlátrinum og reyndar lauk honum ekki
fyrr en helgistundinni lauk. Hvílík innri gleði. Er það
ekki einmitt boðskapur aðventu og jóla „að koma til
dyranna eins og maður er klæddur“? Er ekki einlægni
barnsins það sem skiptir máli? Gistishúseigandinn
var svo góður í sér að hann gat ekki annað en
boðið þeim inn til sín. Okkar er nú á aðventu og
jólum að bjóða þeim inn til okkar sem boðar frið
á jörðu, bjóða þann velkominn sem gefur sannan
frið, sanna gleði, sanna jólagleði. Bjóðum
aðventukonunginn velkominn til okkar í önnum
dagsins og höldum sönn og heilög jól.“
Séra Vigfús Þór Árnason,
sóknarprestur Grafarvogskirkju:
Óvænt góðsemi
gistihúseiganda
Jólin koma