Frjáls verslun - 01.09.2007, Blaðsíða 58

58 F R J Á L S V E R S L U N • 9 . T B L . 2 0 0 7
útráSin
dögg Gunnarsdóttir, verkefnastjóri hjá Viðskiptafræðistofnun Háskóla Íslands, rannsakaði í meistaraverk- efni sínu íslenska stjórnunarstílinn
í útrásarfyrirtækjum. Helstu niðurstöður
rannsóknarinnar voru að íslenskir stjórn-
endur væru vinalegir, þeir ynnu eftir láréttu
skipulagi, ákvarðanataka þeirra væri hröð,
stéttleysi ríkti innan fyrirtækjanna og
„reddaragenið“ væri enn við lýði. Einnig
væru óformleg samskipti manna á milli óháð
stöðu innan skipuritsins og stjórnendur í
„toppstöðum“ væru yngri en almennt gengur
og gerist í nágrannalöndunum.
Íslensk útrásarfyrirtæki hafa verið mikið í
umræðunni og vakið athygli síðustu misserin.
Bent hefur verið á að árangur stjórnenda þeirra
sé mikill og að þeir hafi mögulega sérstöðu
meðal stjórnenda í nágrannalöndunum.
Vangaveltur hafa meðal annars verið um
hvort til sé séríslenskur stjórnunarstíll. Hér
á eftir fara helstu niðurstöður úr rannsókn
byggðri á viðtölum við níu stjórnendur
íslenskra fjármálafyrirtækja í útrás.
Vingjarnlegir og hlusta á starfsfólk sitt
Stjórnendurnir sem rætt var við lýstu
sjálfum sér meðal annars sem vingjarnlegum,
góðum hlustendum, traustsins verðum
og aðgengilegum fyrir starfsmenn. Þeir
standa þó ekki og anda ofan í hálsmálið á
starfsmönnum sínum, virðast vera góðar
fyrirmyndir, hafa þor til að ráða sér hæfara
fólk og treysta starfsmönnum sínum.
Einn komst svo að orði: „Ég tel jákvæðni,
kraft og metnað vera mína kosti og ég vil
vinna í kringum fólk sem er virt fyrir það að
vera heiðarlegt og koma hreint fram.“ Annar
hefur að eigin sögn skrifstofuna sína ávallt
opna, er vingjarnlegur, hlustar á starfsmenn
og er þeim innan handar.
...við erum kannski
frekar í því að senda sms
Íslendingar eru aldir upp í stéttlausu
samfélagi þar sem samskipti manna á milli
eru óformleg. „Þú mátt ekki tala við hvern
sem er í Bretlandi. Við erum óvön því. Á
Íslandi máttu tala við hvern sem er. Það
er sömuleiðis miklu meiri skriffinnska í
Bretlandi.“
Annar sagði: „Við erum kannski frekar í
því að senda sms heldur en minnismiða.“
Viðmælendur sögðust einnig finna
fyrir því að það væri meiri stéttaskipting
innan fyrirtækja erlendis og að yfirmenn
þar tali meira niður til undirmanna sinna.
Starfsmenn og stjórnendur þar eru einnig
viðkvæmari fyrir titlum og því að fara rétta
leið innan skipuritsins.
... það er komin rigning
og þú fórst ekki í sólbað
Skjót ákvarðanataka er eitt af því sem
viðmælendur telja einkenna íslenska
stjórnendur: „Ég tek allar ákvarðanir strax,“
sagð einn. Annar sagði: „Tefjið ekki verkefni
út af ákvarðanatöku. Ákvörðun verður ekki
betri með því að taka hana þremur dögum
síðar.“
Hann bætti við að á Íslandi væru ákvarðanir
teknar fljótt og treyst á hyggjuvitið. „Við
Íslendingar erum aldir upp við að veðrið
geti breyst snögglega og því þurfi að drífa
í hlutunum. Ef þú gerir þetta ekki strax þá
gætir þú misst af því. Það er komin rigning
og þú sem fórst ekki í sólbað þegar sólin
skein.“
Sumir segja það algengt hjá stjórnendum
íslenskra fyrirtækja að „nei“ sé ekki tekið sem
svar og að lagt sé af stað með „þetta reddast,
elskan mín“ í huga og svo sé ef til vill fundið
út síðar hvernig málin skulu leyst.
Einn viðmælenda sagði að „þetta reddast“
kúltúrinn gerði það að verkum að Íslendingar
væru óskipulagðir. Lagt væri af stað án þess
að undirbúa hlutina og þegar eitthvað kæmi
upp á væri viðkvæðið bara „þetta reddast
einhvern veginn“ – menn myndu finna
eitthvað út úr þessu og leysa málið.
DöGG GUNNARSDóTTIR:
ÍSlenSki
STjórnunarSTÍllinn
Dögg Gunnarsdóttir, verkefnastjóri hjá Viðskiptafræðistofnun Háskóla Íslands,
rannsakaði íslenska stjórnunarstílinn og komst að því að íslenskir stjórnendur
eru umbreytingaleiðtogar, þeir dreifa verkefnum og ákvarðanataka þeirra er hröð.
„Reddaragenið“ er enn við lýði.
TexTi: dögg gunnarSdóttir • Mynd: geir ólafSSon