Frjáls verslun - 01.03.2006, Side 23

F R J Á L S V E R S L U N • 3 . T B L . 2 0 0 6 23
DAGBÆKUR
FORSTJÓRA
„Bestu hugmyndirnar fæ ég í bíl. Stundum
þegar koma verkefni sem krefjast yfirlegu og
mikillar umhugsunar keyri ég út fyrir bæinn.
Fer gjarnan suður með sjó eða Nesjavallaleið-
ina austur fyrir fjall og þegar ég kem til baka
er lausnin fundin. Þegar stjórnarformaðurinn
minn, Bjarni Benediktsson alþingismaður,
hringdi í mig skömmu eftir áramót og spurði
hvort við ættum að láta reyna
á að kaupa Olíufélagið þýddi
það til dæmis nokkra bíltúra
þar sem ég velti málinu fyrir
mér fram og aftur,“ segir Her-
mann Guðmundsson, forstjóri
Olíufélagsins ehf.
Hermann er kominn á
fætur upp úr klukkan sjö á
morgnana. „Ég renni yfir dag-
blöðin á tíu mínútum. Stoppa
við helstu fréttirnar og viðskiptasíðurnar en
öðru sleppi ég. Hingað á skrifstofuna kem ég
um klukkan átta og er þá búinn að koma við
í bakaríi á leiðinni. Fæ mér þar bakkelsi sem
ég maula hér á skrifstofunni um leið og ég
kveiki á tölvunni. Fyrsti tíminn á morgnana er
oft býsna notalegur og að sama skapi drjúgur
til að sinna málum.“
Í Nesti í hádeginu
Starfmenn á skrifstofu Olíufélagsins koma til
vinnu á níunda tímanum á morgnana. Fyrstu
fundir forstjórans hefjast um klukkan níu,
það er með framkvæmdastjórum félagsins og
deildarstjórum, birgjum, stærri
viðskiptamönnum og fleirum
eftir atvikum.
„Ég stilli þessu þannig upp
að fyrri fundir dagsins byrja
klukkan níu og tíu og svo
tek ég aðra lotu sem hefst
klukkan þrjú. Ef hver fundur
tekur klukkustund, eins og
algengt er, hef ég lausan tíma
milli klukkan ellefu og þrjú til
að sinna þeim verkefnum sem þarf hér á skrif-
stofunni, svo sem að lesa alls konar pappíra
og tölur, afgreiða símtöl, svara tölvupósti og
fleira. Að meðaltali er ég líklega að fá um
70 tölvubréf á dag og kannski helmingurinn
af þeim kallar á að ég svari. Ef til vill notar
maður tölvupóstinn of mikið. Hins vegar er
þetta þægilegur samskiptamáti sem sparar
mikinn tíma. Póstur sem maður svarar á einni
mínútu sem annars yrði tíu mínútna símatal,“
segir Hermann sem oft skýst frá í hádeginu
og fær sér þá gjarnan skyndibita í Nesti, sem
eru einmitt á þjónustustöðvum Esso.
Að borðið sé hreint
„Utanlandsferðir mínar eru tíðar. Ég er búinn
að vera hér hjá Olíufélaginu í tvo mánuði og
því er lítil reynsla komin á ferðalög hér. Í
fyrra starfi sem framkvæmdastjóri Bílanausts
voru þetta oft tvær ferðir í mánuði, gjarnan
tvo til fjóra daga hver ferð,“ segir Hermann
sem flesta daga vinnur fram undir kvöldmat.
Kvöldin segir hann yfirleitt róleg, en mikilvægt
sé að líta reglulega á tölvupóstinn til að
athuga hvort þangað hafi borist erindi sem
þurfi að bregðast við án tafar. Um helgar reyni
hann að eiga frí á laugardögum, en sér þyki
gott að koma á vinnustað í býtið á sunnudags-
morgnum og sinna þar ýmsum tilfallandi verk-
efnum sem beðið hafa, þannig að í upphafi
nýrrar vinnuviku sé borðið hreint.
Bestu
hugmyndirnar
í bílnum
„Ef til vill
notar maður
tölvupóstinn
of mikið. Hins
vegar er þetta
þægilegur
samskiptamáti.“
HERMANN GUÐMUNDSSON
Hermann Guðmundsson, forstjóri Olíufélagsins ehf.