Bændablaðið - 28.05.2015, Page 12
12 Bændablaðið | Fimmtudagur 28. maí 2015
Fréttir
Fjórðungsmót Austurlands
er stærsti og elsti reglulegi
viðburðurinn í hestamennsku
á svæðinu og er haldið á
fjögurra ára fresti. Skrifað var
í síðustu viku undir samning
við Jón Björnsson um að taka
að sér framkvæmdastjórn
vegna mótsins, sem fram fer í
Stekkhólma á Fljótsdalshéraði
2.–5. júlí næstkomandi.
Jón Björnsson er Akureyringur
og félagi í Hestamannafélaginu
Létti. Hann er mörgum
hestamönnum að góðu kunnur,
enda hefur hann lagt stund á
hestamennsku, ræktun og rekstur
tengdan hestamennsku til margra
ára að því er fram kemur á
heimasíðu hestamannafélagsins
Freyfaxa. Þar segist Jón spenntur
fyrir verkefninu. Það er góð
stemning fyrir mótinu og aðstæður
í Stekkhólma eru frábærar,“ segir
Jón.
Mikil breidd á svæðinu
Aðspurður um mikilvægi
Fjórðungsmótsins segir Jón:
„Mér finnst býsna mikilvægt að
hestamennskan á Norðausturlandi
öllu hafi þennan vettvang til að
sýna sín bestu hross. Breiddin
er mikil á svæðinu og ef okkur
tekst ætlunarverk okkar, sem er
að laða að öll þessi góðu hross og
hestaáhugamenn allt frá Dalvík
til Hornafjarðarsveita, þá veit
ég að framtíð Fjórðungsmóta á
Austurlandi er björt.“
Jón segir aðalmarkmiðið vera
að gera þetta að skemmtilegasta
móti ársins í hestamennskunni.
„Fjölskylduvænt og skemmtilegt er
það sem við vinnum útfrá, með að
sjálfsögðu alvöru keppni.“ /MÞÞ
Fjórðungsmót Austurlands:
Fjölskylduvænt og skemmtilegt
mót með alvöru keppni
Maraþonútsending RÚV frá
sauðburði á Syðri-Hofdölum
í Skagafirði, sem hófst á
uppstigningardag, sló í gegn meðal
þjóðarinnar. Sent var út að hluta
á aðalrás Sjónvarpsins og í heilan
sólarhring á hliðarrás.
Mesta áhorf, ef skoðað er
mínútu fyrir mínútu, var 45% á
hægvarpsútsendinguna Beint frá
burði. Þetta þýðir að nánast annar
hver Íslendingur horfði eitthvað á
útsendinguna.
Skilgreint uppsafnað áhorf var
hins vegar 38%. Þetta eru þeir sem
horfðu á hægvarpið í fimm mínútur
eða lengur og sú tala sem venja er að
miða við. Það þýðir að ríflega 125
þúsund manns settust við og horfðu
á sauðburðarútsendinguna.
Ef rýnt er í tölurnar sést að 27,2%
þjóðarinnar horfðu á hægvarpið á
hliðarrás RÚV í fimm mínútur
eða lengur en 18,6% á aðalrásinni.
Ekki er þó hægt að leggja þessar
tölur saman og fá út að 45,6%
hafi horft, því í sumum tilfellum
er þetta sama fólkið sem skipti á
milli aðalrásar og hliðarrásar. Talan
38% stendur. Til samanburðar
horfðu 44% á Eurovision-þáttinn
Alla leið og 38,7% á Úrslitakeppni
Olísdeildarinnar, en þetta eru þeir
dagskrárliðir sem eru í fyrsta og
öðru sæti á listanum yfir mesta
áhorfið í síðustu viku. Sem þýðir að
Beint frá burði var þriðji vinsælasti
dagskrárliðurinn í íslensku sjónvarpi.
Að auki horfðu margir á netinu.
Alls voru 29 þúsund heimsóknir
inn á útsendinguna á www.ruv.is
og meðalheimsóknin var rétt tæpar
fimm mínútur. Þá eru ótaldir þeir sem
horfðu á í útlöndum.
Nær helmingur þjóðarinnar
horfði á sauðburð í beinni
– þriðja vinsælasta sjónvarpsefni fyrri viku
Jón Björnsson, framkvæmdastjóri Fjórðungsmóts Austurlands, og Bjarki
Þorvaldur Sigurbjartsson, formaður hestamannafélagsins Freyfaxa.
Mynd / Freyfaxi
Landbúnaðarsafn Íslands:
Stofnun í þágu samfélags og framþróunar
Sögu Landbúnaðarsafns Íslands
má rekja aftur til ársins 1940
þegar lög um rannsóknir í þágu
landbúnaðarins voru sett. Eitt
ákvæði þeirra var að upp skyldi
koma safni landbúnaðarverkfæra
við Bændaskólann á Hvanneyri.
Safnið er því eldra en byggðasöfn
landsins en á sér svipaðar rætur því
tilveru þess ber að þakka eldsálum,
sem í frístundum öngluðu saman og
varðveittu muni og minjar úr sögu
íslensks landbúnaðar. Bakhjarl
safnsins hefur frá upphafi verið
Hvanneyrarskóli en forráðamenn
skólans á hverjum tíma hafa stutt
starfsemina með ráðum og dáð.
Hægt og bítandi bættust gripir
við safnið, sem árið 2007 var gert
að sjálfseignarstofnun. Segja má að
eftir það hafi safnstarfið verið tekið
fastari tökum en fyrr hafði verið.
Bjarni Guðmundsson hefur síðan og
raunar áður haft örugga hönd á þróun
safnsins og viðgangi þess. Í árslok
2013 hlaut safnið viðurkenningu
mennta- og menningarmálaráðherra
samkvæmt safnalögum nr.
141/2011 og styrkti það stöðu þess.
Einnig náðist mikilvægur áfangi
haustið 2014 með opnun nýrrar
grunnsýningar í Halldórsfjósi. Hún
er mikilvægur hlekkur í gamla
byggðakjarnanum á Hvanneyri.
Safnið er því orðið órjúfanlegur
hluti í varðveittu menningarlandslagi
staðarins. Hvanneyri er héraðsprýði
og myndarlegt er þangað heim að
líta. Minjar um búsetu og landnytjar
eru við hvert fótmál.
Framtíðarsýn Landbúnaðarsafns
Íslands þyrfti að verða sú að þar
verði þekkingarmiðstöð í nánum
tengslum og samvinnu við önnur
söfn í landinu sem varðveita muni
og minjar um landbúnað í fortíð og
nútíð. Þar gegnir gagnasafnið Sarpur
meginhlutverki en að því eiga aðild
um 50 söfn. Landbúnaðarsafnið gæti
orðið öðrum söfnum til ráðgjafar
um varðveislu og meðferð muna og
minja um íslenskar landbúnað.
Að undanförnu hefur söfnum
fjölgað mikið og afar mikilvægt er
að samræma aðgerðir og varðveislu
þar sem reyndin er sú að fjármagn til
starfsemi af þessu tagi er sótt í sömu
uppsprettur. Skylda sveitarfélaga er
mikil þegar kemur að rekstri safna
og annarra menningarstofnana.
Það hlýtur að vera keppikefli
að leita leiða til þess að treysta
böndin við systurstofnanir annars
staðar á landinu og efla samstarf
og samnýtingu þekkingar, reynslu
og auðlinda stofnana í Borgarfirði
sem sinna söfnun, varðveislu,
rannsóknum og miðlun.
Samfylgd safnsins við skólann í
gegnum tíðina gefur því sérstöðu.
Merkasta bókasafn um landbúnað er
í safninu. Það styrkir stöðu beggja
stofnana til rannsókna á sögu og
þróun íslensks landbúnaðar sem
um leið getur leitt til framþróunar
og nýsköpunar í atvinnugreininni.
Árið 2013 var gerð sú breyting á
lögum um Þjóðminjasafn Íslands
að það var gert að háskólastofnun
í því skyni að efla rannsóknir og
samvinnu stofnanna á milli, sem
kemur starfsemi og rannsóknum
beggja til góða.
Ný grunnsýning Landbúnaðar-
safnsins mun vel nýtast til kennslu
og kynningar á landbúnaði og þróun
hans. Hún er aðdráttarafl fyrir gesti
og gangandi.
Starfið verður líka að þróa
áfram, leita nýrra leiða til þess að
safna og miðla þekkingu á þeim
málaflokki sem safnið stendur vörð
um. Sameina þarf krafta og efla
starfsemina með því markmiði að
Landbúnaðarsafni Íslands verði
búinn sá sess að það geti sinnt
því mikilvæga hlutverki að vera
samnefnari og þekkingarmiðstöð um
sögu og þróun íslensks landbúnaðar.
Lilja Árnadóttir
Safnvörður munasafns
Þjóðminjasafns Íslands
Fulltrúi Þjóðminjasafns í stjórn
Landbúnaðarsafnsins.
Gamla bæjartorfan á Hvanneyri. Fjærst til vinstri er Halldórsfjós sem hýsir nú Landbúnaðarsafn Íslands.
Glæsilegur og rómantískur
veitingastaður í sögufrægu
húsi í hjarta borgarinnar
við Ingólfstorg
j
Borðapantanir í síma
511 5090
www.einarben.is
Katrín Magnúsdóttir frá
Landvernd kom og færði
leikskólanum Bergheimum
í Þorlákshöfn Grænfánann
í fyrsta skipti og afhenti
Svölu Ósk Sævarsdóttur,
formanni umhverfisnefndar
Bergheima, fánann ásamt
viðurkenningarskjali.
Á viðurkenningunni stendur:
„Alþjóðleg viðurkenning - Skóli
á grænni grein hlýtur Leikskólinn
Bergheimar í fyrsta sinn fyrir
góða frammistöðu í menntun til
sjálfbærrar þróunar og fyrir að leggja
sitt af mörkum til þess að efla og
bæta umhverfismál innan skólans og
í nærsamfélaginu.“ Katrín útskýrði
fyrir nemendum hvað myndin á
fánanum stendur fyrir og lét þau
leika eftir myndunum. /MHH
Grænfáninn til leikskólans
Bergheima í Þorlákshöfn
Frá afhendingu Grænfánans, talið frá vinstri: Katrín Magnúsdóttir frá
Landvernd, Ásgerður Eiríksdóttir leikskólastjóri og Svala Ósk Sævarsdóttir,
ásamt þremur leikskólabörnum.
í fyrsta skipti við Bergheima.
Krakkarnir sungu Sól, sól skín á
mig á meðan.