Árbók Nemendasambands Samvinnuskólans - 01.06.1979, Blaðsíða 31

að Bifröst hafi skólinn verið nýr stofn á gamalli rót og því
hafi aðstandendur hans með vissum hætti verið að berjast
fyrir nýjum tilverurétti skólans.
Þessi aðstaða skapaði einstæða og óvenjulega samstöðu
nemenda, kennara og starfsliðs, þar sem allir lögðust á eitt
til að halda á lofti merki skólans og gera veg hans og virð-
ingu sem mesta. Vil ég fullyrða, að nemendur fyrstu ár-
ganganna hafi borið hag hans óvenju sterkt fyrir brjósti og
aldrei gleymt því, hvar sem þeir voru staddir, utan skóla-
veggja eða innan, að þeir voru fulltrúar þessa skóla og báru
honum vitni með starfi sínu og framkomu. Ásamt þessari
persónulegu ábyrgðartilfinningu höfðu þeir sterka ræktar-
semi til skólans, sem m. a. kom fram í forgöngu þeirra um
stofnun Nemendasambands Samvinnuskólans í september
1958. Hafa enda margir traustustu liðsmanna sambands-
ins verið úr þeirra hópi. Settu þessi viðhorf lengi sterkastan
svip á afstöðu nemenda til skólans, bæði meðan þeir voru
í skóla og eftir að námi lauk. Gengi brautskráðra nemenda
í störfum og á vettvangi félagsmála skapaði trú á gildi
þeirrar menntunar, er skólinn veitti. Stuðlaði það að auk-
inni aðsókn. En þá gat það einnig gerst, sem oft vill henda.
Er róðurinn léttist, vilja þeir, er um hlunnana héldu, njóta
leiðisins, og þeir, sem feta troðna slóð, hugsa sjaldnast til
þeirra, er á undan fóru, nema ef þeir reka tæmar í. Þetta
er saga, sem er gömul og ný og getur alls staðar skeð.
Fyrsta veturinn bjuggu allir, skólastjóri og kennarar
ásamt fjölskyldum, nemendur og starfsfólk í því húsi, sem
nú hýsir kennslustofur, heimavist og mötuneytishúsnæði.
Engar aðrar byggingar voru þá til afnota og raunar var
það hús ekki fullfrágengið, efsta hæð heimavistarálmunnar
að mestu óinnréttuð svo og núverandi bókasafn. Þó að nem-
endur væru aðeins 32 í einum bekk var nokkuð þröngt búið.
Sambýli var því mjög náið og líktist meir sambúð stórrar
f jölskyldu en skólaheimili. Þetta skapaði mikil og góð kynni
allra, er á staðnum voru, ræktaði tillitssemi og félagslund
nemenda, sem ekki kom aðeins fram innbyrðis, heldur og
gagnvart kennurum og starfsliði. öllum var sýnd full virð-
27