Fréttir - Eyjafréttir - Jul 2019, Blaðsíða 3

3
Ágætu Eyjamenn!
Á aldarafmæli Vestmannaeyjabæjar sendi ég ykkur
góðar kveðjur og óskir um farsæld í framtíðinni. Á
hundrað árum hefur samfélagið í Eyjum dafnað og
breyst til batnaðar. Fyrr á tíð var lífsbaráttan mun
harðari. Hafið gaf og hafið tók, það fann fólkið á
ykkar heimaslóð eins vel og íbúar annarra sjávar-
plássa á Íslandi. Enn er það svo að þið Eyjamenn
reiðið ykkur á auðlindir hafsins og vinnið úr þeim
verðmæti sem þjóðin öll nýtur góðs af. Í návígi
ykkar við náttúruöflin hafið þið líka mætt gífurlegri
ógn og eyðileggingu; tímatali í Eyjum er víst gjarn-
an skipt í árin fyrir og eftir gos og ætti það ekki að
koma á óvart.
Um okkar daga er byggðin í Eyjum blómleg. Á þessu
afmælisári munu ýmis tilefni gefast til að rifja upp
þætti og atvik úr merkri sögu byggðarlagsins og
fólksins sem hér hefur skapað samheldið samfélag.
Sjálfur vil ég þakka fyrir góðar móttökur þegar leið
mín hefur legið til Vestmannaeyja, ekki síst við hina
ýmsu íþróttaviðburði fyrir yngri kynslóðina. Þá
finnur maður svo vel samtakamátt ykkar, dugnað
og djörfung, hlýju, hispursleysi og gestrisni.
Reyndar er það rannsóknarefni hversu margt öflugt
íþróttafólk hefur vaxið úr grasi í Vestmannaeyjum,
lagt hart að sér, uppskorið ríkulega og orðið landi og
þjóð til sóma. Þetta vitum við Íslendingar, þökkum
fyrir og vonum að ekkert lát verði á þessari afreks-
fólksframleiðslu ykkar Eyjamanna. En ekki geta
allir skarað fram úr í íþróttum þrátt fyrir vonir
um frama og iðjusemi við æfingar, það þekki ég af
eigin raun. Og þau sannindi gilda reyndar um sam-
félagið allt. Vissulega þurfum við að brýna fólk til
dáða, ekki síst æsku landsins. Já, vissulega megum
við hvetja ungmenni okkar til að setja sér göfug
markmið, reyna á sig, sýna seiglu og bogna ekki
við minnsta andbyr. Eins brýnt er þó að við leyfum
öllum að njóta sín á eigin forsendum, fögnum fjöl-
breytni og hlúum að þeim sem þurfa aðstoð í lífinu,
mikla eða litla eftir atvikum. Þetta getið þið gert svo
vel í ykkar öfluga byggðarlagi, ágætu Eyjamenn, þar
sem fólk kann að standa saman og leggja lið.
Ég ítreka heillaóskir mínar til ykkar og hlakka til
frekari samfunda á eyjunni fögru.
Heillaóskir
forseta Íslands
Guðna Th.
Jóhannessonar
Gæði - alla leið!
ÍSLENSKA SVEITIN OG SS - FYRIR ÞIG
Á
R
N
A
S
Y
N
IR
„Til að skapa afbragðs SS kjötvörur þá eru
gæði hráefnisins og uppruni lykilatriði.
Vönduð vinnubrögð góðra bænda ásamt
réttri meðhöndlun tryggja að kjötvörur frá
SS skila gæðum alla leið á diskinn þinn.“
Oddur Árnason
KJÖTMEISTARI ÍSLANDS 2018
Stefán Geirsson og Silja Rún
Kjartansdóttir í Gerðum eru hluti
þeirra 900 bænda sem eiga SS.