Tímarit hjúkrunarfræðinga - 2016, Qupperneq 4

4 TÍMARIT HJÚKRUNARFRÆÐINGA
ÞESSI RAFRÆNA sérútgáfa Tímarits hjúkrunafræðinga
um öldrunarhjúkrun er tileinkuð öllu því góða starfsfólki
sem af elju og áhuga sinnir meðferð og umönnun eldra
fólks, hvort sem það er á stofnunum eða í heimaþjónustu.
Viðfangsefni öldrunarhjúkrunar eru margþætt enda getur
meðferð og umönnun fjölveikra og hrumra aldraðra verið
afar flókin. Því verður það efni, sem hér er fjallað um,
vonandi að gagni og stuðlar að aukinni þekkingu starfs-
fólks sem sinnir þessu starfi.
Upphaf þessarar útgáfu má rekja til þess að haustið
2015 hófst sérskipulagt 30 eininga diplómanám í
öldrunarhjúkrun á meistarastigi við Hjúkrunarfræðideild
Háskóla Íslands. Hópur hjúkrunarfræðinga víða af
landinu hóf námið og í námskeiðinu Klínísk viðfangsefni
í öldrunarhjúkrun var eitt af verkefnum nemenda að
skrifa fræðslugrein. Þegar nemendur höfðu skilað inn
verkefnunum var ljóst að um fjölbreytt fræðsluefni var að
ræða sem var of verðmætt til að það rykfélli ofan í skúffu.
Til viðbótar eru birtar þrjár greinar sem byggjast á BS-
verkefni Helga Egilssonar, MS-verkefni Sólveigar Hrannar
Gunnarsdóttur, og fyrirlestri undirritaðrar um fræðsluefni.
Flest allt kennsluefni og flest fagtímarit, sem birta efni
um öldrunarhjúkrun, er á ensku og því er mikill fengur af
fræðslugreinum um öldrunarhjúkrun á íslensku. Í samráði
við nemendur fór því undirrituð, sem er umsjónarkennari
diplómanámsins og umrædds námskeiðs, til fundar við
ritstjóra Tímarits hjúkrunafræðinga og niðurstaðan varð
þessi sérútgáfa um öldrunarhjúkrun. Er Félagi íslenskra
hjúkrunarfræðinga, Tímariti hjúkrunarfræðinga, Helgu
Ólafs ritstjóra og Ragnari Haukssyni íslenskufræðingi
færðar sérstakar þakkir fyrir að taka erindinu svona vel og
styðja okkur á alla lund í útgáfuferlinu.
Vegna útgáfunnar var sett á stofn sérstök ritnefnd
sem var skipuð sérfræðingum í hjúkrun aldraðra. Þessir
sérfræðingar eru Elfa Þöll Grétarsdóttir, Guðrún Dóra
Guðmannsdóttir, Hlíf Guðmundsdóttir, Sigrún Bjartmarz
og undirrituð, Ingibjörg Hjaltadóttir, sem ritstýrði þessari
útgáfu. Allar störfum við á Landspítala og höfum kennt um
árabil öldrunarhjúkrun við Hjúkrunarfræðideild Háskóla
Íslands. Ritstjórnin skipti með sér verkum og aðstoðaði
nemendur við að búa fræðslugreinarnar til prentunar.
Það er fjölmargt sem þarf að athuga þegar skólaverkefni
er undirbúið til prentunar og má segja að vinna undan-
farinna mánaða hafi verið bæði nemendum og ritstjórn
lærdómsrík. Við viljum þakka sérstaklega Guðríði Kristínu
Þórðardóttur, sérfræðingi í hjúkrun hjartasjúklinga, og
Þorbjörgu Sóleyju Ingadóttur, sérfræðingi í hjúkrun
langveikra lungnasjúklinga, fyrir ráðgjöf. Einnig viljum við
þakka Laufeyju Jónsdóttur hönnuði kærlega fyrir að teikna
myndir fyrir útgáfuna og fyrir ljósmyndina sem prýðir
forsíðu útgáfunnar.
Efni þessarar rafrænu útgáfu um öldrunarhjúkrun nýtist
vonandi vel sem fræðsluefni næstu árin, en bæði er hægt
er að prenta út eina og eina grein eða allt efnið í heild
sinni með forsíðu og efnisyfirliti og binda saman þannig að
úr fæst rit með 14 fræðslugreinum.
ÖLDRUNARHJÚKRUN
Ingibjörg Hjaltadóttir gestaritstjóri