Spássían - 2010, Blaðsíða 29

29
Félagar í Norðurpólshópnum eru, auk
Arnars, Gríma Kristjánsdóttir, Guðjón
Þorsteinn Pálmarsson og Íris Stefanía
Skúladóttir. Nýja leikhúsið er flennistórt
og rúmar nokkra sali sem hópurinn
hefur umbreytt í margnýtanlegt
leikrými. Áður var Borgarplast þarna
til húsa en síðustu ár hafði húsið, sem
er í eigu Arionbanka, staðið autt. „Ég
hafði gengið með þennan draum í
maganum í sex til sjö ár, hafði rætt
þetta við marga hópa, og svo þegar ég
kom hingað inn fattaði ég að þetta var
húsið. Þess vegna ákváðum við að láta
vaða. En auðvitað varð þetta dýrara og
erfiðara en maður hélt í fyrstu. Ég held
að það sé lögmál.“
Undanfarin ár hefur fækkað þeim
leikhúsrýmum sem sjálfstæðir leikhópar
geta gengið í. Tjarnarbíó hefur verið í
enduruppbyggingu og Möguleikhúsinu
var lokað. Arnar segist hafa orðið var
við mikla þörf um leið og þau opnuðu.
„Upprunalega pælingin var að opna
hús fyrir sjálfstæða listamenn svo þeir
þyrftu ekki alltaf að byrja frá grunni. Ég
hef unnið með mörgum leikhópum og
alltaf þurfti að vinna sömu forvinnuna:
Finna sér húsnæði og athuga hvort
það væri í lagi. Mála, þrífa og redda
stólum. Hengja upp ljós og auglýsa
staðsetninguna: „Við verðum á
Fiskislóð 15, annarri hæð!“ Í 99% tilvika
voru þetta svo ólögleg rými. Þannig
að hugmyndin var að opna rými þar
sem hóparnir gætu komið inn og eytt
orkunni í listina. Því það skiptir máli.“
Arnar segir fólk almennt hissa og
ánægt með að þau hafi lifað svona
lengi, en leikhúsið hóf starfsemi sína
í byrjun árs 2010. „Við höfum verið
hérna í tíu mánuði að byggja upp
þessa hugmynd. Við byrjuðum í raun í
október 2009, með sýningunni Hnykill
sem Margrét Vilhjálmsdóttir setti
upp, og breyttum þá þessu rými í heilt
ævintýraland með 21 leikmynd út um
allt hús. Algjör geðveiki. Svo tókum við
til eftir það í janúar, byggðum þetta
upp og frumsýndum 17. febrúar.“
Síðan þá hafa verið sýnd 25 leikrit í
húsinu. „Það hækkar töluna reyndar
mikið að við tókum á móti hátíðum.“
segir Arnar. „Þetta er heldur alls ekki
allt okkar framleiðsla. Við erum frjálst
leikhús. Ég held ég sé ekki að móðga
neinn þegar ég segi að við séum eina
frjálsa leikhúsið, þ.e. við megum allt,
tökum við hverjum sem er. Við erum
með okkar framleiðslu og síðan getur
hver sem er komið hingað inn og gert
það sem hann vill.“ Hægt er að taka
salina á leigu og borga uppsett verð.
„Svo höfum við tekið á móti fólki með
enga peninga og tekið áhættuna með
þeim og skipt með okkur gróðanum af
miðasölunni.“
Eins og er stendur reksturinn undir
starfseminni en allir sem sjá um húsið
starfa launalaust. „Planið er að fá
styrk fyrir tveimur starfsgildum. Þessi
hugmynd á að ganga upp hvað varðar
grunnkostnaðinn en það vantar tvo
starfsmenn. Þannig að við erum að fara
í slíkt átak núna. Við getum ekki haldið
þessu áfram launalaust um ókomna
tíð.“
Nú þegar er húsið bókað fram á
sumar og Norðurpóllinn að víkka út
starfsemina: „Við erum að bæta
við hljóðveri og myndveri til ódýrrar
útleigu. Við viljum geta boðið upp
á leikhús þar sem allt er á sama
stað.“ Ýmsir viðburðir eru á döfinni
ásamt leiksýningunum. Til stendur
að markaðssetja Norðurpólinn
sem tónlistarsal og um þessar
mundir stendur yfir skipulagning á
stórtónleikum í byrjun næsta árs:
„Bergen - Reykjavík - Nuuk. Við erum
búin að fá stórar hljómsveitir frá öllum
þessum löndum og sækja um styrki.
Ef allt gengur eftir verða brjálaðir
tónleikar í febrúar.“ Styrkirnir er það
sem margar framkvæmdir stranda
á og Arnar er hæfilega bjartsýnn á
framhaldið: „Við sjáum fram á að geta
verið hér næsta hálfa árið, sem er
frábært, þótt það kosti sjálfboðavinnu.
En leikhús gengur ekki nema með því
að fá styrki. Þannig að þessi útvíkkun
starfseminnar er okkar útspil. Enda er
þetta miklu meira en leikhús. Þetta er
listasetur.
Baksviðs á
Norðurpólnum
Úr MARIO BROS
singalong gamandans
leikhúsverkinu
Ásta Gísladóttir

Jól á Norðurpólnum
Jólahátíð með fjórum fjölskyldu-
leiksýningu. Almenn jólastemning í húsinu;
m.a. jólaböll og jólasveinakapphlaup.
Hátíðin endar á styrktartónleikum þann
19.desember með Ragnheiði Gröndal og
fleiri listamönnum.

Sýningar á hátíðinni eru eftirfarandi:

Fjarsjóðsleitin með Ísgerði
Gunnarsdóttur.
,,Völundarhúsið” snýr aftur í nýrri mynd.
Grýla tekur á móti gestum og kynnir
íslensk jól og jólahefðir.
Lápur, Skrápur og jólaskapið. Yngstu
bræður jólasveinanna lenda í ævintýrum í
leit að jólaskapinu.

Meðal annars á dagskrá eftir áramót:

Trúðarnir taka völdin á Norðurpólnum.
Trúða og Sirkús námskeið.
Trúða Brúður - sýning fyrir alla fjölskylduna.

Stórtónleikar BERGEN-REYKJAVIK-NUUK
Tónleikar með hljómsveitum frá þremur
borgum á þremur tungumálum; Norsku,
Íslensku og grænlensku.