Spássían - 2010, Blaðsíða 47

47
Í Bók fyrir forvitnar stelpur! fjalla systurnar Kristín og Þóra
Tómasdætur í ellefu köflum um allt milli himins og jarðar
– sjálfrækt, kynhneigð, tattú, sparnað, vini, skóla, áfengi og
ýmislegt fleira. Allt er þetta eitthvað sem allar stelpur, og
örugglega margir strákar, hafa áhuga á að vita og fræðast
um.
Stelpur hafa áhuga á strákum, fötum, útliti og förðun og
þessu öllu eru gerð góð skil í bókinni. Þær eru líka forvitnar
um kynlíf, getnaðarvarnir, sjálfsfróun, tóbak og áfengi og um
þetta er líka fjallað á hispurslausan og fræðandi hátt. Þetta
eru málefni sem krakkar og unglingar eru oft feimnir að tala
um við foreldra eða annað fullorðið fólk. Í bók Kristínar og
Þóru er ekki að finna neina feimni eða tepruskap en þær
eru meðvitaðar um hversu viðkvæm þessi málefni geta
oft verið og tekst að fjalla um þau án þess að tala niður til
ungra lesenda. Þessi viðfangsefni eru þau sömu og gjarnan
er fjallað um í unglingatímaritum og á vefsíðum og raunar
sömu viðfangsefni og oft er að finna í unglingabókum.
Systurnar stoppa hinsvegar ekki þarna, enda vita þær að
stelpur eru forvitnar um margt fleira en það sem hér hefur
verið upp talið.
Í bókinni er að t.d. að finna kafla um áhugamál, vini,
fjölskyldu og ofbeldi auk þess sem aftast er að finna
upplýsingar sem fengnar eru frá umboðsmanni barna um
réttindi ungmenna. Þó svo að stúlkur vilji t.d. vita hvernig
og hvort eigi að raka píkusvæðið og hvernig eigi að farða sig
vilja þær líka vita hvernig maður á að haga sér þegar einhver
nákominn manni hefur misst ættingja sinn, hvernig maður
eignast nýja vini, hvernig á að taka á einelti og hvað sifjaspell
er – svo fátt eitt sé nefnt.
Þetta er vegleg bók, heilar 328 síður, enda margt undir
og ýmislegt sem stelpur eru forvitnar um. Kápa bókarinnar
er mjög falleg og umbrotið sömuleiðis en ég saknaði þess
þó að engar myndir eru í bókinni til að brjóta ansi massífan
textann svolítið upp. Skýringarmyndir, til dæmis í kaflanum
sem fjallar um kynlíf, hefðu oft getað sagt meira en mörg
orð. Bókin veitir ekki tæmandi upplýsingar um hvert og eitt
málefni, enda varla ætlunin í svona yfirlitsriti, en í lok hvers
kafla er listi þar sem hægt er að finna nánari upplýsingar
um viðfangsefnið. Á stöku stað hefði mátt þjappa textanum
betur saman og hann mætti flæða betur en þetta er ekki
það sem skiptir mestu máli. Það sem máli skiptir er að bók
Kristínar og Þóru er ánægjuleg og þörf viðbót við allar þær
bækur, tímarit og vefsíður sem markaðssettar eru með
stúlkur í huga.
Helga Birgisdóttir
Allt um íslenska samtímahöfunda
· greinar um verk höfunda
· pistlar frá höfundum
· verðlaun og viðurkenningar
· ritaskrár
Sími 411 6100
borgarbokasafn.is
Borgarbókasafn um alla borg
Fréttir úr bókmenntalínu og
margt eira
Lestu
um nýju bækurnar á
og allt þar á milli
Tattú, sjálfsrækt,
sparnaður, heilsa
Kristín og Þóra Tómasdætur.
Bók fyrir forvitnar stelpur! Veröld. 2010.