Milli mála - 2021, Blaðsíða 238
Milli mála 13/2021 237
menntanna, hvorki af samtímamönnum né þeim sem síðar komu.44
Sjálfstæði var ekki auðsótt fyrir franskar yfirstéttarkonur 17. aldar
og sjaldgæft var að konur byggju einar þótt þær væru fullorðnar og
fjárhagslega sjálfstæðar. Væru þær ógiftar eða ekkjur bjuggu þær
hjá foreldrum sínum, bróður eða systur; væru þær illa stæðar og án
fjölskyldu komu þær sér fyrir í klaustri eða sem kennslukonur hjá
efnuðum fjölskyldum. Þess eru dæmi að konur hafi ekki viljað
giftast til að varðveita sjálfstæði sitt; Madeleine de Scudéry bjó til
að mynda í glæstum húsakynnum í Mýrinni sem bróðir hennar,
leikrithöfundurinn Georges de Scudéry, leigði í sínu nafni þótt hún
virðist sjálf hafa staðið undir kostnaði við leiguna og lengst af búið
þar ein.45 Í sumum tilvikum bjuggu hjón á sitt hvorum staðnum;
eiginmaður rithöfundarins Madame de Lafayette dvaldi til dæmis
lengst af á landareign sinni utan Parísar en hún í höfuðborginni og
við hirðina og stundaði ritstörf með vinum sínum. Hvað Madame
d’Aulnoy viðkemur – sem gekk í hjónaband fimmtán ára gömul,
með manni sem var þrjátíu árum eldri en hún sjálf – þá bjó hún
aðskilin frá eiginmanni sínum eftir málaferlin 1670 og var ekkja
síðustu fimm ár ævinnar. Þótt flest ævintýri hennar fjalli um ein-
hverjar hliðar ástarinnar helgar hún aðeins eitt þeirra því viðfangs-
efni hversu rangt sé að neyða „hjörtu sem ekki unnast“ til að ganga
í hjónaband; það er „Blái fuglinn“.
3. „Blái fuglinn“
Sjö árum eftir að „Hamingjueyjan“ kom fyrir augu lesenda í skáld-
sögunni Sagan af Hypolite, greifinn af Duglas kom bókmenntalega
ævintýrið „Blái fuglinn“ út í fyrsta hefti Ævintýra og var síðan
endurútgefið ótal sinnum og endurskrifað.46 Sagan rataði í safnritið
mikla Ævintýrasafnið eða úrval ævintýra og annarra sagna (Le Cabinet
44 Sjá til dæmis umfjöllun um stöðu bókmenntalegra ævintýra Madame d’Aulnoy hjá Adams, „The
‘Contes de fées’ and Madame d’Aulnoy: Reputation and Re-evaluation“, 5–22. Nadine Jasmin
fjallar einnig um aukinn áhuga á verkum skáldkonunnar í Frakklandi undanfarna áratugi: Jasmin,
Naissance du conte fémin, 13–18.
45 DeJean, „Après la guerre civile : la précieuse“, 549.
46 Sjá stutt yfirlit í d’Aulnoy, Contes des Fées, 717–718; Mounier, „La circulation générique d’une
histoire : L’Oiseau Bleu entre conte, lai et nouvelle“, 125–175. Í þessari grein er stuðst við íslenska
þýðingu á ævintýrinu sem finna má í Fríða og Dýrið. Franskar sögur og ævintýri fyrri alda, 201–243.
ÁSDÍS R. MAGNÚSDÓTTIR