Tímarit hjúkrunarfræðinga - 2022, Qupperneq 74

Það er mannlegt að gera mistök en mistök hafa í eðli sínu
misalvarlegar afleiðingar. Rannsóknir sýna að hægt er að
fyrirbyggja um 50% mistaka í svæfingum og skurðaðgerðum.
Víðtækar rannsóknir hafa verið gerðar á því hvernig best sé
að fyrirbyggja mistök á þessum vettvangi og hefur meðal
annars verið horft til jákvæðrar reynslu annarra starfsgreina
á notkun gátlista í bráðatilfellum. Mikilvægt er að starfsfólk
sjái tilgang með notkun gátlista og telji þá vera til hagsbóta
í starfi. Tilgangur rannsóknarinnar var að kanna viðhorf
hjúkrunarfræðinga og sérfræðilækna á skurðstofum
Sjúkrahússins á Akureyri til notkunar gátlista við störf sín og
hvort munur væri á viðhorfi fyrir og eftir kynningu á gátlistum
vegna bráðra vandamála á skurðstofu.
Megindlegt rannsóknarsnið framsýnnar, lýsandi
samanburðarrannsóknar var notað. Þýðið innihélt alla
hjúkrunarfræðinga og sérfræðilækna sem störfuðu á
skurðstofunum á rannsóknartímanum, 47 talsins og var
úrtakið allt þýðið. Fimmtán gátlistar vegna bráðra vandamála
á skurðstofu sem höfðu verið þýddir og innleiddir á
Landspítala voru staðfærðir og innleiddir á Sjúkrahúsinu á
Akureyri á rannsóknartímanum. Stuðst var við fyrstu tvö af
fjórum þrepum viðurkennds innleiðingarferlis og var kynning
gátlistanna rafræn. Spurningalisti var lagður tvisvar fyrir
þátttakendur, fyrir og eftir kynningu á gátlistunum.
Svarhlutfall var 87% fyrir kynningu og 67% eftir. Viðhorf
þátttakenda til notkunar gátlista á skurðstofum mældist jákvætt
og töldu flestir að gátlistar myndu nýtast við venjubundnar
aðstæður og í bráðatilfellum. Meira en helmingur sagðist
öruggur í störfum sínum án notkunar gátlista. Í samanburði
með pöruðu t-prófi kom fram að færri þátttakendur treystu
sér til að framkvæma verk sín í bráðatilfellum án gátlista að
loknum fyrstu tveimur þrepum innleiðingarferlis heldur en fyrir
innleiðingu (t(27)=-2,521; p=0,02).
Niðurstöður benda til að þátttakendur sjái tilgang með notkun
gátlista vegna bráðra vandamála á skurðstofu í bráðatilfellum.
Jákvætt viðhorf gefur einnig tilefni til væntinga um
áframhaldandi árangursríka innleiðingu gátlistanna á
skurðstofum Sjúkrahússins á Akureyri.
Tilgangur
ÚTDRÁTTUR
Aðferð
Niðurstöður
Lykilorð:
Gátlistar í bráðatilfellum; bráðameðferð í svæfingu;
öryggisgátlisti WHO fyrir skurðstofur; innleiðingarvísindi.
Ályktun
HAGNÝTING
RANNSÓKNARNIÐURSTAÐNA
„Hvers vegna ættir þú að lesa þessa grein?“
Nýjungar: Viðhorf sérfræðilækna og hjúkrunar-
fræðinga á skurðstofum Sjúkrahússins á
Akureyri til notkunar gátlista í bráðatilfellum er
jákvætt og sér starfsfólkið tilgang með notkun
þeirra sem hjálpartækja í meðferð bráðatilfella.
Hagnýting: Niðurstöður nýtast við áfram-
haldandi innleiðingu gátlista til notkunar í
bráðatilfellum á skurðstofum Sjúkrahússins
á Akureyri og geta þar með leitt til bættrar
meðferðar í bráðatilfellum. Niðurstöðurnar geta
einnig nýst á öðrum stofnunum sem hyggjast
innleiða slíka gátlista.
Þekking: Niðurstöðurnar sýna að fagfólk á
skurðstofum sér gátlista í bráðatilfellum sem
gagnleg hjálpartæki og getur innleiðing slíkra
gátlista átt þátt í að auka öryggi sjúklinga
sem gangast undir svæfingu og skurðaðgerðir.
Sambærileg rannsókn hefur ekki verið gerð hér á
landi svo vitað sé.
Áhrif á störf hjúkrunarfræðinga:
Mögulega velja hjúkrunarfræðingar sem starfa
á svæfingadeildum og skurðstofum að nýta
sambærilega gátlista í bráðatilfellum sem upp
kunna að koma í starfi þeirra. Með markvissri
innleiðingu getur notkun gátlista orðið almennari
og haft jákvæð áhrif á öryggi sjúklinga.
Gátlistar vegna bráðra vandamála á skurðstofu