Gátt - 2010, Blaðsíða 40
40
F R Æ Ð S L U M I Ð S T Ö Ð A T V I N N U L Í F S I N S
g á T T – á R S R I T – 2 0 1 0
á árinu 2010 var markmiðið að skapa ungum
atvinnuleitendum:
1. Um 450 ný tækifæri í framhaldsskólum landsins
2. Um 700 ný námstækifæri hjá símenntunarmiðstöðvum
og fullorðinsfræðsluaðilum
3. Um 450 starfstækifæri/starfsþjálfunartækifæri í sam-
starfi við aðila vinnumarkaðarins, sveitarfélög og aðra
sem gætu lagt verkefninu lið
4. Um 400 ný sjálfboðaliðastörf í samstarfi við sjálfboða-
liðasamtök og íþróttahreyfinguna
5. Um 400 ný pláss í samstarfi við endurhæfingaraðila
Virkniúrræðum má skipta í tvennt:
Námsúrræði þar sem í boði eru fjölbreytt úrræði í samstarfi
við framhaldsskóla, símenntunarmiðstöðvar og aðra nám-
skeiðshaldara.
Markmiðið með samstarfi við framhaldsskólana er að
fjármagna viðbótarpláss í framhaldsskólum landsins fyrir
atvinnulaus ungmenni og bjóða þeim nýtt tækifæri til náms
í framhaldsskóla. Áherslan hefur verið á þróun nýrrar náms-
leiðar fyrir ungt fólk 16–20 ára, „Nám til framhaldsskóla-
prófs“. Hugmyndafræðin að baki slíkri námsleið er að þróa
nýjar aðferðir og námstilboð sem koma í veg fyrir ótímabært
brottfall úr framhaldsskóla. Þannig má segja að með þessu
samstarfi sé bæði gerð tilraun til að mæta þörfum þess hóps
sem hvarf frá námi vegna þess að þörfum hans var ekki mætt
og um leið er verið að leggja grunn að forvarnarstarfi sem
hefur það markmið að koma í veg fyrir ótímabært brottfall.
Markmið með samstarfi við símenntunarmiðstöðvar og
aðra fullorðinsfræðsluaðila er að bjóða ungu fólki þátttöku í
starfstengdum námskeiðum sem styrkja stöðu þátttakenda á
vinnumarkaði. Sömuleiðis er í boði að taka almennt nám með
það markmið að styrkja almennan grunn og undirbúa þátt-
takendur til frekara náms innan formlega skólakerfisins. Slíkt
nám veitir þeim í sumum tilvikum einingar sem geta nýst þeim
í áframhaldandi námi. Námsleiðir símenntunarmiðstöðva
hafa til þessa verið ætlaðar fullorðnu fólki á vinnumarkaði,
sem vill styrkja sig í starfi. Samstarfið við Ungt fólk til athafna
hefur leitt til þess að ungum atvinnuleitendum stendur nú til
boða mjög fjölbreytt úrval starfstengdra námsleiða sem flest
leiða til aukinna réttinda og möguleika á vinnumarkaði. Að
auki getur námið verið fyrsta skrefið í átt að frekara námi á
ýmsum sviðum og þá einnig innan formlega skólakerfisins.
Út úr samstarfinu hafa skapast áhugaverð verkefni sem
spennandi verður að þróa enn frekar.
Vinnutengdu virkniúrræðin eru m.a. þátttaka í sjálfboða-
liða störfum, starfsþjálfun/vinnustaðanám í smiðjum og
starfs tækifæri hjá fyrirtækjum og stofnunum.
Í boði eru m.a. fjölbreytt sjálfboðaliðastörf í samstarfi
við ýmis sjálfboðaliðasamtök, s.s. Rauða krossinn og íþrótta-
hreyfinguna. Formlegt samstarf við sjálfboðaliðasamtök er
nýjung sem hefur verið afar áhugavert að taka þátt í. Til
Rauða krossins voru ráðnir 8 verkefnisstjórar sem hafa það
hlutverk að taka á móti ungu fólki í sjálfboðin störf. Verk-
efnisstjórarnir halda utan um hópinn og kynna fyrir honum
þau fjölmörgu störf og verkefni sem Rauði krossinn sinnir
í samfélaginu. Hliðstætt samstarfsverkefni er í þróun með
íþróttahreyfingunni, en til hennar voru ráðnir þrír verkefnis-
stjórar til að vinna að verkefninu.
Í boði er líka vinnustaðanám/starfstækifæri í smiðjum.
Þar er Fjölsmiðjan þekktasta úrræðið og hefur verið unnið að
stækkun hennar á höfuðborgarsvæðinu, auk þess sem búið
er að stofna Fjölsmiðju á Akureyri og í Reykjanesbæ. Mark-
miðið með slíku úrræði er að gefa ungu fólki tækifæri á námi
á vinnustað þar sem blandað er saman námi og starfi undir
handleiðslu. Þannig gefst unga fólkinu tækifæri á að prófa
og kynnast mismunandi störfum sem auðveldar því að finna
út hvert það vilji stefna í framhaldinu. Til að fjölga slíkum
tækifærum hefur verið unnið að því að þróa vinnustaðanám
í samstarfi við sveitarfélög og fyrirtæki.
Ungir
atvinnuleitendur
Atvinna
Nám
Virkniaðgerðir
í samstarfi
við fjölmarga
aðila
Mynd 6. Ferlið