Gátt - 2013, Page 96

96
F R Æ Ð S L U M I Ð S T Ö Ð A T V I N N U L Í F S I N S
G Á T T – Á R S R I T – 2 0 1 3
við greiningu á fræðsluþörf. Hér fer saman greiningarvinna
ráðgjafans og tækifæri til að virkja allt starfsfólkið undir
faglegri leiðsögn til að meta fræðsluþörf.
Markmiðið er að eftir liggi metnaðarfull fræðsluáætlun
til ákveðins tíma oft eins til þriggja ára, sem feli í sér farveg
fyrir jafnt starfsmannahópa og einstaklinga til að njóta fjöl-
breyttra möguleika til fræðslu og starfsþróunar. Það er von
þeirra sem að þessari vinnu standa að starfsfólk efli hæfni
sína og fagmennsku. Það er margsannað að vinnustaðir, sem
fjárfesta í fræðslu og þjálfun auka menntunarstig sitt, sem
skilar sér í aukinni starfsánægju og færni starfsfólks, sem
aftur leiðir af sér bætta afkomu á alla lund.
F R Æ Ð S L U S T J Ó R I A Ð L Á N I F Y R I R
S V E I T A R F É L A G I Ð H O R N A F J Ö R Ð
Í upphafi árs 2012 gekk Sveitamennt frá samningi við Þekk-
ingarnet Austurlands (ÞNA, nú Austurbrú) um að vinna
heildstæða starfsþróunar- og fræðsluáætlun fyrir starfsmenn
stofnana Sveitarfélagsins Hornafjarðar, en það hafði óskað
eftir að fá Fræðslustjóra að láni. Verkefnið þótti afar spenn-
andi því hér var í fyrsta skipti stefnt að gerð fræðsluáætlunar
fyrir heilt sveitarfélag sem aukinheldur er tilraunasveitarfélag
og rekur því til viðbótar til dæmis heilbrigðisstofnun sem
annars eru reknar af ríkinu. Tveir Markviss-ráðgjafar komu
frá ÞNA þær Bergþóra Arnórsdóttir og Ragnhildur Jónsdóttir
sem hafði yfirumsjón með verkefninu. Einnig veitti Eyjólfur
Bragason ráðgjafi frá Sveitamennt aðstoð við verkefnið.
Ýmsar aðferðir eru notaðar af ráðgjöfum við framkvæmd
verkefnisins Fræðslustjóri að láni, algengasta aðferðafræðin
nefnist Markviss, en Símenntunarstöðvarnar hafa einkaleyfi
á notkun hennar. Markviss-ráðgjafar um allt land hafa sér-
hæft sig í notkun aðferðarinnar. Markviss er aðferð til að
vinna kerfisbundið að starfsmannaþróun í fyrirtækjum og
stofnunum. Aðferðin felur í sér skipulagningu á menntun,
þjálfun og öðru því sem tengist uppfræðslu starfsmanna.
Með Markviss-aðferðinni fá starfsmenn og stjórnendur tæki-
færi til að meta sjálfir þekkingar- og færniþörf vinnustaðarins
og skipuleggja þjálfun hvers starfsmanns að teknu tilliti til
matsins. Aðferðarfræði Markviss var þróuð í Danmörku af
samtökum iðnaðarins þar og hefur verið notuð á Íslandi
síðan árið 2001.
Eftir að stofnunum á Hornafirði hafði verið kynnt verk-
efnið ákváðu þær allar að taka þátt í vinnunni. Stofnanir
sveitarfélagsins eru átta, sjö eru á Höfn en grunnskóli er í
Hofgarði í Öræfum. Hver vinnustaður tilnefndi fulltrúa í
stýrihóp en hóparnir urðu þrír. Eftir að ráðgjafarnir höfðu
fundað og ákveðið hvaða Markviss-verkfæri (svo sem spurn-
ingalistar, viðhorfskannanir, starfagreiningar) yrðu notuð,
fór vinnan fyrir alvöru af stað. Haldnir voru fimmtán fundir
ýmist með eða án stjórnenda, vinnustaðafundir, vinnufundir,
stýrihópafundir og lokafundur þar sem kynning fór fram á
símenntunaráætlun sveitarfélagsins. Það má geta þess að
þótt starf ráðgjafanna hafi helst beinst að almennum starfs-
mönnum þá varð það að samkomulagi við stjórnendur í upp-
hafi verksins að allar áætlanir um fræðslu, einnig faglærða
fólksins, yrðu settar með í símenntunaráætlunina. Símennt-
unaráætlunin var að lokum gefin út og prentuð á veggspjald
sem dreift var á stofnanir sveitarfélagsins.
Ekki er unnt í stuttri grein að greina ítarlega frá þessu
vinnuferli en víst er að mikil ánægja var með afurðina og
starfsfólk sveitarfélagsins á hrós skilið fyrir þann áhuga sem
það sýndi verkefninu. Starfsfólkið hefur nú sívirkt tæki til
markvissrar uppbyggingar og vinnan við verkefnið hefur eflt
starfsandann og mun styrkja starfsfólkið í störfum sínum og
um leið bæta vinnuferli í stofnunum sveitarfélagsins.
A Ð L Y K T U M
Framboð á menntun hefur aldrei verið meira en nú og vex
hratt. Líkt og áður segir liggur ástæðan aðallega í breyttum
áherslum í atvinnulífinu. Vinnumarkaðurinn gerir kröfur um
að starfsfólk sé vel menntað og sífellt upptekið af því að viða
að sér nýrri þekkingu og reynslu. Atvinnulífið er orðið það
sérhæft að það kallar eftir fólki sem veit mikið um lítið, getur
Samningur undirritaður.