Goðasteinn - 01.09.2007, Qupperneq 168

Goðasteinn 2007
—

60 ár frá Heklugosinu 1947
Ragnar Böðvarsson
/
Ur dagbók og
minningum um
Heklugos
Þann 30. mars 1947, daginn eftir að Hekla tók að gjósa eftir 102 ára hlé, datt
mér í hug að festa á blað hvernig upphaf gossins kom mér fyrir sjónir. Þann 16.
apríl hóf ég svo að skrifa reglulega niður hvernig gosið hagaði sér frá mínum
sjónarhóli séð en hann var oftast einhvers staðar í nánd við bæinn í Bolholti.
Lengi vel skrifaði ég eitthvað um gosið flest kvöld þó að einn eða tveir dagar
féllu stöku sinnum úr og stóð svo fram yfir miðjan júní. Þá fóru að verða lengri
eyður í dagbókarfærslunni en ég greip þó alltaf til pennans ef Hekla gamla tók að
herða á gosinu eða skekja jörðina. Framan af eru dagbókarskrif þessi harla
tilbreytingarlítil á köflum, ýmist sagt frá mikluin drunum eða litlum og miklu gosi
eða minna. Astæðulaust er að birta það allt á prenti og í ritsmíð þessari koma strik
á milli daga í stað kafla sem felldir eru niður.
í köflunum sem hér birtast er helst tínt fram það sem segir frá einhverju sem
vakti sérstaka athygli mína, jarðskjálftakippum, öskufalli og öðru sem var frá-
brugðið venjulegri hegðan gossins. Orðrétt er tekið upp úr dagbókinni. Síðast
skrifaði ég í hana 7. nóvember 1948.
Seinni tíma innskot mín í dagbókarkaflana og milli þeirra eru skáletruð. Sumt
af því sem þar kemur fram hef ég rifjað upp með aðstoð systkina minna, Bjarna og
Guðbjargar, og Olgeirs Engilbertssonar í Nefsholti.
Veturinn 1946-1947 var annar vetur minn í skólanum á Strönd á Rangárvöll-
um. Þar var heimavist og nemendum skipt í tvær deildir. Gert var ráð fyrir að
börnin sæktu skólann frá 10 ára aldri fram að fermingu og voru þau tvo fyrstu
veturna í yngri deild en tvo þá seinni í eldri deild. Deildirnar dvöldu til skiptis
166