Bókasafnið - mar. 2024, Blaðsíða 41

Bókasafnið 44. árg – 2024 41
bókasafnskerfið og Primo leitargáttin eða Alma bókasafnskerfið og Primo VE leitar gáttin.
Fyrri valkosturinn var sleginn út af borðinu því samþætting Sierra og Primo upp fyllti engan
veginn það sem samið hafði verið um við Innovative. Þetta var sameiginlegt álit allra aðila.
Eftir stóð seinni valkosturinn, Alma og Primo VE sem voru þær lausnir sem voru í upp­
haflegu tilboði Ex Libris árið 2018. Þegar samtal hér um var í miðjum klíðum barst enn ein
tilkynningin, Alríkisviðskiptastofnun Bandaríkjanna (e. Federal Trade Commission) hafði
hafið skoðun á kaupunum á Innovative. Sú athugun stóð yfir langt frameftir árinu 2020 og á
meðan henni stóð var Ex Libris og Innovative gert að starfa sem tvö óháð fyrirtæki þótt kaupin
væru afstaðin. Í kjölfar þessarar nýju vitneskju skapaðist óvissa á meðan bæði fyrirtækin
voru að fóta sig í þessum breyttu aðstæðum. Landskerfið ákvað að fá endanlega úr því skorið
hvort Innovative gæti fundið leið til að samþætta Sierra við Primo með ásættanlegum hætti
en niðurstaðan varð sú sama og áður, Innovative réð ekki við að framkvæma þetta. Botninn
var því dottinn úr samstarfinu við Innovative og verkefnið stöðvaðist. Árið 2020 varð ár
óvissu og biðtíma.
Landskerfið tók nú þann kost að leita álits lögfræðinga hjá Lex lögmannsstofu og Ríkis­
kaupum um hvaða leiðir væru færar í stöðunni. Úr áliti þeirra kristölluðust tveir valkostir.
Annar var sá að í ljósi þess að Ex Libris var eigandi að Innovative Interfaces, þá uppfyllti það
„skilyrði d. liðar 1. mgr. 90. gr. Laga um opinber innkaup nr. 120/2016 um að vera fyrirtæki
sem gengur inn í stöðu upphafslegs samningsaðila (Innovative). Ákvæðið gerir þó einnig að
skilyrði að aðilaskiptin hafi ekki í för með sér aðrar verulegar breytingar á samningnum.“
Hinn valkosturinn var að slíta samningum við Innovative og fara í nýtt útboð. Hvorugur
valkosturinn var góður. Í ljósi þess að búið var að fínkemba markaðinn þjónaði engum tilgangi
að bjóða út aftur. Því var ákveðið að láta á það reyna hvort Ex Libris væri tilbúið að taka yfir
samninginn sem gerður var við Innovative með ofangreindum skilyrðum. Ex Libris lýsti sig
reiðubúið til þess. Til að uppfylla þá kröfu að ekki yrðu verulegar breytingar á samningi við
Innovative var ákveðið að gera viðauka við hann til að endurspegla breyttar aðstæður. Úr
varð samningur við Ex Libris.
Í júní 2020 náðust samningar við Innovative Interfaces um endurgreiðslu upp á tæpar 18
m.kr. til að bæta Landskerfinu fjárhagslegt tjón sem það varð fyrir þegar Innovative gat ekki
lengur uppfyllt samningsskyldur sínar. Lauk þar með samskiptum við Innovative.
Samningur við Ex Libris
Til að gera langa sögu stutta varð úr að Ex Libris tók yfir samningsskuldbindingar Innovative
og þann 4. nóvember 2020 var samningur við Ex Libris undirritaður.
Í viðauka var kveðið á um að þróaðar yrðu tilteknar viðbætur við Alma sem snéru einkum að
persónuvernd lánþega í útlánaaðgerðum og auknum sjálfsafgreiðslumöguleikum lán þega á
leitir.is. Samningurinn tekur til leigu á bókasafnakerfinu Alma og leitargáttinni Primo VE og
eru kerfin veflæg. Um er að ræða svokallaða hugbúnaðarþjónustu (e. SaaS – Software as a
Service), þ.e. leigður er aðgangur að kerfunum sem eru hýst í gagnaveri Ex Libris í Frankfurt
í Þýskalandi.