Morgunblaðið - 16.11.2003, Blaðsíða 23

FRÉTTIR
MORGUNBLAÐIÐ SUNNUDAGUR 16. NÓVEMBER 2003 23
HJÓN frá Síberíu komu hingað til
lands snemma á árinu til að taka
þátt í undirbúningi ráðstefnu um
upplýsinga- og samgöngutækni á
norðurslóðum, sem fram fór á Ak-
ureyri seint í október. Þau segja
margt sameiginlegt með Íslend-
ingum og íbúum á sínum heimaslóð-
um.
Dr. Vladimir Vasiliec og Yana
Alexandrova eru frá Sakha-
lýðveldinu í Jakútíu í Rússlandi, þar
sem þau vinna fyrir Alþjóðasamtök
fylkja og landsvæða á norðurhveli
(the Northern Forum). Þeim var
boðið að koma hingað til lands til að
vinna með Íslendingum, sem fara
með formennsku í Norðurskauts-
ráðinu um þessar mundir, til að
vinna að undirbúningi ráðstefnu um
upplýsinga- og samskiptatækni í
tengslum við nám og læknisstörf á
norðurslóðum.
„Við komum til landsins snemma í
febrúar á þessu ári og höfum verið
að vinna að undirbúningi ráðstefn-
unnar á Akureyri. Starfið fólst mikið
í því að finna ræðumenn fyrir ráð-
stefnuna, sem var mikið verk. Við
þurftum að hafa samband við sér-
fræðinga frá norðlægum háskólum í
þeim málum sem átti að ræða á ráð-
stefnunni,“ segir Yana.
Ráðstefnan fjallaði um fjarlækn-
ingar og fjarnám, en hvort tveggja
er mjög mikilvægt fyrir afskekktar
byggðir á norðurslóðum. „Þarna
getur tæknin tengt litla heilsugæslu-
stöð við stór sjúkrahús sem hafa allt
til alls, þá geta sérfræðingar að-
stoðað lækna á landsbyggðinni ef
upp koma tilvik sem þeir þekkja
ekki nógu vel, og jafnvel er hægt að
gera aðgerðir með aðstoð þessarar
tækni.“
Yana nefnir sem dæmi að það sé
sex tíma flug frá heimabæ sínum í
Sakha-lýðveldinu til Moskvu svo það
spari mikinn tíma og peninga ef það
er hægt að veita sjúklingum meðferð
á heimaslóðum í stað þess að senda
þá til Moskvu.
Sterkar hefðir
Yana og Vladimir ferðuðust tals-
vert um Ísland yfir sumarmánuðina.
„Við vorum stórhrifin af landslaginu.
Landið er lítið en landslagið er mjög
mismunandi eftir landshlutum. Svo
vorum við svo heppin að sjá hvali.
Við fórum í hvalaskoðun frá Ólafsvík
og sáum háhyrninga, hnúfubaka,
höfrunga og hrefnur,“ segir Yana.
Þó að þau viðurkenni að margt sé
mismunandi í menningu Íslands og í
Sakha-lýðveldinu eru Yana og Vlad-
imir sammála um að það sé einnig
margt sem þjóðirnar eiga sameig-
inlegt. „Hér eru mjög sterkar hefðir,
alveg eins og heima, við höldum mik-
ið í fortíðina, en á meðan þið gerið
það í gegnum gömlu sögurnar ger-
um við það í gegnum munnlega
geymd, okkar sögur hafa bara ný-
lega komist á prent,“ segir Vladimir.
Svo er líka mikill munur á lönd-
unum, segir Yana, og bendir á að Ís-
land sé lengra komið í notkun tækni,
og segir það hafa komið sér á óvart
hversu mikið var hægt að gera frá
skrifborðinu hér á Íslandi sem þurfti
að ganga á milli manna til að koma í
verk í Sakha-lýðveldinu.
Yana og Vladimir segjast mjög
þakklát fyrir að hafa fengið tækifæri
til að vinna hér á landi, og segjast
ekki hafa mætt neinu nema hlýhug
og hjálpsemi. Einnig kváðust þau
þakklát fyrir stuðninginn sem héðan
barst fyrir tveimur árum þegar mik-
il flóð dundu yfir í heimahéraði
þeirra.
Margt sameiginlegt með Ís-
lendingum og íbúum Síberíu
Morgunblaðið/Þorkell
Yana og Vladimir segja það mikla lífsreynslu að vinna hér á landi.
UM hundrað manns, heimamenn og
fjöldi aðkomumanna, mætti til kynn-
ingarfundar Landsvirkjunar og
RARIK um Skaftárveitu og virkj-
anahugmyndir í Skaftá og Hólmsá
sem haldinn var í félagsheimilinu
Kirkjuhvoli á Kirkjubæjarklaustri á
þriðjudagskvöld, að því er fram kem-
ur á heimasíðu Skaftárhrepps.
Þar kemur fram að forsvarsmenn
rannsókna á svæðinu hafi skýrt fyrir
fundarmönnum framgang rann-
sókna og helstu niðurstöður sem fyr-
ir liggja. Svavar Jónatansson, verk-
fræðingur hjá Almennu verkfræði-
stofunni, fór yfir rannsóknir á
virkjanakostum á svæðinu milli
Mýrdalsjökuls og Vatnajökuls.
Snorri P. Snorrason, jarðfræðingur,
sagði frá jarðfræði á svæðinu og
áhrifum aurburðar í Eldhrauni. Sig-
mundur Einarsson, jarðfræðingur,
skýrði frá umhverfisáhrifaþáttum
hugsanlegra virkjanaframkvæmda í
Skaftárhreppi. Að síðustu kynnti
Sigurður Lárus Hólm, verkfræðing-
ur hjá verkfræðistofunni Vatnaskil-
um, rennslislíkan af Skaftá og
Hverfisfljóti.
Fjölmenni á
kynningar-
fundi um
Skaftárveitu